Árni Johnsen, kunningi minn og gamla konan sem dó

Kunningi minn, tónfróður maður og söngvinn, labbaði sig eitt fallegt októberkvöld niður í brekkuna fyrir neðan heimili sitt með gítarinn sinn og fór að syngja svona brekkusöngva eins og Árni Johnsen gerir. Engir áheyendur voru nær og kvöldið var kyrrlátt en fremur kalt. Þegar kunningi minn var hálfnaður með fimmta lagið komu þrír lögregluþjónar og höfðu hann á brott með sér, tóku af honum gítarinn og lokuðu hann inni fram undir hádegi næsta dag. Nokkrum dögum síðar var honum gert að greiða heilmikla sekt fyrir ölvun og óspektir á almannafæri og hafa raskað alsherjarreglu.

En Árni Johnsen fær átölulaust að orga ár hvert yfir gjörvallann Herjólfsdal með þvílíkum tilburðum að ungmenni, allt uppí stálpaða krakka, verða skelfingu lostin eins og þau hafi séð draug eða skrímsli. Það má þó Árni eiga, að söngskrá hans var óvenju vönduð og líbéral í kvöld. Meðal annars kumraði hann hin vinsælu lög ,,Bylur hátt í koki klúru," ,,Gamla konan sem dó," ,,Í skorsteini hann Skottu lá," og sjómannalagið góðkunna ,,Kvótasvínið keilunni stal."

13 þúsund manna kór

Athugasemdir

[Jóhannes Ragnarsson, 3.8.2009 kl. 01:07]

Það er áreiðanlega haldið einhverri dularfullri sjálfspyntingarhvöt þetta fólk sem ferðast milli landa til að hlýða á ósköpin.

[Þráinn Kristinsson (IP-tala skráð) 3.8.2009 kl. 03:17]

Áhugaverð söngskrá!

[Níels A. Ársælsson., 3.8.2009 kl. 10:41]

Tók hann ekki járnplötu-valsinn og lagið sem sökkti bátnum frá Sandgerði ?

[Jóhannes Ragnarsson, 3.8.2009 kl. 10:56]

Auðvitað orgaði hann ,,Járnplötuvalsinn" og ,,Lagið sem sökkti bátnum í Sandgerði." Þó það nú væri! Svo heyrðist mér ekki betur en karlhólkurinn væri að bera sig til við að stauta sig gegnum ,,Lagið sem drap beljuna," - en það er best að hafa sem fæst orð um það.

[Hafsteinn Viðar Ásgeirsson, 4.8.2009 kl. 22:19]

Áttu Jóhannes textan af "Kvótasvínið keilunni stal"? Bara svona til almennrar upprifjunar....

[Hafsteinn Viðar Ásgeirsson, 4.8.2009 kl. 22:42]

Ekki spurning um það Sveinn, hann Jóhannes á þennan texta.

[Ingibjörg Friðriksdóttir, 4.8.2009 kl. 23:00]

Ég hlusta alltaf á Rás 2 um Verslunarmannahelgar, en slekk klukkan 23:00 á sunnudagskvöldum og kveiki ekki aftur fyrr en eftir að brekkusöng er lokið.

Ég fæ óbragð í munninn og gæsahúð frá toppi til táar, þegar ég heyri í þessum holdgerfli spillingar og falskra tóna.