Snati Djöfull Gúgúdóttir

Þetta líkar mér. Þá fyrst verður gaman að lifa þegar mannanöfn á Íslandi verða orðin ein allsherjar grængolandi fávitasamkoma og börn vera skírð hundsnöfnum og djöfla; þessu höfum vér lengi beðið eftir. Og þegar geggjaði pokapresturinn hefir ausið barnungann vatni og skírt hann Snata Djöful Lúsífer, bjóða foreldrarnir nærstöddum upp á sterkt alkóhólískt brugg frá vefversluninni Kúkurogkaníll og landa frá ölgerðinni Axlar-Birni ehf. Það er margt gott í farvatninu hjá Hæmdallsæskunni í Sjálfstæðisflokknum og bráðum ætla þeir þar í flokk að stofna sér einhverskonar nasíperrafélag um fullveldi eða fyllikallaveldi.

Það gefur augaleið að eitthvað stendur til þegar ráðherranefnur Flokksins fara fram með mannanafna- og sprúttfrelsi. Soleiðis tilfæringar vita á svæsið hneykslismál innan Flokksins, svo stórbrotið að Flokkurinn muni riða til falls og falla í eina rjúkandi rúst, ef ekkert verður að gert. Þegar svo er komið er ágætt vera búið að henda út fáránlegum vitleysismálum í örvæntingarfullri von um að rykið sem það þyrlar upp fylli glyrnur kjósendanna og blindi þá svo að þeir viti ekki sitt rjúkandi ráð.

Sennilegt er, að einhverjir hroðalegir glæpir séu rétt við að sannast á Flokkinn og að bráðlega muni Helgi Seljan standa hróðugur höfuðsvörðum hans. Í þeirri voðalegu stöðu er ekki ónýtt að hafa spræka krakkadela úr Heimdalli til að drepa málum á dreif og rugla umræðuna um glæpaverk Flokksins þannig að glæpirnir renni ljúflega niðrum kokið ákjósendaskjátunum. 

Reglur um mannanöfn rýmkaðar

Athugasemdir

[Þorsteinn Siglaugsson, 29.11.2019 kl. 21:36]

Það er langskynsamlegast að leyfa bara sem fæst nöfn, og helst bara gamalreynd og þjóðleg nöfn. Í rauninni þurfum við ekki fleiri nöfn en svo að það verði ekki öllum ruglað saman. Eitt nafn er of lítið, því þá heita allir það sama og verður sífellt ruglað saman, og það er óhagkvæmt fyrir samfélagið. Þúsund nöfn eru óþarflega mikið og þá fara líka að slæðast með allskonar ónefni. Myndi halda að svona kannski 50 til 100 nöfn væru nóg. Legg til að skipuð verði nefnd um þetta. Hún gæti heitið Nafnafjöldanefnd.

[Jóhannes Ragnarsson, 29.11.2019 kl. 21:51]

Þetta er flókið vandamál.

[Þorsteinn Siglaugsson, 30.11.2019 kl. 00:21]

Já, og hentugt fyrir flokkinn. Nafnið Seljan verður til dæmis bannað, enda með eindæmum asnalegt nafn og engir nema Allaballar sem heita þannig lagað.

[Jóhannes Ragnarsson, 30.11.2019 kl. 19:42]

Þú segir nokkuð Þorsteinn. Þá myndi líka verða að banna ,,Seljahverfið" í Breiðholti, ásamt öllum Seljavöllum og Selhólum.

[Þorsteinn Siglaugsson, 3.12.2019 kl. 16:36]

Selja þetta allt, og Helga með!