Af Tjónvaldi Þorn, bersyndugu konunni og síra Baldvini

Tjónvaldur er sem kunnugt er eiginnafn, náskylt nafninu Þorvaldur og beygist eins. Til að mynda stóð til að skíra hægriruddann og sjónhverfingaloddarann Þorvald Gylfaþornsson Gíslason upp af gefnu tilefni og láta hann heita einfaldlega eftirleiðis Tjónvald Þornson. Því miður var aunginn til þess bær maður fáanlegur til að framkvæma uppskýringuna og varð því ekkert af henni að sinni.

En mikið var það Tjónvaldi líkt að gera tvívegis á sama degi aðsúg að einni og sömu bifreiðinni. Svona framkoma flokkast vissulega undir þráhyggju af heldur óhrjálegri tegund og getur orðið hættuleg öðru fólki. Í ofanálag hafa svo nokkrir frambjóðendur stjórnmálaflokkanna gjörst berir að gripdeildum og óspektum upp á síðkastið og einn þeirra var næstum búinn að drepa mann af einskærri vangá þegar hann var að gæsaveiðum upp til sveita. En áður en frambjóðandanum tókst að fremja morð féll hann sjálfur fyrir byssu eins bóndans í sveitinni, sem séð hafði til frambjóðandans og þókt fas hans og tilburðir aumkunarverðir.

Og í morgun, árla mjök, sáu árrisulir menn í sókn síra Baldvins hvar mannvera hékk niður úr trjágrein með bandspotta um hálsinn. Fyrstu viðbrögð voru á þá leið að talið var víst að veslingurinn svorni hefði hengt sig. Svo fóru að renna tvær grímur á þá er að komu, því ýmis konar verksummerki bentu til að hér hefði aftaka farið fram. Hið hangandi hold hafði í lifanda lífi verið kona bersyndug, drykkfelld og nærbuxnalaus með afbrigðum. Síra Baldvin hafði hafði margsinnis aðvarað hana og nú síðast bannfært konugarminn. En konan lét ekki segjast og hélt áfram ósiðlegu líferni. Lík hennar var tekið niður og grafið utangarðs án yfirsöngs og blessunarorða. Síra Baldvin lét sig þó ekki vanta við hina smánarlegu greftrun konunnar, því hann mætti hempuklæddur á staðinn og fól Sathani sál konunnar með þeim fyrirmælum, að svona kerlu ætti að pína við brennistein og gaddavír frá eilífð til eilífðar. Já, vinir mínir, svona fer fyrir ósiðlegu, lostafullu brókarsóttarfólki í prófastdæmi síra Baldvins. 

Tvisvar keyrt á sömu bifreið