Hann er spámaður karlinn og sérfræðingur í Guðnasögum

Það er viðbúið að Gúndi sé sannspár um úrslitin, hann er úr hófi fram spámannlega vaxinn og góður söngmaður og sérfræðingur í Guðnasögum. Hans fyrsta verk á Bessastöðum verður eflaust að rogast með kross upp á Bessastaðakirkju og koma honum fyrir uppi á turninum. Þið ráðið hvort þið trúið því, en Gúndi hefir nú þegar smíðað jargansmikinn kross úr harðviði, sem lýsa mun upp allt höfuðborgarsvæðið í skammdeginu, til blessunar guðskristni í landinu.

En þetta krossleysi á kirkjunni á Bessastöðum er mjög dularfullt mál. Aunginn veit hvunær krossinn hvarf af turninum og aunginn virðist vita hvar hann er niðurkominn. Sumir ætla að núverandi forseti sé múhámeðstrúarmaður á laun og hafi í skjóli nætur fjarlægt krossinn og gjört Bessastaðakirkju að Bessastaðamosku, sona eins og þegar óforsjáll kotbóndi breytir fjósinu sínu í hesthús. Aðrir segja að Bessastaðabóndinn hafi gjört kirkjuna að kartöflugeymslu, en sem kunnugt er, þá er óþarfi að hafa kross á þessháttar húsi.

Nú, Gúndamenn eru ágætir sagnaþulir og þeir hafa mælt af munni fram þau tíðendi, að nú hafi Guðni látið endurreisa Þrælakistuna, sem eitt sinn var prýði Bessastaða, og grafa út svartholið góða, hvar Jón okkar Hreggviðsson var geymdur meðan hann beið hálshöggs. Þá ku særingameistari, útlenskur, verið fenginn á Bessastaði til að vekja þar upp þjóðlega reimleika. Tókst sú aðgerð vel og sátu draugar klofvega á þekju forsetabústaðarins frá því um lönguföstu og fram að sauðburði, en þá hættu draugarnir skyndilega að ríða húsum og gengu í sveit með Gúnda og hafa fylgt honum síðan við atkvæðaleit um landið þvert og endilangt.

„Ég hugsa að þetta fari 53 – 47“