Hálfdán varðstjóri hefir aldregi verið kærður fyrir blygðunarbrot

Ja, ekki hefir hann Hálfdán varðstjóri verið sektaður fyrir hórdóm og ekki heldur fyrir að berja aðra lögregluþjónar. En þó lítið sé um kærur á Hálfdán er ekki þar með sagt að hann hafi ekki fitlað dulítið við fyrr áminsta glæpi. Sem kunnugt er hefir nokkrum kviksögum farið af meðferð einstaklinga sem Hálfdán hefir handtekið og lokað inni, en af þeim sögusögnum má ráða að varðstjórinn er ekkert lamb að leika við og virði blygðan þeirra sem hann handtekur ekki nema rétt í meðallagi eða jafnvel ekki neitt.

Þá er ekki annað sýnt en Háldán hafi á stundum lúbarið lögregluþjóna sem undir honum hafa verið. Eitt sinn kom maður nokkur á lögreglustöðina og kvaðst hafa séð í það sinn þrjá lögregluþjóna, þar af var ein kona í búningi, í öngviti á gólfinu en Hálfdán varðstjóri sat í sínum varðstjórastól og reykti vindil og hafði áfengi í glasi á borðinu fyrir framan sig. Og sumum þykir afar notalegt að rifja upp þegar þeir urðu vitni að því að lögreglustjórinn í Reykjavík rétt komst undan Háldáni á flótta með því að stökkva út um glugga á annarri hæð og lenti niðrí einhverju déskotans sorpporti innan um lík af önduðum hundum og köttum, sem lögregluembættið hafði tekið af lífi.

Svo sátu nokkrir lögregluþjónar, gerðir út af dómsmálaráðherra, fyrir Hálfdáni varðstjóra þegar hann kom út af hóruhúsi nokkru á höfuðborgarsvæðinu. Þeir stukku einir sex fram eins og skógarþrestir og flugu á Hálfdán, en hann hlóð þeim öllum á augabragði, traðkaði síðan óþyrmilega á þeim áður en hann barði hvern og einn þeirra einslega og dustaði úr þeim rykið. Og melludrottningin, sem sá átökin út um gluggann sinn, hringdi á lögregluna og bað hana að fjarlægja nokkra rotaða slagsmálahunda, sem hefðu verið að slást úti á götu. En þegar önnur bylgja lögregluþjóna mætti á staðinn var Hálfdán varðstjóri löngu farinn leiðar sinnar.

Sektaður vegna vændiskaupa