Þvagleggsvinnubrögð lögreglu ekki rannsóknarverð!!!

Heldur betur virðast þeir vera geðugir í tiltektum við vinnu sína lögæslumennirnir sem lúta stjórn rólíngstónslögreglustjórans Ólafs Helga Kjartanssonar, sem er auk lögreglustjórastarfans á Selfossi, stjörnusýslumaður og fjölmiðlavænn í betra lagi. En í meðfylgjandi frétt bregður svo við, að lögreglustjórinn Ólafur Helgi stjörnusýslumaður villist af vegi í samtali við fjölmiðla og keyrir hiklaust út í skurð ef svo má segja. Stjörnusýslumaðurinn hrósar nefnilega happi, samkvæmt fréttinni, í aðsteðjandi vandræðum og lýsir því keikur yfir, að ríkissaksóknaraembættið hafi vísað frá kæru konu nokkurrar sem kærði undirmenn Ólafs Helga fyrir heldur betur skuggalegar aðfarir í samskiptum þeirra við hana. Nú er ég þar með ekki að fullyrða, að kæra konunnar sé alfarið á rökum reist, enda var ég ekki viðstaddur handtöku hennar. Hinsvegar þykja mér viðbrögð ríkissaksóknaraembættisins ábyrgðarlaus og óviðfeldin. En með því að lýsa yfir, að ekki sé grundvöllur fyrir að hefja rannsókn á þessu einkennilega máli, er embætti ríkissaksóknara í raun og veru, að dæma konuna sem kærði lygara og óheilindamanneskju - eða hvað? Mín skoðun er sú, að ríkissaksóknaraembættið eigi að rannsaka þetta mál, burtséð frá öllum grundvöllum sem embættinu dettur í hug að skjóta sér á bak við til að afsaka aðgerðarleysi sitt. 

Konu haldið niðri og þvagsýni tekið

Athugasemdir

[Fransman (IP-tala skráð) 21.8.2007 kl. 08:36]

Ef ríkissaksóknari telur ekki ástæðu til að hefja opinbera rannsókn þá hefur það ekkert að gera með hvort hann telur konuna vera lygara eða óheillindamanneskju, einfaldlega að hann telji ekki að lög hafi verið brotin.

Það getur svo vel verið að það þurfi þá að setja ný lög, en það er allt önnur ella.

[Jóhannes Ragnarsson, 21.8.2007 kl. 08:49]

Ekki veit ég hvernig ríkissaksóknari kemst að því, að órannsökuðu máli, hvort lög hafa verið brotin eða ekki.

[Hreiðar Eiríksson, 21.8.2007 kl. 17:16]

Ég hefði verið rólegri ef Ríkissaksóknari væri ekki fyrrverandi Rannsóknarlögreglustjóri ríkisins.  T.d. ef hann hefði áður verið lagaprófessor eða lögmaður.  Og einnig ef það væri ekki æðsti stjórnandi lögreglunnar í landinu sem skipaði í embætti Ríkissaksóknara.  Þetta þarf ekki að vera neitt samsæri en vissulega hefur þetta heldur ekki það yfirbragð trúverðugleika sem ég tel nauðsynlegt.

[Sumarliði Einar Daðason, 21.8.2007 kl. 21:39]

Ég og kona mín höfum verið svo óheppin að lenda í óvæntri líkamsleit af lögreglu án þess að ég væri borin sök að einhverju. Ég hef aldrei komist í kast við lögin, nema fyrir að keyra rétt yfir hundraðið á þjóðveg eitt. Þetta voru fjórir lögreglumenn. Ég benti þeim á stjórnarskrána og réttindi okkar en þá varð harkan ennþá meiri. Okkur var hótað handtöku ef við leyfðum þeim ekki að leita. Þegar þessu var yfirlokið sögðu þeir okkur að þetta væri eina leiðin til þess að ná árangri gegn fíkniefnum! Þeir yrðu að brjóta lög til þess að ná árangri í starfi! Við sem komum ekki nálægt ólöglegum fíkniefnum urðum fyrir barði á yfirvaldinu sem vildi bara taka okkur til skoðunar - án ástæðu!

Við auðvita kærðum þetta til ríkissaksóknara og fengum þessa niðurstöðu: "Ekki er ástæða til að hefja opinbera rannsókn". Reyndar hlógu lögreglumennirnir af okkur þegar við sögðumst ætla að kæra þetta og sögðu "Gangi ykkur vel!". Þess vegna held ég að við þurfum að staldra aðeins við áður en þetta breytist í lögregluríki þar sem allt má gera við þig!

Ps. ég er ekki að styðja þessa konu sem ók ölvuð. Hún á að fá sína refsingu. En þessi hegðun yfirvalda er komin út í öfgar!

[Sumarliði Einar Daðason, 21.8.2007 kl. 21:42]

Ég orða þetta svo klaufalega hér að ofan að það mætti skilja að kona hafi verið borin sök. En við vorum hvorug borin sök að einhverju. Hún hefur aldrei brotið lög ólíkt mér með hraðaksturinn.

[Sumarliði Einar Daðason, 21.8.2007 kl. 21:46]

Kona mín borin að sök... að sjálfsögðu!  Ég er alltof fljótur að ýta á Senda, enda hita mál.