Hvað eftir annað hafa þær mátt undirgangast áfallahjálp eftir aðför þjálfarans

Þá eru þeir búnir að stampa hinum andfémíníska fanti sem þeir réðu til að þjálfa kvennalandsliðið í knattspyrnu. Af fréttum að dæma var hinn brottrekni mesta fól og illur við vín. Til marks um vonsku og kvenfyrirlitningu þjálfarans eru óbótaskammir, sem hann orgaði eins og naut yfir blessaðar litlu dollý-telpurnar svo að sálirnar þeirra hlupu í hnút, svo alvarlega, að þær hafa mátt undirgangast áfallahjálp hvað eftir annað eftir aðför þjálfarans að þeim í drykkjuhófi.

Sem stendur höfum vér Íslendingar engan landsliðsþjálfara, hvorki í flokki karla né kvenna. En vér þurfum samt ekki að örvænta, elsku vinir, því brátt verður Lars okkar Lagerbakur gjörður að þjálfara karlalandsliðsins og hann mun og taka að sér þjálfun kvennalandsliðsins í hjáverkum. Trúlega verða telpurnar okkar frumur óánægðar með að fá Lars, því þær vilja þjálfa sig sjálfar og velja sjálfar í landsliðið og stilla sjálfar upp byrjunarliði sínu. En agi verður að vera og telpurnar vera að undirgangast karllæga þjálfun, sem miðar sennilega að því að gera þær að körlum.

Aðalmálið er auðvitað, að tekist hefir að snúa hinn andfémíníska og drykkjuilla hrotta niður og flæma hann á brott frá hinum viðkvæmu boltatelpum, þannig að hann verður að beina óbótaskömmum sínum og dónaskap að einhverjum öðrum en þeim þegar hann dettur í það næst. Svona karlar eins og hann hefðu kannski verið brúklegir á síðutogara og vertíðarbáta fyrir hálfri öld en að hafa hann innan um telpugrey árið 2020 er auðvitað alger firra. Þó skal reikna þjálfaranum til málsbóta, að úrslitadrykkjuhófið var úti í Ungverjalandi og má telja víst, að hið görótta ungverska brennivín og hinn lævísi ungverski andi hafi haft sitt að segja þegar hann ákvað að freta skammar- fólskuhryglunum framan í den lille pige.   

KSÍ staðfestir brotthvarf landsliðsþjálfarans