Flokksbróðir fjármálaráðherra

Hohohojjjj ... auðvitað er Steingrímur hörmum sleginn, að ekki sé sagt þörmum veginn, yfir því að ráðning flokksbróður hans í starf forstjóra Bankasýslu ríkisins hefur leitt til þess að stjórn Bankasýslunnar greip til þess óyndisúrræðis að segja af sér.

Nú, fyrst stjórn Bankasýslunnar er hlaupin fyrir björg, má reikna með því að Páll Magnússon, framsóknarmaður og flokksbróðir fjármálaráðherra, hlaupi fyrir líka fyrir sömu björg. En fjármálaráðherra er séður fugl og á, ef að líkum lætur, fáein fullmektug dekurdýr uppí erminni til að manna stjórn Bankasýslu ríkisins.

En þó að Páll Magnússon framsóknarmaður falli milli skips og bryggju með öllum þeim hörmungum sem slíkum atburði fylgir, er björninn síður en svo unninn. Eftir er að taka í hnakkdrambið á Páli Magnússyni útvarpsstjóra og auðvaldsdindli og sparka honum veg allrar veraldar úrúr húsakynnum Ríkisútvarpsins, áður en honum tekst að vinna fleiri spjöll þar innandyra.

En það er líklega heldur mikið fyrir harma og þarma framsóknarmannsins í forstjórastóli Vinstri grænna að missa tvo Pála Magnússyni úr elítuhirð Gamla Íslands, sem Steingrími hefur tekist, góðu heilli, að endurreisa af gífurlegri harðfengi og dugnaði. 

Harmar afsögn stjórnarinnar

Athugasemdir

[Magnús Sigurðsson, 24.10.2011 kl. 20:25]

Það er orðið um fátt annað að velja fyrir ykkur eðalkommana, en að tjarga dýrið, velta honum upp úr bómullar hnoðrum og henda síða fyrir björg.

[Sigurður Þórðarson, 24.10.2011 kl. 21:12]

Sæll Jóhannes, ég gerist æ latari við að tjá mig á blogginu en hef þess meira gaman af að lesa beitta penna eins og þig. Tveimur flokksbræðrum þeirra Páls Magnússonar og Steingríms Jóhanns þeim Axeli Jóhanni Axelsyni og Sigurði Þorsteinssyni rann auðvitað blóðið til skyldunnar að láta sem þeir væru ósáttir við SJS sem þeir þó slógu skjalborg um.

Líttu  á þetta þér til gamans.

[Jóhannes Ragnarsson, 24.10.2011 kl. 21:15]

Það getur stundum verið gaman að látalátunum í Axeli Jóhanni og Sigurði Þorsteinssyni, þeir eru oft svo óborganlega önugir.