Fórnarlamb dæmalausra illmenna

Ja hvur bröndóttur. Hvaða déskotans illmenni voru það sem neyddu frú Ingibjörgu Sólrúnu til að slá af lífsgæðum sínum með því að gera hana að opinberri persónu í næstum þrjá áratugi? Það held ég séu ljótu fólin. Sennilega hafa þessi sömu skaðræðis óféti líka neytt frú Ingibjörgu Sólrúnu til að kyssa Gjeir Hooordý fyrir framan blaðaljósmyndarana á Þingvöllum og setjast síðan í ríkisstjórn með honum. Enn fremur er nokkuð ljóst, að hinir grimmu varúlfar hafa neytt þessa óhamingjusömu opinberu persónu með nöktu sverði til að fljúga út og austur um veröldina, með áðurnefndum G. Hooordý, þeirra erinda, að kunngera heimsbyggðinni í eitt skifti fyrir öll, að bánkakerfið á Íslandi og efnahagsástandið þar væri traustara en allt sem traust er. Það var skemmtilegt ferðalag.

Þá heldur frú Ingibjörg Sólrún því fram, að svokallað ,,landsdómsmál" liggi eins og fleinn í holdi þeirra sem hlut áttu að máli. Það þýðir á mannamáli, að þótt stjórnmálamenn setji þjóðarbúið svo gott sem á hausinn þá eigi allir að láta sem þeir hafi ekki tekið eftir neinu; og allrasíst eigi að rannsaka hvernig gjaldþrotið bar að.

En sem betur fer, þá beittu Samfylkingin og Steingrímur J. ánægjulega kúnstugum bellibrögðum þegar kom að atkvæðagreislunni um hverja skyldi draga fyrir landsdóminn. þannig sluppu frú Ingibjörg Sólrún, Árni Matt og Bjöggi Sig fyrir horn, en Hooordý karlinn sat einn eftir í súpunni. Síðan var fjórmenningunum bætt landsdómstjónið með því að færa þeim viðulegar og vel launaðar stöður, sem sárabót fyrir lífsgæðaafsláttinn, meira að segja Hooordý var veiddur uppúr súpunni og gerður að sendiherra í USA. Fjórmenningarnir voru semsé endurreistir af ríkisstjórn Jóhönnu og Steingríms um leið og þau endurreistu Gamla Ísland uppí kjaftinn á erkiauðvaldinu. Þar með var réttlætinu fullnægt. En þjóðin, sem ekki er þjóðin í huga sumra kvenna með flein í holdi, situr eftir með sárt ennið og veit ekki sitt rjúkandi ráð.

Aldrei séð eftir því að hafa hætt

Athugasemdir

[Hörður B Hjartarson, 4.4.2015 kl. 10:29]

       Já en Jóhannes gleymdu því ekki að þetta er nú einu sinni ÞJÓÐIN sem hér um ræðir , eða ertu búin að gleyma Háskólabíós-fundinum ?

   Vildi ég væri ósammála þér í einu og öllu um þetta , en því miður , þá er ég þér HJARTANLEGA SAMMÁLA .

   Vertu viss , hún Ingibjörg/Þjóðin , á eftir að droppa upp heima hjá ykkur og henni verður tekið með útbreiddum örmum , þetta er nú einu sinni ÞJÓÐIN .

                                  Gleðilega páska !