Síra Baldvin mun líklega bannfæra bysskubbana áður en lang um líður

Síra Baldvin, sem er sannheilagur kennimaður, segist hafa orðið steini lostinn þegar hann frétti af afgreiðslu bysskubbanna á áreitis- og siðferðisbrotum eins af kirkjunnar þjónum. Sjálfur hafði síra Baldvin ekki látið nægja að harma axarsköft prestsins, heldur bannfærði hann drjólann við heilaga messu í höfuðmusteri sínu. Enn er óráðið hvernig síra Baldvin mun taka á yfirlýsingu bysskubbana, en líklegt er að hann geri sér lítið fyrir og bannfæri bysskubbana alla í einni kös og lýsi því fjálglega yfir að umræddir kirkjuhöfðingjar séu hvorki kirkjuhæfir né kirkjugræfir.

Sem kunnugt er hefir síra Baldvin beitt bannfæringu í prófastsdæmi sínu frá fyrsta degi með góðum árangri. Samtals hefi hann, frá upphafi, bannfært eitthundrað fjörutíu og fjórar vanmetasálir. Af þessum hundrað fjörutíu og fjórum er nú átján andaðir án þess að leita fyrirgefningar, aflausnar og upptöku í guðskristinn söfnuð og munu þeirra forhertu sálir hafa verið afhentar Djöflinum til eilífrar píningar í eldi og brennisteini Helvítis. Líkamir umræddra ólánsgemlinga vóru dysjaðar uppi á fjalli í gömlum mógröfum og gengið þannig frá að hvorki vargur né hundar geti gert sér gott af hræunum.

Nokkrir hinna bannfærðu hafa komið skríðandi á knjánum fyrir síra Baldvin og játað syndir sínar og beðið Guð og menn innvirðulegrar fyrirgefningar. Af þessum skríðandi veitti Drottinn viðtöku öllum þeim, nema einum, sem síra Baldvin laust með hnefa sínum og varð óþokkinn samstundis af saltstólpa, hans syndir vóru svo viðbjóðslegar. Aftur á móti hefir síra Baldvin veitt fáeinum pervertistum aflausn með því að vana þá og gjöra fráhverfa losta og girnd með bæn og handayfirlagningu; hafa umræddir öfuguggar, sem óru vel að merkja af báðum kynjum, reikað um síðan eins og rennblautar fatadruslur og minnt um margt á villuráfandi illa anda úr öðrum heimi. 

Biskupar harma brot séra Ólafs