Sá með hundsnafnið gerðist fjölþreifur til kvenna og Máría Borgargagn í slæmum málum

Þrifalegur andskoti fyrir hann Tómás á búllunni að fá þann írska með hundsnafnið í heimsókn í dag. Og ég sem hélt að lögregluyfirvöld og innanríkisráðherrann hefðu rekið þennan þorpara jafnóðum úr landi og hann steig skítugum tánum á íslenska jörð. En þarna hafa þeir er síst skyldi brugðist hrapalega og þeim ber að segja af sér strax í fyrramálið.

En hvað um það.

Úr annarri átt fékk ég þær fregnir að hinn írski þræll með hundsnafnið hefði gerst heldur betur fjölþreifinn til kvenna síðastliðna nótt. Er heilt undur að íslenskar konur, allt frá spurningastúlkum uppí skorpinskinnaðar stútúngsbrussur, skuli þýðast kvensemi svona kauða. En sannleikurinn er harður og skelfilegur: ekki færri en tíu kvinnur ku hafa átt í líkamlegum samskiftum við þennan hræðilega mann. En eitt er þó gott við þessa fregn og það er það að hún er óstaðfest, - skjaldan lýgur samt almannarómur - og hananú.

Af Máríu Borgargagni frétti ég síðast í morgun, en þá var búið að loka hana inni í Hverfissteininum eftir að hafa ráðist á lögregluþjóna og lúbarið þá. Hún hafði semsé verið að láta drukkinn og dópaðan unglingspilt aka sér milli húsa í morgunsárið þegar þrjá lögregludólga bar þar að sem stöðvuðu bifreið strákstaulans og Borgargagnsins. Þegar til átti að taka rauk Máría Borgargagn eins og grimmur hani á lögreglumennina, með þeim ásetningi, eins og einn lögregluþjónninn sagði, að stórslasa þá eða myrða. Ennfremur sagði þessi greinargóði lögregluþjónn, að nú væri verið að rannsaka hvort Borgargagnið hefði verið að misnota drenginn sem ók henni, en hann er vel innan við átján ára aldur.

Bono á Búllunni