Uppskafningar ætla sér að eiga ,,samtal" um ,,kerfisbreytingar" í 101

Það er ekki nema rétt mátulegt á VG að sitja uppi með hana Líf þessa í efsta sæti hjá sér. Enn betra hefi samt verið fyrir VG að hafa Sóley Tomm Fílí Romm Bomm Bomm í efsta. En því miður er Sóley hrokkin úr skaptinu og fréttist síðast af þeim virðulega kvenkosti, að hún hefði glutrast niður á milli skips og bryggju einhversstaðar í fjáranum. VG er sosem vel sett með Líf; hún er alveg ekta 101 ráðaleysingi, sem hefir passar undurvel við niðurtúr Reykjavíkur á umliðnum árum.

Ekki er að efast um að Líf mun, ekki síður en allir hinir 101 frambjóðendurnir, hafa nauðsynlegustu frasana á hraðbergi. Ef að líkum lætur, má vel ímynda sér, að hún segi ,,samtal" í að minnsta kosti einusinni að meðaltali í hverri setningu, og fyrir utan að ,,leiða" skrípið VG, þá er eins víst að Líf lýsi því yfir á hjartnæman hátt, að VG skrípið hyggi á ,,kefisbreytingar" og ætli sér að vera ,,kerfisbreytingaflokkur." Þetta verður sem sé mikið ,,samtal" um ,,kefisbreytingar."

Svo eru aðrir, sem segjast vera búnir að fá sig fullsadda af þessu andskotans 101-samtali, gáfumannatali, pólitískri úrkynjun, sýndarmennskunni, tilgerðinni og öðrum andlegum uppskafningshætti, sem eigi ætt sína og óðal í hlandblautum rennusteininum í Austurstræti. Þessi ömurlegi afkáraskapur sé búinn að eyðileggja alla pólitík í landinu og alla pólitíska flokka með yfirlæti sínu og háskólamenntaðri heimsku. Úr því sem komið er, þá mun varla vanþörf á að skrubba alla Kvosina, frá Þingholtum suður á Mela og vestur á Seltjarnarnes, upp úr vítissóda, salmíaksspíritusi og klósetthreinsilút, og linna ekki látum fyrr en öllum aðvaldskratabaktéríum og krataeðli hefir verið sópað langt á haf út. Úti í hafsauga er góður staður fyrir Líf, Dag, Eyþór og hina leiðinlegu stagkálfana að leika sér að ,,samtölum" og ,,kerfisbreytingum."

Líf vill leiða VG í Reykjavík