Falleg mynd af hjónum og syni þeirra lítilfjörlegum

Hann er ekki svo lítill hjónasvipurinn með þeim Katrínu og Bjarnaben, enda bæði af rótgrónum borgaraættum. Og á bak við þau gefur svo að líta son þeirra lítilfjörlegan, spilltan af vondu uppeldi. Öll voru þau, aumingjarnir svornu, að læra sér til í hagfræði, sem er háborgaraleg innrætingartugga, því nú ætlar ríkisstjórnin að setja upp leiktjöld, sem bera yfirskriftina ,,velsældarhagkerfi", og kvað samkvæmt heimildum vera ágætt ópíum fyrir fólkið, einkum grunnhyggið og trúgjarnt fólk.

Til er fræg ritgerð eftir Þórberg Þórðarson, sem heitir ,,Heimspeki eymdarinnar", en ,,velsældarhagkerfi" auðvaldstjórnarinnar á Íslandi, er áreiðanlega af sama meiði og umrædd heimspeki. Þá er ekki heldur úr vegi að hrósa óaðfinnanlegum fatasmekk Katrínar, Bjarnaben og sonarins; öll eru þau í helbláum lörfum, og auðvaldspestin bókstaflega ljómar og neistar af herlegheitunum. Mikið óskaplega er nú Íhaldið, og auðvaldsstofnanir þess, heppið að eiga jafn glæsilegar glimmer-spírur til að sjá um auðvaldslygar og auðvaldssjónhverfingar og aðra tilheyrandi spillingu í stjórnsýslunni.

Í morgun greip frú Ingveldur illræðismann nokkurn glóðvolgan á lóð sinni að húsabaki. Þennan paura telur frú Ingveldur annaðhvort flugumann ríxlögreglustjóra elligar vikapilt Engeyinga; en sem kunnugt er geysar borgarastyrjöld innan Sjálfstæðisflokksin og eru víst öll meðöl notuð í því sturlungaati. Að vonum varð heldur lítið úr senditík stríðandi fylkinga í höndunum á frú Ingveldi, því við sjálft lá að hún tæki mannfjandann af lífi. Þegar hún hafði danglað nokkrum sinnum hér og hvar í dólginn og kreist henn eins og tannkermstúbu svo allt innvortis hljóp í buxurnar, þá dró hún grey kvikindið eftir sér inn í hús og seldi hann þar í höndur Kolbeins eiginmanns síns og Brynjars Vondulyktar, sem báðir eru enn fullir, en þeir tóku fagnandi við dýrinu dauðamóða og héldu áfram þar er frá var horfið hjá frú Ingveldi að gjöra gælur við pilt, honum til andlegrar uppbyggingar.  

Þurfi að líta á aðra þætti en hagvöxt