Jóhannes Ragnarsson

16.8.2016 | 18:53

Á meðan situr Hann í vandræðabarnavarðhaldi

Jæja, þá hefir Kolbeinn Kolbeinsson skrifstofustjóri og framsóknarmaður aukið forsætisráðherra kraft og þor með hrossalækningameðali. Í staðinn hefir forsætisráðherra sprautað fjármálaráðherra í hægri rassakinn með enn kröftugra hrossalækningameðali. Enda eru þessir fýrar nú komir á fúllsvíng í hefðbundnum sjónhverfingum fyrir kosningar svo að bókstaflega rýkur úr hausnum á þeim. Á meðan hefir gamla Framsóknarmaddaman Sigmund litla Dávíð í vandræðabarnavarðhaldi í fóðurganginum í Framsóknarfjósinu, til að hann geri sem minnst af sér á meðan fullorðnu mennirnir leika blekkingar sínar og kosningaloforð á stóra sviðinu.

Þessi meðferð á Sigmundi Dávíð gaf honum tilefni til að hóta Framsóknarmaddömunni, að ef hún hleypti honum ekki út þá myndi hann ganga í Þjóðfylkinguna. Sú gamla svaraði óþekktaranganum með því að trúa honum fyrir, að Þjóðfylkingin væri deild í Framsóknarflokknum og hefði sér bás í Fjósinu. Svo vildi hún ekki heyra meira satans óráðskjaftæði í svona stúf meir. Þannig má Sigmundur sitja í gæslu meðan dýralæknirinn og Garðabæjarundrið hlaupa eins og ofvirkir kjúklingar um borg og bý og lofa kjósendum hinu og þessu sem þeir hafa ekki hundsvit á, en halda að virki eins og gott ópíum á fólkið.

En eftir kosningar verður væntanlega komið annað hljóð í strokkana í Valhöll og Framsóknarfjósinu þegar Píratarnir verða búnir að sópa núverandi valdhöfum ásamt stjórnarskránni útúr stjórnarráðinu og farnir að vega að LÍÚ-slektinu. Þá verður harmagrútur og gnístran tanna á mörgum ríkmannlegum heimilum og sumir munu ekki hafa það af og flýja land eða stofna hryðjuverkafélög.