Jóhannes Ragnarsson

2.3.2011 | 20:50

Skammarlega ranglát verðlaunveiting

Það muna kanske einhverjir stálminnugir menn eftir þegar hundfjandinn Tryggur réðist á húsbónda sinn og beit hann í hnésbæturnar af því honum líkaði ekki við verðlaunin sem húsbóndinn veitti honum fyrir vel unnin störf að saauðfjársmölun.

Eða þegar Kolbeinn Kolbeinsson, skrifstofustjóri, kom augafullur heim rétt fyrir hádegi á laugardag. Hann var ekki fyrr búinn að lauma öðrum fætinum inn fyrir útidyraþröskuldinn þegar frú Ingveldur rak honum þvílíkt bylmingshögg á ranann með tuttugu og tveggja tommu flatskjá að Kolbeinn kastaðist úti blómabeð.

Svo eru aðrar verðlaunaveitingar veittar í þeim fróma tilgangi að gera lítið út verðlaunahafanum, eða höfunum ef um fleiri en einn er að ræða. En það er víst best að tala sem minnst um það.

Nú, svo eru þeir víst farnir að verðlauna kennara, sem láta eftir sér að klæmast dulítið opinberlega, með áminningu. Og sýnist víst sitt hvejum um það uppátæki.

En eitthvað finnst mér það dularfullt að DV skuli veita ,,menningarverðlaun" í ljósi þess að DV er hvað þekktast fyrir lágmenningu. Þar af leiðir að (lág) ,,menningarverðlaun" DV hjóta að vera því sem næst andstæðan við raunveruleg menningarverðlaun. Það hlýtur því að vera afskaplega gruggug vegsemd að vera heiraður af DV í nafni menningar.