Lofsverð prinsippfesta Skagamanna

Það mega Skagamenn eiga, að þeir hafa aldei verið gefnir fyrir opinberan dónaskap og dólgshátt, ekki hvað síst á baðstöðum þeirra. Raunar eru Skagamenn svo siðmenntaðir að þeir eru heldur ekki gefnir fyrir óopinberan dónaskap og dólgshátt og bregðast gjarnan hart við ef þeim þykir eitthvað slíkt í uppsiglingu innan þeirra hreppsmarka. Það var því í fullu samræmi við prinsippfestu Akurnesinga, að vísa kvensniptinni, sem beraði brjóstablygðan sína blygunarlaust á baðstað þeirra á Jaðarsbakka, uppúr lauginni. Og að hin bersynduga kvinna skuli hafi leyft sér að steyta kjaft framaní laugarvörðinn þegar hann skipaði henni að pilla sig í fataleppana og hafa sig á brott af Akranesi.

Einhver mesta frammákona Íslands nú um stundir, fémínísti og sjálfstæðiskona, frú Ingveldur fer ævinlega berbrjósta í sund og enginn þorir segja neitt við hana. Það er siður frú Ingveldar þegar gengur til laugar að leggja leið sína beint í heita pottinn og þar fjarlægir hún neðri umbúðirnar og ,,spærrer ben" eins danskurinn segir, og enginn þorir segja eitt einasta orð nema hvað gamlir lostahrókar eiga það til að humma dálítið og slefa ofaní vatnið.

Svo gerðist það einusinni að laugarvörður, kvenkyns að vísu, bar fram styggðaryrði við frú Ingveldi þar sem hún naut lífsins í heita pottinum, sagði henni að hypja sig í baðföt eða uppúr ella, annars sækti hún lögregluna. Frú Ingveldur stóð hvasst upp í pottinum og seildist til hins kvenkyns laugarvarðar og dróg hana þegar á svartakaf ofaní pottinn og hefði drekkt henni þar eins og nýgotnum hvolpi ef nærstaddir hefðu ekki teikið til sinna ráða og hrifsað hinn dauðvona laugarvörð úr höndum frú Ingveldar. Þennan atburð létu laugarverðir sér að kenningu verða og hafa aldrei síðan vogað sér að blaka við frú Ingveldi allsnakinni í laugunum. 

Berbrjósta vísað upp úr sundlaug

Athugasemdir

[Anna Sigríður Guðmundsdóttir, 16.1.2017 kl. 00:26]

Jóhannes. Sundföt eru það sem talið er af flestum eðlilegur klæðaburður á baðstöðum Íslands.

Ég sá þrjá blikkandi sjúkraflutningabíla keyra að sundlauginni á Ásvöllum í Hafnarfirði seinnipartinn í dag (15. janúar). Mér datt ekki annað í hug en að eitthvað stóralvarlegt slys hefði orðið innan eða utan sundlaugarinnar.

Í kvöldfréttum beggja stöðvanna var ekkert minnst á slysaferðir sjúkrabíla á þessu svæði? Og ekkert um þá sjúkralests-ferð á neinum netfjölmiðlum? Ekki einu sinni á netmiðlum sem þykjast stundum vera bestir og fyrstir með fréttirnar?

Hvað verður í sundlauga-fréttum á morgun, um þetta árásarframköllunarstríðs framhalds-egningarleikrit? Þetta er hættulegur ögrunarleikur fjölmiðlavaldsins.

Ég er háðsins svartasti gálgahúmorsristi í orðum og skrifum á köflum.

En ekki get ég þó á nokkurn hátt séð neinn leyfilegan háðsins svarthúmors leyfilegan siðferðisgrundvöll, í þessu stríðsárásanna þjálfunar-ögrunarleikriti stórhættulegra upplýsingafjölmiðla.

M.b.kv.

[Jóhannes Ragnarsson, 18.1.2017 kl. 20:46]

Ég er sammála því, Anna Sigríður, að fjölmiðlarnir kunna illa að fara með það vald sem þeir hafa. Þeir ráða soldið hverjir lifa og hverjir deyja, hvaða mál séu ríkjandi hverju sinni og hver ekki. Allt er þetta fremur tilviljunarkennt og háð skoðunum og vilja fjölmiðlamanna sjálfra. Það sem verst er, að mínu mati, er að allt of margir fjölmiðlamenn kunna lítið með vald sitt að fara, eru frámunalega, allt að því barnalega, hlutdrægir. Þeir stunda iðulega ámælisverða og vísvitandi ruglandi, sem gerir það að verkum að málefni, stór og smá, verða öll skökk og bjöguð hjá almenningi.