Jóhannes Ragnarsson

1.7.2009 | 20:36

Er fólk búið að gleyma glæpasamtökunum?

Það sem athyglisverðast er við þessa skoðanakönnun er tvímælalaust fylgisaukning Sjálfstæðisflokksins og Framsóknarflokksins. Getur það verið að fólk sé um það bil að gleyma hvaða öfl það voru sem komu okkur íslendingum í þá hroðalegu stöðu sem við erum í? Efnahagshrunið, með öllum sínum útrásarböðlum og fjármálagæpamönnum, er alfarið afurð tveggja glæpasamtaka, sem í daglegu tali heita Sjálfstæðisflokkur og Framsóknarflokkur. Dettur einhverjum heilvita manni í hug að forystufólk nefndra óþrifasamtaka sé betur til þess fallið að greiða úr ástandinu, m.a. Icesave-málinu? Það er í mínum huga svona álíka gáfulegt og reyna að láta minkinn sem komst í hænsnakofann endurlífga hænurnar sem hann drap þar inni.

Icesave viðbjóðurinn og mörg önnur hryðjuverk Sjálfstæðisflokksins og Framsóknarflokksins á liðnum árum ættu að nægja til að þessi samtök hefðu nákvæmlega ekkert fylgi meðal landsmanna - eða hvað? Og að heyra helvítis hræsnina og skinhelgina í talsmönnum glæpasamtakanna, þessa dagana, er gjörsamlega með endemum. Ef að þetta lið hefði einhvern snefil af sómtilfinningu og kynni auk þess að skammast sín, léti það ekki hvarfla að sér að segja eitt einasta aukatekið orð um Icesave-samninginn, eða yfirleitt nokkuð af þeim skuggalegu óförum sem eru beinar afleiðingar af stjórnmálaumsvifum Sjálfstæðis- og Framsóknarflokks á árunum 1995 til 2007.