Skrækjandi smápúkafans Foringjans Mikla

Þennan daginn virðist smápúkafans Sjálfstæðisflokksins á Alþingi, frjálshyggjubörnin - fulltrúar hrundrar hugmyndafræði, helst hafa ofanaf fyrir sér með því að skrækja og vola undan meðferð ríkisstjórnarinnar á Foringjanum Mikla, Seðlabankastjóranum, leiðtoga hinna hrundu frjálshyggjufræða. 

Nú spyr einn vesælasti og rytjulegasti frjálshyggjupúkinn Jóhönnu Sigurðardóttur hvort Alþjóðgjaldeyrissjóðurinn hafi ekki gert athugasemdir við fyrirhugaðan brottrekstur Messíasar Oddssonar. Hafi rytjulegi frjálshyggjupúkinn eitthvað meira en kvarnir milli eyrnanna getur hann sagt sér sjálfur, að hafi Alþjóðagjaldeyrissjóðurinn gert einhverjar athugasemdir um málið þá hafa það fyrst og fremst verið spurningar um hversvegna í fjandanum sé ekki búið að skipta um bankastjórn fyrir löngu.  

Veit ekki um erindi frá AGS

Athugasemdir

[Sigurður Geirsson, 9.2.2009 kl. 16:51]

Bíddu, ég held að þú ættir að lesa fyrirspurnina áður en þú ferð að tjá þig. Spurt var hvort Alþjóða gjaldeyrissjóðurinn hafi gert einhverjar athugasemdir vegna frumvarpsins um breytingar á Seðlabankanum.

Það frumvarp fjallar bara ekkert um Davíð heldur veigamiklar breytingar á yfirstjórn Seðlabankans og er þar ekki bara um að ræða fækkun Seðlabankastjóra, heldur og breytingar á ýmsu í tengslum við stjórnun og ákvarðanatöku. Þar sem slíkt tengist þeim samningi sem Ísland er með við Alþjóða gjaldeyrissjóðinn er ekki nema eðlilegt að telja að þeir muni skoða það mál og hugsanlega gera athugasemdir vegna frumvarpsins, hvort sem þær athugasemdir eru jákvæðar eða neikvæðar fyrir frumvarpsflytjendur. Einnig væri ekkert óeðlilegt að stjórnvöld hafi leitað umsagnar sjóðsins í ljósi þess hversu mikilvægt samband okkar við þá er, ekki hvað síst fyrir okkur.

Þess vegna er ofur eðlilegt að þingmaður sem tilheyrir þeirri nefnd sem á að fjalla um málið spyrjist fyrir um það hvort slíkt erindi hafi komist. Svar Jóhönnu finnst mér hins vegar mun merkilegra, þar sem hún segir að ef slíkt erindi berist þá mun ráðuneytið skoða hvernig farið verði með það!!!!! Ja öðruvísi mér áður brá þegar þessir sömu þingmenn voru í stjórnarandstöðu og fengu ekki þau gögn í hendur sem nefndarmenn sem þeir töldu nauðsyn á að fá. Þá var talað um ófríki, vanvirðu við Alþingi og ég veit ekki hvað.

það er greinilegt að það er ekki sama hljóð sem kemur frá þingmönnum eftir því hvort þeir eru í ráðherraembætti eða hlutverki þingmanns.

[Jóhannes Ragnarsson, 9.2.2009 kl. 18:03]

Í frétt mbl.is er talað um að Jóhanna hefði svarað fyrirspurn frjálshyggjudrengs um hvort AGS hefði gert athugasemdir við fyrirhugaðar breytingar á yfirstjórn Seðlabankans.

Reyndar er umrætt frumvarp fyrst og fremst lagt fram til að losna við skaðvaldinn sem þar hefur hreiðrað um sig.