Á meðan Kolbeinn espar framsóknarmenn upp segir frú Ingveldur pass

Erfitt að flýta landsfundi? Hvaða helvítis kjaftæði er þetta í manninum? Þetta er hvort eð er skrautsýning og heilaþvottur og er jafn ómerkileg hvort heldur hún er sett upp fyrr eða síðar. Auk þess er Sjálfstæðisflokkurinn farinn að leggja mest upp úr að friða perverta eins og þeir séu fágæt fuglategund í útrýmingarhættu. Og enginn veit lengur hvaða furðuverk verður næst uppi á borðinu hjá þessum sérkennilegu samtökum, enda er hvur loppan upp á móti annarri þar á bæ og sturlungaöld í algleymingi með tilheyrandi rýtingum og mannorðsvígum.

Nú undir kvöld lét einn helsti hugmyndafræðingur og ráðslagari Sjálfstæðisflokksins, frú Ingveldur, hafa það eftir sér, að hún skilji ekkert í því að hún skuli ekki fyrir löngu vera búin að taka Kolbeins eiginmann sinn Kolbeinsson af lífi. Hún hafi margoft velt fyrir sér hvaða aðferð væri þekkilegust við að murka líftóruna úr þessu óbetranlega skoffíni og hafi margt komið til greina í því sambandi. Síðast í dag hafi Kolbeinn fengið kamarorghestinn Sigmund Dávíð á sinn fund til að spila í honum að fara enn og aftur í framboð! Eftir samtal þeirra þokkapilta hafi Sigmundur hlaupið í einhvern fjölmiðil og hótað framboði og verið með dylgjur út í einhverja ótilgreinda heiðursmenn. Frú Ingveldur segir enn fremur, að Kolbeinn sé hafi komið því inn hjá Sigmundi að hann sé Jónas frá Hriflu endurborinn og drengskömmin hafi upp frá því farið að haga sér eins og viðundur og orðið aðhlátursefni um allt land.

Ekki bætir úr skák að Kolbeinn heim í gærkvöldi eftir sólarhrings óútskýrða fjarveru og leit út eins og illa leikin afturganga. Frú Ingveldi þótti einsýnt, eftir hollingunni á honum að dæma, að karluglan hefði hafnað í pervertahöndum og réttast væri að vaska helvítið upp úr blöndu af vítissóda og klór, maðurinn væri trúlega baneitraður. En í morgun, árla mjög, þegar frú Ingveldur vaknaði, var bóndi hennar búinn að klæða sig í bestu sparifötin sín og orðinn svo annarlegur til augnanna að frú Ingveldur varð hrædd. Svo fór hann hringja í hina og þessa framsóknarmenn og boða suma þeirra á samtalsfundi og espa þá upp í að halda landsfund fyrir Framsóknarmaddömuna nokkrum dögum fyrir kosningar. Það eina sem aftraði frú Ingveldi frá því að skera upp herör gegn eiginmanni sínum í dag og vega hann var illkynja gigt í báðum únliðum, annars hefði hún kyrkt ófétið á staðnum. Enda hvað á Framsókn með að halda landsfund þegar Sjálfstæðisflokkurinn þorir ekki einusinni að leiða hugann að slíkum munaði?

Erfitt að flýta landsfundi