Stjörnusýslumaðurinn handsamaði strokumanninn sjálfur og lagði hann í járn

Það var stjörnusýslumaðurinn Stones, í eigin persónu, sem handtók delinkventinn Sindra Þór með eigin hendi í Amsturdammi í dag. Í fyrrinótt dreymdi stjörnusýslumanninn hvar Stroku-Sindra væri að finna og fór stjörnusýslumaðurinn nákvæmlega eftir vísbendingum draumsins. Hr Stones sá svo fantinn álengdar á breigötu þar í Amstudammi í dag, hljóp hann uppi og lagði hann í járn eftir dálítið tusk, því Sindri Þór var ósamvinnuþýður og reyndi meðal annars að reka stjörnusýslumanninum á kjaftinn, en sá síðarnefndi vék sér undan árásinni og tók hinn illvíga dólg þeim tökum sem til dugðu.

Á sínum tíma strauk fanginn Jón Hreggviðsson frá Rein úr varðhaldi skömmur áður en átti að höggva hann. Jón þessi komst á hollenska duggu og strauk til Hollands, rétt eins og Sindri Þór liðlega þrjúhundruð árum síðar, og gátu yfirvöld á Íslandi og Danmörku ekkert að gert og valsaði Jón um Holland og víðar í Evrópu uns hann birtist aftur á Íslandi með bréf frá kónginum upp á að taka ætti mál hans fyrir að nýju. Í þá daga hefði landsins herrum ekki veitt af að hafa innan sinna vébanda ofurmenni á borð við stjörnusýslumanninn Stones, sem dreymt hafði til Jóns Hreggviðssonar og siglt utan með hraði og gripið hinn dæmda snærisþjóf og böðulsmorðingja glóðvogan á götu í Amsturdammi eða Rotterdammi.

Nú má þess vegna vel vera, að Sindri strokumaður dragi upp úr pússi sínu einhver skilríki, undirrituð af evrópskum kóngi eða drottningu, hvar af megi ráða að hann sé saklaus af þeim grunsemdum sem íslenskir stjörnusýslumenn og undirsátar þeirra hafa borið á hann. Og ekki verður strokumaðurinn dæmdur á höggstokkinn, því slík refsing var afnumin á Íslandi fyrir einum níutíu árum, eða svo. Þannig að í augnablikinu er vandséð hvað stjörnusýslumenn vorir geta gert við þennan óþekktarorm. Bara að allt þetta umstang leiði ekki til þess að yfirvöldin í þessu okkar landi verði ekki sett af fyrir embættisafglöp í máli Sindra Þórs, þar með talin sjálfur dómsmálaráðherrann og stjörnusýslumaðurinn frækni, ja, nema stjörnusýslumaðurinn verði náðaður, áður en honum verður steypt í svartholið, og síðan sæmdur þvagleggsorðunni í kjölfarið fyrir dæmalaust vel unnin störf.

Meðfylgjandi myndir eru af lágvöxnum manni í lúðrasveitarbúningi.

Sindri Þór handtekinn í Amsterdam