Það voru fleiri yfirheyrðir í morgun en kátu kallarnir í Ásgarði

Það voru fleiri yfirheyrðir í morgun en kátu kallarnir í Ásgarði. Þetta voru sæmdarhjónin, frú Ingveldur og Kolbeinn Kolbeinsson skrifstofustjóri, handtekin á slaginu átta í morgun og færð nauðug til yfirheyrslu útaf þátttöku þeirra í nauðaómerkilegri guðþjónustu á aðfangadagskvöld. Klerkarnir sem messuðu yfir þeim hjónum umrætt aðfangadagskvöld tóku sig nefnilega til í gær og lögðu fram kæru á hendur þeim. Í kæru musterisriddaranna er þeim meðal annars gefið að sök að hafa smánað heilaga kvöldmessu og raskað friðhelgi jólanna með frammíköllum, upphrópunum, hlegið og flissað og reynt til að efna til ryskinga meðan á guðþjónustu stóð. Þá segir í ákæruskjalinu að Kolbeinn hafi ræskt sig stórkallalega í miðjum sálmi og hrækt á bakið á kórstjórnandanum, en frú Ingveldur mælt nokkrum sinnum klámyrði svo hátt að heyrst hafi um alla kirkjuna; þau hafi verið áberandi ölvuð og haft með áfengi með sér sem þau hafi staupað sig á. Meira að segja undir sjálfu jólaguðspjallinu hafi þau dreypt á flöskunni, hóstað og grett sig. Og þegar messu var lokið og kirkjugestir á leið út hafi orðið uppþot í miðri mannþrönginni vegna áreytni Kolbeins við konu nokkra sem sótt hafði messuna ásamt eiginmanni sínum og börnum.

Að vonum eru prestarnir við kirkju þessa mjög ósáttir með hvernig til tóks á aðfangadagskvöld og hafa þeir því ritað biskubi Íslands bréf þar sem þeir fara þess á leit að fá að bannfæra frú Ingveldi og Kolbein Kolbeinsson frá allri kirkjulegri þjónustu, þar með talið að þau fái ekki legstað í vígðri mold. 

Árásarmennirnir yfirheyrðir

Athugasemdir

[Magnús Sigurðsson, 26.12.2010 kl. 14:03]

Jæja, þetta er verra en ég hélt.

[Ásthildur Cesil Þórðardóttir, 26.12.2010 kl. 14:04]

Gleðileg jól Jóhannes minn.  Skilaðu kveðju til frú Ingveldar og Kolbeins

[Jóhannes Ragnarsson, 26.12.2010 kl. 14:12]

Já, Magnús, ástandið er mjög slæmt. Prestar vorir kunna ekki lengur stilla sig og eru hættir að fyrirgefa konum og körlum syndir þeirra.

Gleðileg jól, Ásthildur. Ég skal með glöðu geði koma kveðju þinni til skila.

[Magnús Sigurðsson, 26.12.2010 kl. 14:22]

Hvað skildi lögreglan gera?  Ætli þeir krefjist þess að bæði lögreglan og þjónar kirkjunnar verði vopnaðir rafbyssum? 

Kæmi mér ekki á óvart, allavega yfir stórhátíðir.

[Jóhannes Ragnarsson, 26.12.2010 kl. 15:59]

Ég á allt eins von á að sóknarprestar frú Ingveldar og Kolbeins sæki a.m.k. um leyfi til að nota framvegis rafbyssur við guðþjónustur. Annars held ég að þeim sé skapi næst að hafa skambyssur undir hempunni þegar þeir embætta í framtíðinni.