Jóhannes Ragnarsson

16.12.2017 | 19:27

Síðari daga heilagir hassjónistar boða straumhvörf í heilsubótarmálum

Það er ekki seinna vænna fyrir Píratana að skella fram uppáhaldsmálinu sínu, eina málinu sem þeir hafa áhuga á, að landsmönnum verði heimilt að rækta, neyta, selja og kaupa kannabis. Út af fyrir sig er athyglisvert, að til sé stjórnamálflokkur með hugsjón á Alþingi Íslendinga, en það er dálítið meira en hægt er að segja um hina þingflokkana, sem eru meira fyrir hefðbundið nudd og nag og hrossakaup sín á milli, allt í mestu rólegheitum. En Píratar eru menn að meiri að hafa þó eitt mál og eina hugsjón að berjast fyrir, reyndar af fullkomnu heilalausu ofstæki og án þess að skilja þá einföldu staðreynd, að hass gerir menn heimska. Þetta er farið að vera eins og hjá ungum sjálfstæðisflokksmönnum, sem ætla að efla frelsið og andlega heislu Íslendinga með því að selja brennivín í matvörubúðum og fataverslunum

Og nú hafa þingmenn Pírata gert sér hægt um vik, í miðri frárlagaumræðunni, og lagt fram þingsályktunartillögu um senda gjörvalla íslensku þjóðina á eitt grængolandi hass- og marihuanafyllirí, - í lækningaskyni að sjálfsögðu. Það er augljóst, að þessi kyndugi eiturlyfjaflokkur, hefir fundið hina endanlegu lausn við öllum sjúkdómum allt frá dálitlu kvefi til hroðalegustu tegunda af krabbameinum og svartadauða. Samkvæmt Pírötum verða þessir venjulegu læknar, ásamt sjúkrahúsum, heilsugæslustöðvum og hjúkrunarkvendum, að mestu úr sögunni, ef Alþingi fer að trúarsannfæringu þeirra og smíðar lagafrumvarp um hassnautn. Það sér hver maður, að það væri aunginn smáræðis búhnykkur fyrir ríkissjóð, ef útgjöld úr þeim sjóði til heilbrigismála færu niður í 2-3% af þeim útgjöldum sem varið er til þessa leiðinlega málaflokks.

Svo skal ekki gleyma bónusinum sem fylgir hinum óbrigðulu hasslækningum, en þar er að sjálfsögðu átt við blessaða vímuna, sem lækningameðalið framkallar í hugum landsmanna og gjörir þá undurglaða og friðsama. Þannig má með sanni segja, að gjöri allir alþingismenn trúmálaofstæki Pírata að sinni trú eru sannlega bjartir dagar framundan á Íslandi, sjúkdómalausir, skakkir og stónd og önnur vandamál væru að mestu úr sögunni. Hin fullkomnu rök Pírata fyrir trúarhita sínum í hasstrúnni, er að þeir hafa fundið út, með óyggjandi rökum, að ef Íslendingar hefðu haft ,,lyfjahamp" til að éta og reykja á átjándu öldinni hefði aunginn maður hér á landi drepist úr stórubólu eða fallið í valinn vegna Móðuharðindanna, en þessi vandræði lögðu hátt í helming landsmanna í gröfina. En því miður hefðu Íslendingar ekki hvorki átt né mátt eiga hass eður marihuana í þá daga sér til gottgjörelsis, lækninga og almennrar heilsuhreytsti og því fór sem fór. Við þetta má bæta, að Píratar eru í þann veginn að koma sér upp húsnæði til helgihalds í anda síðari daga heilagra hassjónalista.