Þetta er alvarlegt utanríkismál

Já, strákagreyin voru á hnjánum, eða öllu heldur á rassgatinu; svei mér ef þeir vóru ekki á því eins og rússneskir flugstjórar. Og því fór sem fór. En Króatarnir, þessir orðlögðu reykigamenn, þeir þurftu varla að taka rettuna úr munnvikinu til að flengja veslings Íslendingana. Svo voru dómararnir eins og þeir voru, hlutdrægir og spilltir og eins og venjulega og á móti lítilmagnanum. Og við höfum aungin ráð við þessum ósóma og óréttlæti. Eða hvað?

Nú er svo komið fyrir íslenska handboltalandsliðinu að ekki tekur einusinni að reka þjálfarann, það er sjálfsagt sama hver reynir að stjórna þessum lundaböggum. Úrslitin hefðu ekki verið skammarlegri þó leikmenn Íslands hefðu allir verið dregnir út af dvalarheimili öldunga og meðalaldur liðsins hefði verið um það bil 83,5 ár. Þá var nú annað lag á Króötum, þeir fengu sér allir kaffi og sígó í hálfleik, þrjá sígarettur pr. mann í hálfleikshléinu. En í stað þess að vera lamaðir af nikótíni þá tóku þessi villimenni öll völd á vellinum og skutu Ísland á augabragði í hel og það varð að hjálpa íslensku leikmönnunum til að rata inn í búningsherbergin að leik loknum af því þeir voru svo vankaðir eftir útreiðina.

Næsta vers er svo að kalla íslenska hanboltalandsliðið heim og svipta þjálfarann ríkisborgararétti og banna honum allan aðgang að landinu okkar. Já. Það þýðir ekkert annað taka á sona skammarlegu máli með einhverjum silkihöndum. Við segjum þeim eins og er, að nú sé málið í okkar höndum og að það séu aungvar ekkisens kvenmannshendur. So á utanríkisráðherra, ef so einkennilega vill til að einhver manndómur leynist með þeim náunga, að slíta stjórnmálasambandi við Króatíu strax í fyrramálið. Ef utanríkisráðherra þorir ekki sjálfur, þá ætti hann að geta falið Steingrími og Vondulyktinni málið, því það eru drengir sem hika ekki við að slíta stjórnmálasamböndum við aðrar þjóðir og hóta þeim dálitlum stríðsátökum í leiðinni. Í það minnsta láturm við ekki skítaþjóðir svívirða oss opinberlega orðalaust. 

Króatar stungu af í seinni hálfleik