Skáldskapur spaugara um lérefts- eða plastdruslubjörn

Eitthvað líst mér illa á þessa ísbjarnarhistoríu af Bjarnarfelli á Skaga. Getur ekki hugsast að þarna sé um samantekin ráð spaugara að ræða, sem vilja gera narr að hrekklausu fólki? Eins og málin standa í dag, eru landsmenn, þá ekki síst fjölmiðlaflónin, afar ginnkeyptir fyrir öllum skröksögum um ísbirni. Ég var svo heppinn, að sjá mynd í sjónvarpsfréttunum í kvöld af meintum hvítabirni; og það var nú hvítabjörn í lagi atarna: Hvítu laki eða plastdruslu hafði verið kastað af hendi úti á víðavangi, það síðan myndað úr fjarlægð og þar með var komið blóðþyrst villidýr norðan af hjara veraldar.

Og nú eru trúgjarnir sakleysingjar með alvæpni, að berjast við leita að þessum stórhættulega lérefts- eða heyrúlluplastbirni upp um fjöll og firnindi - en án árangurs að sjálfsögðu. Ég þykist vita að okkar guðsblessaði og góðgjarni umhverismálaráðherra er öll af vilja gerð til að sjá svo um, að hinum alhvíta léreftsplastbangsa verði ná lifandi og honum komið til sinna raunverulegu heimkynna. En þau heimkynni virðast reyndar ekki svo ýkja langt undan, ef tilgátan um að sagan af Bjarnarfellsísbirninum sé í mesta lagi vel heppnaður skáldskapur uppátektarsamra grínista.

Svo getur náttúrlega verið, að þetta hvíta, sem sést á myndinni, sé raunverulegt kvikindi: álft, sauðkind eða hvít varphæna, sem villst hefur frá heimili sínu og ráfað í einstæðingsskap sínum til fjalls.   

Leit að bjarndýri stendur yfir

Athugasemdir

[Bergþóra Jónsdóttir, 23.6.2008 kl. 22:32]

Jú, þetta er vissulega líkt laki.  Ætli þetta sé ekki bara vofa í leit að Ketumóra?  Svei mér þá.  Það hlýtur barasta að vera.

[Ingibjörg Friðriksdóttir, 23.6.2008 kl. 22:36]

Ekki koma upp um mig.

[Auðun Gíslason, 23.6.2008 kl. 23:57]

Ég frétti á Kaffi Mokka að hér væri sjálfur Snorri, fyrrverandi forsetaframbjóðandi, enn á ferð að gera grín að landsmönnum.  Þetta sagði mér ólyginn listamaður.