Teprulegu veimiltíturnar og óargaskepnan

Eins og staðan er nú í hvítabjarnarmálinu, er aðeins ein leið fær: Hengja kvikindið tafarlaust á nauðalíkan hátt og Jón skipstjóri bolvíkingur og áhöfn hans á Guðnýju ÍS gerðu hér um árið. Mjög auðvelt væri að fara á fjórhjóli uppað bjarndýrinu og smeygja snöru um háls þess og herða hressilega að. Þar með væri málið leyst og bjarnarskrattinn dauður án blóðsúthellinga. Það er auðvitað ekkert vit í að skjóta dýrið af færi með byssu, þar eð slíkur framgangsmáti hefur ekki þann sjarma sem nútímafólk tuttugustu og fyrstu aldarinnar gerir kröfu til þegar hvítabjörn skal vegin.

Svo eru það teprulegu veimiltíturnar, sem vilja svæfa óargaskepnuna og flytja hana til síns heima. Um svoleiðis landeyður og vankagemlinga er víst best að hafa sem fæst orð.

Reynt að ná birninum lifandi

Athugasemdir

[Brúnkolla (IP-tala skráð) 16.6.2008 kl. 19:04]

Aldrei

[Jóhann Elíasson, 16.6.2008 kl. 22:32]

Hvernig í ósköpunum á að fanga bangsann og hvað á svo að gera við hann?  Það væri kannski ráð að fá Árna Finnsson og einhverja "kaffihúsanáttúruverndarsinna" til þess að lokka bangsa inn í gám, hann yrði varla neitt órólegur fyrr en hann væri búinn að klára þá, en hvað svo?  Er þetta lið virkilega svo barnalegt að halda að það sé hægt að umgangast ísbjörninn eins og eitthvað gæft, ljúft og meðfærilegt gæludýr, veit það ekki að þetta er eitt mesta "drápstæki jarðarinnar" og er efst í fæðukeðjunni hvar sem það er statt?

[Kristján P. Gudmundsson, 16.6.2008 kl. 22:41]

Þetta mál snýst um að bjarga alfriðuðu saklausu dýri, en ekki um óvild í garð íbúa SV-hornsins, sem eins og flestir íbúar landsins okkar vilja láta dýrið lifa.

Kveðja,KPG.

[Jóhannes Ragnarsson, 17.6.2008 kl. 09:32]

Jæja Ímigustur hinn hugprúði, þú segir að í Ólafsvík búi aðeins gungur og lítilmenni. En það er nú öðru nær. Í Ólafsvík hafa ævinlega búið, eins og kunnugt er, afburða kvennamenn, drykkjumenn góðir og feiknarlegir áflogahunda ef því var að skipta; líka orðlagðir sjómenn, frægir hestamenn og talandi skáld. 

[Eggert Hjelm Herbertsson, 17.6.2008 kl. 13:06]

heheheh....góð kómík....ég held, Jói, að menn skilji ekki það sem þú skrifar

[Jóhannes Ragnarsson, 17.6.2008 kl. 22:43]

Ójá, Eggert, enn og aftur sannast hin fornkveðna, að sælir eru fattlausir ...