Poletiskar hýenur, hælbítar og 500 þúsundkrónu sekt per haus

Í gær og dag, aðfangadag og jóladag, hafa hinar poletisku hýenur í 101. Reykjavík sungið jólasálmana sína af fágætri heift og hatri, en þó umfram allt vellandi skinhelgi, út af því að Bjarniben hafði farið, eða varla farið, í heimsókn til kunningjafólks síns á þolláksmessu. Grimmdarlegustu urrin og helgislepjugólin hafa að sjálfsögðu hljómað hæst og óhugnanlegust fram úr trýnunum á pírataskepnunum og krataeðlissjúklingum Samfylkingarinnar.

En í raun og veru fagna hýenuhersveitir Pírata og krataeðlis heimsókn Bjarnaben í Ásmundarsal á þolláksmessukvöld, því það gefur þessum óhemju hræsnisfullu og skinhelgu vandræðagemsum tækifæri til að hneykslast hátt og snjallt yfir smá-syndum náungans og auglýsa í leiðinn meinta góðmennsku sína og kórrétt og öldungis óspillt hugarfar. Því þessi endemi trúa því staðfast að hneykslunarrokur, skinhelgimjálm þeirra geti narrað talsvert af atkvæðum út úr kjósendum, sem eiga að fá á tilfinninguna að Píratar og krataeðlisskjátur Samfylkingarinnar séu svo undurgóðar manneskjur.

Eftir næstu kosningar gætu hælbítarnir og hýenurnar skyndilega vent kvæði sínu í kross og farið að nudda sér malandi eins og kettir upp við fótleggina á Bjarnaben og Sjálfstæðisflokknum, enda ber fjarskalítið milli hugsjóna þessara aðila hvað varð þjóðfélagsgerð og þjóðskipulag. Öll kvikindin í þessum poletiska skógi eru nefnilega stórvinir í kapítalismanum, nýfrjálshyggjunni og þjónkun við stórauðvaldið á Vesturlöndum. Þannig, að þegar öllu er á botninn hvolft, allt í fínasta lagi milli Höfuðbólsins og Hjáleignanna, Bjarniben fór og fór ekki í gildi til vina sinna og velunnara og hýenurnar í 101, Píratar og krataelðlissjúklingar fengu útrás fyrir hælbítsáráttu sína, og gátu velt góðmennsku sinni uppúr spillingarpollinum, sem þeim þykir svo vænt um. En yfirvöld eiga að sekta Bjarnaben og vini hans og viðhlægendur í Ásmundarsal, sem saman voru komin þar á þolláksmessukveld, kr. 500.000-pr./haus og nota andvirði sektanna til styrktar fangelsismálastofnun. Þar með væri málið dautt. En hýenur og pírataflónin á að rassskella opinberlega á Austurvelli og hneppa síðan það fólk, allt sem eitt, í gapastokka á sama stað. 

„Ég er ekki að hugsa um að segja af mér“

Athugasemdir

[Ómar Geirsson, 25.12.2020 kl. 23:22]

Sem er eiginlega kjarni málsins;

"Öll kvikindin í þessum poletiska skógi eru nefnilega stórvinir í kapítalismanum, nýfrjálshyggjunni og þjónkun við stórauðvaldið á Vesturlöndum. ".

Nema að Bjarni og kó þykjast þó ekki vera neitt annað en þeir eru.

Góð tillaga þetta með sektina, og góð lýsing á fólkinu sem stöðugt leggur sig fram um að ná lægsta punkti íslenskra stjórnmála, og er í raun bestu vinir auðsins, því það safnar saman atkvæðum fólksins sem annars vegar þykist vera á móti, en er aðallega í upphrópunum og kjamsi, sem og fólki sem innst inni er á móti nýfrjálshyggjunni og stórauðvaldi, en lætur glepjast til að kjósa þennan samnefnara lágkúrunnar.

Hins vegar er ég skinheilagur, enda mannlegur, kinka aðeins kolli þegar ég les mergjaðar lýsingar þínar Jóhannes á þessu liði, reyndar raðkinka ég kollinum, en vitna ekki í þau.

En ósköp vorkenni ég fólkinu sem telur sig berjast fyrir betri heimi, og sóar atkvæði sínum á þetta fólk.

Takk enn og aftur og margoft þar fyrir utan, fyrir beinskeytta rýni sem afhjúpar og dregur fram, að ekki sé minnst á hið mergjaða mál glettninnar sem gerir þá svo skemmtilega aflestrar.

Með jólakveðjum að austan.

[Jóhannes Ragnarsson, 25.12.2020 kl. 23:29]

Gleðileg jól, Ómar. Og þakkir fyrir athugasemdirnar.