Og veitti þjálfaranum líkamsárás sem endaði í hlandforinni

Þeir eru sniðugir Makedonnarnir: Ekki voru íslensku handboltastamparnir fyrr komir til Makedóníu ekið var sem leið liggur á búgarð nokkurn og þeim boðin gisting í svínastíu og fjárhúsi. Og eins og kurteisir sunnudagaskóladrengir þáðu þeir gistinguna og skrifaði Gvöndur Þórður þjálfari undir samning þar að lútandi. Fyrstu nóttina fengu þeir er gistu svínastíuna að kenna á því; elsti og stærsti gölturinn kom heim um miðja nótt og lét ófriðlega, var áberandi drukkinn og ósamstarfsfús og hótaði öllu illu. Loks var geltinum komið fyrir milli nýju markvarðanna og varð það kapítuli út af fyrir sig, eins og vænta mátti.

Ekki fer betur um þá er fá að hírast í fjárhúsinu. Fyrir utan sífelldan umgang útlenskra sauðkinda, kollótra, eyrnatórra og með skott í stað dindils, þá er reimt í fjárhúsinu; sem sé ósvikinn draugagangur af verra taginu. Enda kom fljótlega upp úr dúrnum, að í þessum fjárhúsum var fjöldi manns myrtur í Hitlersstríðinu, auk þess sem tjéð fjárhús hafa í áratugi þjónað þörfum sjálfsmorðingja, sem gjarna hafa hengt sig í sperrunum yfir jötunum, elligar skotið sig undir grindum. Hafa handboltadrengirnir okkar, alsaklausir og óvanir ásknum drauga, mátt hafa sig alla við með að halda sönsum. Ekki batnaði ástandið þegar einn af þessum kollóttu hrútum gerði sér lítið fyrir og veitti Gvöndi Þórði líkamsárás í afbrýðissemiskasti með því að hlaupa aftan að honum og stanga hann, þegar minnst vaðri, í gumpinn og hafnaði Gvöndur niður í forarræsi framan við fjárhúsið.

Í ljósi alls þessa er borðleggjandi og bókað að íslenska handknattleikslandsliðið mun skíttapa annað kveld fyrir Makedónum með ótrúlega miklum markamun; talað hefir verið um sjötíu til áttatíu marka mun, t.d. 92-5 eða þaðan af meira. Fjölmiðlar í Makedóníu sinna aðbúnaði íslenska landsliðsins auðvitað ekki neitt, en þegar drengirnir verða farnir heim, meira og minna ærðir eftir dvölina að ósvífnum og illum gestgjöfum, munu blöðin og sjónvörpin fara á fullt og gera stólpagrín af piltunum og Gvöndi Þórði þjálfara og tíunda og lofa ó hástert framgöngu hrútsins sem stangaði hann úr í hlandforina við fjárhúsið. Það eru ekki allar ferðir til fjár, en drengirnir verða reynslunni ríkari. Það held ég nú. 

Óboðlegt hótel beið strákanna