Sálarbætandi þórðargleði

Satt að segja fylltist ég dásamlegri heilagri þórðargleði þegar mér bárust fréttir af skitupestinni á Dalvík. Mikið djöfull held ég hafi verið gaman að sjá til hvernig karlarnir þarna og kerlingarnar báru sig að, þegar kveisan var komin á flug og baneitruðu rækjurnar, sem einhverjir óþokkar byrluðu þeim, vóru farnar að krauma og grasséra í görnunum á þeim. Hohh-ho-ho-hooojjj! Déskotans ósköp er nú innilega notalegt að vera gagntekinn af sælli þórðargleði. Það má nú segja.

Ég held maður muni, þegar Brynjar Vondalykt kom blaðskellandi og yfir sig kátur með 10 lítra af dragúldnu landabruggi á sunnudagsmorgni heim til frú Ingveldar og Kolbeins Kolbeinssonar. Það hafði verið gestkvæmt um helgina á heimili þeirra hjóna og áfengisbyrgðir uppurnar og timburmennirnir blöstu við, nokkru áður en ráð var fyrir gert. Brynjar Vondalykt var samt ekki á því að láta höndur falla í skaut, heldur tók sér ferð á hendur og braust inn í bílskúr kunningja síns, en þar vissi Brynjar af landabruggskút. Innbrotið tókst eins vel og hugsast getur og kúturinn var á sínum stað.

Þegar hinn dragúldni landi var heilu og höldnu kominn í hús frú Ingveldar og Kolbeins, ruddust viðstaddir að honum eins og banhungraðar sauðkindur á garða fullan af ilmandi heyi. Og eftir klukkutíma var allt komið á fúll svíng; slagsmál hófust af miklum krafti við salernisdyrnar, en þar innanvið húkti Óli Apaköttur í keng, því hann hafði orðið fyrstur á náðhúsið. Og þegar búið var að brjóta dyrnar upp, færðust slagsmálin að klósettskálinni, Óla Apaketti var hrinnt útaf setunni og stóð bunan afturúr honum uppá vegg og á einhverja viðstadda. Verst fór þó Brynjar Vondalykt útúr óeirðunum, því honum var kennt um aðsteðjandi sjúkdóm og var hann sleginn fjórum sinnum í öngvit á einum og hálfum klukkutíma, en þá var svo af samkvæminu gengið að aunginn hafði mátt til lyfta hnefa.

Ég leyfi mér að vona, að tiltektirnar á Dalvík hafi ekki verið síðri en atgangurinn á heimili frú Ingveldar og Kolbeins, landabruggsmorguninn góða.

Á heilsugæslu með matareitrun