En braggaskítinn geta þau ekki þvegið af sér

Nú þykir graspírötum mál til komið að reyna að rýna út úr kannabismökknum og gera tilraun til að þvo helvískan braggaskítinn af sér. Vissulega hefir heldur fallið á jómfrúrástand Pírata upp á síðkastið og meyjarhaftið er við það að bresta. Og ekki hefir óþrifnaðurinn af braggaskrattanum, Samfylkingunni og Viðreisnarauðvaldinu fríkkað Píratann og föt hans eru út ötuð, rétt eins og hann hafi marg-marg-gert í sig og velt sé margar reisur upp og ofan hólinn til að klístrunin verði sem algerðust. Aumingja blessuð börnin eru alveg komin á botninn og fátt lengur í spilunum en að láta sig hverfa fyrir fullt og allt áður en enn meiri skaði hefir hellst yfir.

Því miður er staðan sú, að alveg er sam hvað graspírataungar krefjast mikilla svara, Pírataflokkurinn er allur jafn dauðasekur af braggaglæpnum og hinir illskiljanlegu prelátar Samfylkingarinnar, að ekki sé nú talað um undanrennurnar, sem VG hefir skaffað í borgarstjórn. Þá er rétt að minnast örlítið á hve Píratasöfnuðurinn er í reynd líkur helstu öfgaöflum og sprelligosum Framsóknarflokks og Miðflokks; svei mér ef það er ekki jafn mikil fjóshaugslykt af Píratarössunum og húskörlum og griðkum úr flórnum Framsóknarfjóssins hjá gömlu Framsóknarmaddömunni.

En þó svipar Pírötum mest til höfðingjanna á Höfuðbólinu, Sjálfstæðisflokknum, og þá einkum þeirra er sitja í leikskóladeild Sjálfstæðisflokksins, Heimdalli. Enginn sjáanlegur munur er á Pírata og Heimdellingi, ef maður mætir þeim á götu, en ef betur er að gáð, þá má gera ráð fyrir að annar þeirra sé ofurlítið skakkur en hinn soldið fullur og í hvítri skyrtu og bindi. Að öðru leyti eru þeir alveg eins og útilokað fyrir nema fyrir mjög glögga menn að þekkja þá í sundur. Mestum samhljóm ná þessir fjósadrengir í málum sem snerta sprúttsala, en slíka sala til alkohols og hassissí vilja Píratar og Heimdellingar fyrir alla muni frelsa, svo þeir geti grætt bæði á daginn og á kvöldin og greitt skatta til samfélagsins eins og góðum fjármála- og viðskiptajöfrum sæmir. 

Grasrót Pírata krefst svara

Athugasemdir

[Helgi Þór Gunnarsson, 14.10.2018 kl. 12:32]

Sæll Jóhannes, Já þau sem reyna að stjórna geta ekki þvegið skítinn af sér! Og verst er að þetta gerist sí og æ bæði hjá ríki og borg!

kær kveðja frá Eyjum.

[Jón Páll Garðarsson, 14.10.2018 kl. 15:43]

Helvíti er það dapurt er afdankaðir hippar sem fóru yfir um á sýru reyna sí og æ að saka aðra um eiturlyfjanotkun.

[Jóhannes Ragnarsson, 14.10.2018 kl. 16:55]

Satt segir þú Jón Páll, þetta er alveg hræðilegt.