Jóhannes Ragnarsson

11.4.2008 | 17:26

Staurblindir eintrjáningar og rakin fífl

Það er nokkuð ljóst, að hið mikla kvótahagræðingarfyrirtæki í útgerð og fiskvinnslu HB-Grandi hefur stundað rösklegt kvótabrask á síðasta ári.

Þó er þetta aðeins lítill angi af skammarlegu framferði þeirra sem fengið hafa gefins aflaheimildir í tæpan aldarfjórðung. Það eru aðeins staurblindir eintrjáningar og rakin fífl sem enn láta sér detta í hug að réttlæta og verja hið grófa mafíska fiskveiðistjórnunarkerfi okkar, sem valdið hefur alþýðu manna slíkum búsifjum að með ólíkindum er.

Og þegar menn, meira að segja stjórnmálamenn, gerast svo lánlausir, að halda áfram að berja tómum hausum sínum við steininn, þegar fyrir liggur dómur Mannréttindanefndar Sameinuðuþjóðanna, þess efnis, að hið alræmda kvótakerfi og framkvæmd þess flokkist undir mannréttindabrot, er íllt í efni. Mér skilst t.d. að Sjálfstæðisflokkurinn stefni ótrauður að því að hunsa Mannréttindanefnd Sameinuðuþjóðanna og styðja þar með áframhaldandi mannréttindabrot. Það verður fróðlegt að fylgjast með hvort Samfylkingin kemur til með að styðja mannréttindabrotastefnu Sjálfstæðisflokksins í þessu stórmáli með ráðum og dáð, eða ber í borðið og segir, hingað og ekki lengra.