Týnd lán eru týnd þar til þau finnast

Mikið helvíti tókst nú einkavinavæðing Davíðs og Halldórs á Landsbankanum fjarska vel. Einkavinirnir er þáðu Landsbankann að gjöf virðast fljótt hafa tekið til óspilltra málanna og farið að lána sjálfum sér milljarða á milljarða ofan, sem týndust jafnhraðan. Svona eiga kaupsýslumenn að kaupsýsla! Á sínum tíma skildist mér að Bjöggarnir og fleira frábært fólk af þeirra guðlega standi væru allt í senn: kjölfestufjárfestar, áhættufjárfestar og fagfjárfestar. En af einhverjum furðulegum ástæðum festist féð illa við þessa heiðursmenn, það fauk bara útí buskann, eða fór í súginn eins og mbl.is orðar það svo skemmtilega. Nú veit enginn hvað á að gera við Bjöggana, eða hvort eitthvað eigi að gera við þá. Þetta eru nú einusinni öðlingar, menningarvinir og einkavinir. Og þar sem týnd lán eru týnd verða þau að sjálfsögðu týnd þar til svo ólíklega vill til að þau finnast.

Svo var það karlinn hann Arinbjörn, sem pissaði á kirkjutröppurnar í þorpinu sem hann bjó, og gerði auk þess dálítið meira í leiðinni sem ég af velsæmisástæðum vil ekki nefna. Í mörg ár vissi söfnuðurinn ekki hvernig væri best að taka þá þessu snúna máli. Að lokum varð Arinbjörn ellidauður og þar með framferði hans á kirkjutröppunum forðum úr sögunni.

Skoða lánveitingar Landsbanka

Athugasemdir

[Árni Björn Guðjónsson, 26.7.2009 kl. 23:04]

Sjálfstæðisflokkurinn er buinn að vera.Leggja hann niður strax.

[Óskar Helgi Helgason (IP-tala skráð) 26.7.2009 kl. 23:25]

Heill og sæll; Jóhannes - sem og, aðrir hér á síðu !

Þakka þér; ádrepu þarfa, Jóhannes.

Árni Björn; listamaður knái !

Að; eins skynsamur maður, eins og þú, skulir gleyma, að nefna hina glæpaflokkana, Framsóknarflokk og Samfylkingu, Árni minn.

Um; attaaníossa hátt VG, með þessu liði, borgar sig, að segja sem fæst.

Og; Árni Björn ! 

ESB og Evrópa; eru sem betur fer, ekki allur heimurinn. Þó; þér hafi litist vel á þig, í skrifræðismusterum Evrópubandalagsins (heyrði í þér; á Útvarpi Sögu, á dögunum), að þá eigum við all víða góða valkosti, sem eru Asía - Ameríkurnar þrjár, o.s. frv., til lengri tíma litið.

Með beztu kveðjum; sem öðrum fyrri, úr Árnesþingi /

Óskar Helgi Helgason 

[Jóhann Elíasson, 27.7.2009 kl. 11:05]

Ég hef "heyrt" það að ALDREI hafi staðið til að gera neitt í þessum stærsta fjárdrætti og glæpamáli Íslandssögunnar ef ekki heimssögunnar, því margir hátt settir menn/konur í þjóðfélaginu séu flæktir í það, sel þetta ekki dýrara en ég keypti.