Jóhannes Ragnarsson

21.1.2019 | 08:03

Stengrímur reisir gálga á Öxarárbökkum

Þessu gæti ég best trúað. SteingrímurJ. er hinn versti maður og tilbúinn að hneppa hvurn mann í fangelsi, nema Samherja sína í borgarastéttinni, til að svala hefndarþorsta sínum og kvalalosta. Nú ræðst þetta félega illmenni á Sigmund Davíð og ætlar að leiða hann fyrir siðanefnd sem á auðvitað að dæma Sigmund í gálgann; Stengrímur er víst þegar byrjaður að láta reisa gálga á Þingvöllum til að embætta Sigmund og klausturfélaga hans, og hefir ráðið frænda Svavars Sendiherra, alræmdan fúskara, til að sjá um verkið og rukka ríkissjóð fyrir það.

Sýnist oss nú, sem Sigmundi séu allar bjargir bannaðar, hann fái sinn dóm, sem verður þess eðlis að honum verður aldrei áfríað og enn síður aftur tekinn. Úr því sem komið er, er aðeins spurning hvur verði böðullinn. Því miður eru þeir frægu böðlar, Sigurður Snorrason og Guðmundur fjósarauður báðir fallnir fyrir ætternisstapa fyrir nokkru, svo þeir verða ekki að nokkru liði við gálgann á Þingvöllum að þessu sinni. Enginn efast þó um að Stengrímur þingforseti hafi ekki eitthvert rakið illþýði tagltækt þegar stundin rennur upp á bökkum Öxarár til að granda nær gjörvöllum þingflokki Sigmundar Davíðs.

Þegar Sigmundur og hans hyski er frá vaknar spurningin um hvárt hefnadarþorsta og kvalalosta Stengríms verði þá fullnægt að öllu leyti, eða hvárt hann muni þá fyrst gefast ófremdarhvötum sínum á vald og hefja galdraofsóknir og nornaveiðar fyrir alvöru. Hann á marga óvini, veslings, blessaður þingforsetinn, og suma vonda, sem ætíð eru boðnir og búnir að siga á hann grimmum rökkum. Sem betur fer þá á Stengrímur enn búrtíkur við hirð sína, þó heldur hafi þeim fækkað upp á síðkastið; meðal annars gekk hans grimmasta og vítenntasta búrtíkin, Björn Valur, úr vistinni með heitingum á vör þess efnis, að hann muni aldregi bíta eitt einasta bit fyrir Stengrím Sikkússon meir.