Jóhannes Ragnarsson

18.12.2013 | 13:37

Óeðli framsóknartaðkallana

Það má heita þriflegur andskoti hvað velst af labbakútum, taðköllum og taðkéllíngum á þing fyrir hinn úrkynjaða og lágkúrlega Framsóknarflokk. Þetta er svo sem ekki undarlegt, þar sem gamla Framsóknarmaddaman hefur í heila öld verið í fararbroddi þeirra sem bera af í menningarskorti og óeðli all svakalegu.

Nú fullyrðir ein þingmannseyðimörk Framsóknar, að desemberuppbót til launamanna sé hugsuð sem bónus frá atvinnurekendum, en bónus er sem kunnugt er afkastatengdur launaauki. Þetta er að sjálfsögðu ruglandi og fullkomið kjaftabull í þingmannseyðimörkinni. Desemberuppbót og orlofsuppbót eru tilkomnar vegna þess að ekki mátti bæta þeim inní launataxta vegna einhverra verðbólgumarkmiða á sínum tíma.

En líklega veit þessi maðksmogni húskarl og taðkall Framsóknarmaddömunnar ekki betur. Hann hefur afturámóti, af alkunnri framsóknarlítilmennsku, séð þarna tækifæri til að gera desemberuppbót til atvinnulausra tortryggilegar í von um að ríkissjóður slyppi við að greiða þessa lús út til fátækra. Skýrar getur rauðsmýrareðli Framsóknarmaddömunnar varla exítérast.

Meðfylgjandi mynd er af tveimur uppáhaldshúskörlum Framsóknarmaddömunnar.