Síra Baldvin minntist Talíbana í morgunmessu sinni og tók sóknarbörn sín til altaris

Einn þeirra sem fylgst hefir af áfergju með endurkomu Talíbana er síra Baldvini, prestur og prófastur til Gemlufallaþinga. Í morgun söng hann messu, athöfnin hófst stundvíslega klukkan tíu í höfuðmusteri hans. Það var hátíðar guðsþjónusta með miklum klukknahringingum og bænakalli. Samkvæmt venju þyrptust sóknarbörnin að eins og hræddar pútur í musterið og stóðu þar skjálfandi upp á endann uns hinum mikla kennimanni og spámanni þóknaðist að birtast þeim út úr skrúðhúsinu. Í sóknum síra Baldvins er skyldumæting í messur og vei þeim er skrópar í þessháttar helga stund því þeim refsar síra Baldvin á þann hátt að skrópagemlingurinn lætur aldrei hvarfla að sér meir að vanrækja guðsþjónustu hjá hinum mæta kirkjuhöfðingja.

Og síra Baldvin lauk upp munni sínum og tilkynnti lýð sínum að nú væri aldeilis lag á Læk í Afganistan, því þar væru Talíbanar snúnir aftur til að koma á röð og reglu og typta skrílinn fyrir lausung og óeðli. -Núna, til dæmis, sagði síra, -verða konukindurnar, ef þær fara út, að vera fylgd karlmanns, það er skohh til að koma í veg fyrir að þær verði hórnum að bráð, eins og hendir kvenpéníng hér til lands. Vér munum heldur ekki komast hjá að gera atlögu að lauslæti og óforskömmuðum drykkjulátum kvennastéttarinnar. Vér munum og geta lært eitt og annað nytsamt af fylgismönnum Múhámeðs spámanns, það get ég sagt ykkur. Og vér verðum fegin, þá þar að kemur, að sækja í reynslu og hugsjónir Talíbana þegar oss verður endanlega nóg boðið og látum til skarar skríða í að koma skikk á málin í voru bersynduga og þjakaða samfélagi. Sem er skohh ekkert samfélag því þér gangið öll í Sathani eins og aðrir landar yðar.

Þegar síra Baldvin hafði lokið prédikun sinni, hóf hann kaleikinn á loft og skipaði sóknarbörnum sínum til altaris að neyta hinna heilögu náðarmeðala. Í kaleiknum var að venju abelsín frá ,,Ölgerðin Egill Skallagrímsson h/f", því síra Baldvin tekur fólk ekki til altaris upp á áfengi. Af messubrögðum stórklerks Gemlufallaþinga má ljóst vera vera að hann er nú um það bil að hefjast handa við að flétta andlegar áherslur róttækustu Múhámeðstrúarmanna í Afganistan saman við þá guðskristni sem hann hefir komið á í sóknum sínum. Síðast liðið Jónsmessukveld að sumri, efndi síra Baldvin til hátíðar á rúmgóðu engi, sem hann kallaði ,,Sathansbrennu" og fólst í því að hann hlóð upp bálkesti og brenndi útskorið líkneski af Sathani með hornum hala og lafandi tungu. Um leið kunngjörði musterishöfðinginn söfnuðinum, að þessi hátíð mundi í framtíðinni verða árviss viðburður og á hann væri skyldumæting allra sóknarbarna.      

Málað yfir myndir af konum í Afganistan

Athugasemdir

[Helga Kristjánsdóttir, 16.8.2021 kl. 01:56]

Hvaða Gemlufallaþinga? Eg þekki bara það í Dýrafirði,ertu að skrifa um það?

[Jóhannes Ragnarsson, 16.8.2021 kl. 15:11]

Er það ekki Gemlufall þarna fyrir vestan? Síra Baldvin þjónar ekki eintölu prófastsdæmi, hjá honum er nafnið dregið af Gemluföllum, sem merkir að þar vóru gemlingar skornir, það er að segja, þar var um áratugaskeið rekið sláturhús, sem sumir kalla útrýmingarbúðir.