Síra Baldvin bregst ókvæða við villu klerkastjórnarinnar

Þá hafa blessaðir klerkarnir okkar snúist formlega á sveif með helgidagaófriði og þar með gerst sporgöngumenn Þorgeirs Hávarssonar sem vildi aungann bölvaðan frið ef ófriður væri í boði. Ekki er gott að segja hvernig kirkjuhöfðingjarnir ætla framkvæma ófrið sinn á helgidögum en margar leiðir eru uppi á borðum í þeim efnum. Máske hyggjast þeir boða lýðnum sverð, eins og litli sósíalistinn frá Nasaret komst að orði, og fara um með alvæpni á helgidögum og höggva þá hvað er fyrir verður.

Nú svo má vera að stjórn prestafélagsins muni láta þau boð út ganga til félagsmanna sinna, að þeir noti helgidagana til að velta um borðum og stólum braskaranna og peningagéðsjúklinganna og reki þá hvarvetna útúr húsum siðaðra manna. Þetta verður þó að teljast harðla ólíklegt því mörgum prestum þykir afar vænt um peningana sína og hlutabréfin sín, eru mammonstrúar kapítalistar með geislabaug.

Síra Baldvin er að vonum ævareiður vegna stuðningsyfirlýsingar prestafélagsstjórnarinnar við Pírata og Bjarta framtíð og fullyrðir að Guð sé ekki síður reiður en hann í garð þessarar óguðlegu stjórnar. Hann segir, að þegar prestafélagið sé farið að stunda opinbert guðlast og sathanískt framferði ásamt villulifnaði með Pírötum og Bjartri framtíð verði að taka fast í taumanna og reka íllt út með illu; hann sé því nauðbeygður að safna liði og fara með sveðju og framhlaðninginn sinn til orrustu við þá hina forhertu og andguðlegu klerka sem nú hafa berað sig sem eina andstyggilega niðurlagningsmenn guðskristni og evangelíum á Íslandi.

Prestar vilja ekki helgidagafrið

Athugasemdir

[Aztec, 11.4.2016 kl. 18:14]

Ef hvorki almenningur/neytendur né prestarnir vilja þetta, hvaða risaeðlur eru þá enn að halda í þessa helgidagavitleysu?

Og ef hægt verður að afgreiða afnámið með lögum fyrir hvítasunnu, þá væri það ágætt. 

[Jóhannes Ragnarsson, 11.4.2016 kl. 18:20]

Hvaða neytendur ert þú að tala um, kunningi?, - áttu við eiturlyfjaneytendur eða eitthvað soleiðis?

[Aztec, 11.4.2016 kl. 19:22]

Ef ég hefði átt við eiturlyfjaneytendur, þá hefði ég skrifað það. Nei, ég átti við venjulegt fólk sem vilja kaupa í matinn og skemmta sér á föstudaginn langa, páskadag, hvítasunnudag og jóladag.

Þú hefur vonandi heyrt um venjulegt fólk, Jóhannes, er það ekki? Þá er ég e.t.v. ekki að tala um Ólafsvíkinga eða útrásarvíkinga, en alla hina.

[Jóhannes Ragnarsson, 11.4.2016 kl. 19:44]

Nei, ég hefi ekki heyrt talað um þetta ,,fólk" sem þú nefnir. Mannskapur sem nennir ekki að kaupa sér í matinn fyrir jól og páska má snapa gams fyrir mér, og um dansfífl og skemmtanfíkla er það að segja, að það stöff getur sem best dansað og djöflast heima hjá sér og þarf ekki opinber vertshús til að auglýsa sinn innri afkáraskap.

[Aztec, 11.4.2016 kl. 23:06]

Þú hefðir eflaust gott af því sjálfur að hreyfa lappirnar, Jóannes, svona endrum og eins, og svífa yfir dansgólfið á einhverju sveitaballinu þarna fyrir vestan á föstudaginn langa. Enda ertu víst ekki að gera neit annað þann daginn, nema þú komizt til Grundarfjarðar í Samkaup til að kaupa í matinn.

[Jóhannes Ragnarsson, 12.4.2016 kl. 07:17]

Það er alveg rétt að ég hefði bara gott af því að heyfa lappirnar endrum og eins, ekki neita ég því. Reyndar hef ég verið með í draga þorskanet í Breiðafisrði á föstudaginn langa oftar en einu sinni. Það hafði fjandakornið ekkert uppá sig.