Mikill baráttuandi þegar VG gerðist eldrauður verkalýðsflokkur í klukkutíma

Já, þetta kvað hafa verið ósköp álappalegur fundur, mjög í ætt við falska nótu eða óviðeigandi tón. Nú, til fundarins var boðað af Svavarsfjölskyldunni, Steingrími, Álfheiði og fleiri Samherjum til að freista þess að stela ,,nýju verkalýðsforustunni" af Sósíalistaflokki Íslands og láta heimskann lýðinn trúa því að VG sé heilmikill verkalýðsflokkur og hafi alltaf verið. Ekki var látið við sitja að boða ,,nýju verkalýðshreyfinguna" til skrafs og ráðagerða, heldur var og Ögmundur Jónasson, Samherji Steingríms og þeirra, rekinn fram úr og dregin á borgarastéttareyrunum á fundarstað til að vera fundarstjóri.

Svo hófst stéttarbaráttuhátíð VG á því að fyrrum félagi í VG sýndi glærur, en umræddur fyrrum félagi hljópst undan merkjum hjá Ögmundi frænda sínum og Steingrími og bar fyrir sig á flóttanum að hún væri orðin leið á að éta skít úr jötunni hjá VG. Þar næst steig á stokk eflingarformaður nokkur með femmutremma, en eflingarformaðurinn atarna er líka fyrrum Samherji VG-haukanna og fékk á sínum tíma að leiða forkonurnar á Tjarnarbakkanum á sunnudögum. En þrátt fyrir femmutremmann náði eflingarforinginn að tala dálítið um sjálfa sig og eitthvað um konur sem eiga alltaf að vera sætar og þægilegar í viðmóti í vinnunni; so minntist hún smávegis á sósíalisma í leiðinni, en það orð, sósíalismi, er heimamönnum í VG gjörsamlega ókunnugt og framandi, enda líður þeim mun betur með fjárglæframönnum við rúllettuhjól kapítalismans en innan um vinnulúnar hendur alvöru sósíalista.

En það var ekki öllu lokið: Næst sveimaði í ræðustól gegnsær gufuhnoðri, sem kynntur var til sögunnar sem formaður BSRB. Etthvað myndaðist þessi vofa til að tala, en sú ræða fór öll fyrir ofan garð og neðan og fundargestir tóku ekki einusinni eftir því þegar fyrirburðurinn hvarf úr ræðustól. Að lokum klöngraðist sjálfur forsætisráðherra upp í ræðustólinn, gluggaskrautið mikla, og lagði áherslu á álíka gufuþrugl og BSRB vofan. Þegar forsætisráðherra hafði lokið sínum bragðdaufa undanrennusöng, tók hún til fótanna, lagði á flótta, eins og hún væri komin með skyndikveisu og væri við að gera í buxurnar. En fundarstjóri bar fram ótrúverðuga afsökun á flóttanum fyrir hönd forsætisráðherrans, sagði forsætisráðherra önnum kafin og hefði ekki lengri tíma aflögu til að berjast með verkalýðnum. Svo liðaðist stéttarbaráttufundur VG í sundur og varð að því núlli og nixi sem hinn hægrisinnaði sértrúarsöfnuður Steingríms Samherja og Gluggaskrautsins er í raun og veru.

Stödd í „grafalvarlegum stéttaátökum“