Auðgunargirnd og sjálfsbjargarviðleini skattsvikara

Ljótu óþrifnaðarkallarnir þessir skattsvikarar. Og ekki skattsvikakéllíngar betri. Það er vandséð hvað á að gera við soleiðis kvikindi. Kunningi minn, sem er grandvar maður, skikkanlegur og talfár, gat ekki orða bundist um skattsvikara og sgaði sem svo í vitna viðurvist, að henging, hálshöggning og hæg fláning væru of væg refsing fyrir þessa andskota. Þegar þessi kunningi minn mælti þessi hógværu orð hafði ekki heyrt um þorpara og þrjóta sem svíkja skatt í gegnum Mossak Fonseca, Tortólu og fleiri staði, sem allir eiga það sameiginlegt að heita skrýtnum, annarlegum nöfnum. 

Nú er það svo, að skattaundanskot eru sprottin af auðgunargirnd skattsvikaranna, náttúrlegri sjálfsbjargarviðleitni þeirra og skefjalausum nánasarhætti. Sumir vilja eflaust bæta við þessa upptalningu atriðum eins og glæpaviti, skítlegu eðli og mafíuhneygð, en það eru auðvitað ekki mín orð. Allt um það, þá annast fjáraflamenn um peningana sína af sömu alúð og samviskusöm móðir börnin sín; að láta frá sér pééénííínga í krumlurnar á skattstjóra er þessum mönnum það sama og móður að afhenda börn sín alræmdum barnaníðingi.

Á dögunum vöktu nokkra athygli ummæli einhverra uppþornaðra umskiptinga og pappakassa þess efnis, að skattheimta væri ofbeldi, eða eitthvað í þá áttina. Þessi einkennilegi munnsöfnuður fangaði ekki hugarheim fólk af þeim sökum, að þetta væri eitthvað frumlegt sem öllum hefði yfirsést fram til þessa, heldur var ástæðan sú, að fólki þótti sem þeir er hefðu slíkan talsmáta um hönd væru að leggja til að Íslendingar gerðust skrælingjar til orðs og æðist, líkamlega sem andlega. Svo má líka líta á ummælin frá því sjónarhorni, að skattsvikarar færu hulduhöfði með peningana sína um öll heims- og foldarból til að losna undan grimmilegu ofbeldi andstyggilegra, sadistískra hrotta og væri þeim full vorkun. En auðvitað verður hver að dæma fyrir sig í alvarlegu málefni að þessu tagi.   

Undanskotin nema hundruðum milljóna

Athugasemdir

[Ásthildur Cesil Þórðardóttir, 13.11.2016 kl. 23:09]

Svo stefnir í Panamastjórn ekki satt?

[Steindór Sigurðsson, 14.11.2016 kl. 04:15]

Það fyndast var að þegar Ísland hrundi, þá hurfu 5.700 milljarðar á einu bretti útúr landinu. Svo fengum við þessa heimsfrægu vinstristjón, sem fór á fullt í að rannsaka bókhald smáverktaka og leigubílstjóra. Steingrími J. datt helst í hug að þeir hefðu framkvæmt þensluna og hrunið. Og enn bólar ekkert á þessum 5.700 milljörðum. Þá bregður núverandi ríkisstjórn á það ráð að fjölga fólki hjá skattrannsóknarstjóra til að rannsaka fólk sem er svo ósvífið að leygja út húsnæði fyrir túrista. Kannski í þeirri von að þar finnist þýfið, en ekkert bólar enn á þessum 5.700 milljörðum.

Þetta er tær snylld.

[Jóhannes Ragnarsson, 14.11.2016 kl. 22:14]

Það verður Panamastjórn, á leikur ekki nokkur vafi.

En hvað um þessa fimmþúsund og sjöhundruð malljarða varð má fjandinn einn vita. Ætli þeir hafi ekki búið til úr þeim vafning og jafning til að éta sjálfir.