Bregðumst ljúfum landa okkar til hjálpar

Það var nú algjör óþarfi hjá þeim þarna í Havillandsbanka, raunar sannkallað óþokkabragð, að reka strákgreyið hann Magnús úr starfi, þó svo hann hafi lent í Hverfissteininum eins og hver annar góðkunningi lögreglunnar og farið þaðan á Hraunið. Þessir helvítis havillandsþorparar hefðu auðveldlega getað litið þannig á að pilturinn væri í heilsubótarmeðferð heima hjá sér á Íslandi.

Það hafa margir góðir og gengir menn dvalist á Hverfisgötunni, Skólavörðustígnum, Litla-Hrauni og Kvíabryggju án þess að missa vinnuna. Þessvegna eigum við Íslendingar að bregðast ljúfum landa okkar til hjálpar og krefjast þess að óþokkarnir í Havillandsbanka dragi uppsögn Magnúsar Guðmundssonar til baka, strax, annars skuli þeir eiga okkur á fæti.  

Magnús leystur frá störfum

Athugasemdir

[Sigurður Helgason, 7.5.2010 kl. 21:02]

Satt er það og ekki getur hann farið á atvinnuleysisbætur , alltof lágar fyrir svo góðan mann,

það er skömm að þessu og það ætti að reka saksóknarann ,

þetta er ekkert annað en einelti og síldarmenska í stjórninni, sérstaklega hjá steina og jóu, en við björgum þeim og færum þeim einn banka eða svo,

Og munum að enginn er sekur fyrr en sekt hans er sönnuð, það verður aldrei í þessum málum, fyrr held ég að frjósi í helvíti ;)  

[Jóhannes Ragnarsson, 8.5.2010 kl. 11:31]

Auðvitað er óásættanlegt að láta sérstka saksóknarann komast upp með svona hluti að undirlagi Evu Joly. Það ætti að reka þau bæði - úr landi. Það hafa sjálfstæðismenn alltaf sagt, og þeir vita manna best hvað þjóðinni er fyrir bestu. 

[Sigurður Helgason, 8.5.2010 kl. 13:25]

alveg rétt, og hver er skilgreining á þjóð er það ég um mig  og mínir nánustu :)

[Jóhannes Ragnarsson, 8.5.2010 kl. 14:21]

Ég um mig frá mér til mín hefur einlægt verið í helst til miklu uppáhaldi hjá Íslendingum, en á frjálshyggjutímanum keyrði um þverbak í þessum efnum. Nú situr liðið uppi með allrahanda fráhvörf og timburmenn í öllum regnbogans litum eftir eigingirni og sjálfhverfutrylling síðustu ára.