Argvítuga bestían Steingrímur J. ýtir undir klofning innan VG

Ekki dreg ég í efa orð Þórs Saari þess efnis að nú sé öll áhersla lögð á af hálfu Samfylkingarinnar og Flokseigendafélags VG að leysa Icesave-málið með ofbeldi inni á Alþingi. Þetta er gamalkunn aðferð og sóðaleg þar sem spillt hugarfar ræður ríkjum. Þeir stjórnmálamenn sem skirrast ekki við að herja á félaga sína með pólitísku ofbeldi, ef þeir fá sitt ekki fram tafarlaust, eru að sínu leyti eins og hvert annað illgresi í garði mannlegs samfélags.

Það kemur mér heldur ekki á óvart að Samfylkingin hafi sett á flot alsherjar áróðursherferð gegn Ögmundi Jónassyni fyrir að vilja ekki éta Icesave-óþverrann ofaní sig möglunarlaust og þakka fyrir kræsingarnar af fullkominni undirgefni. Og samfylkingarlýðurinn er ekki einn um áróðursherferðina á hendur Ögmundi. Hluti VG, með formanninn í broddi fylkingar hafa tekið þátt í þessari aðför. Hið sanna er að formaður VG, Steingrímur J. Sigfússon, hefur hagað sér eins og argvítug bestía gagnvart hluta þingflokks VG, þ.e. þingmönnunum Ögmundi Jónassyni, Guðfríði Lilju Grétarsdóttur, Lilju Mósesdóttur og Ásmundi Einari Daðasyni, einnig mun Jón Bjarnason hafa fengið að finna til tevatnsins fyrir að móðga ESB-sjúklingana í Samfylkingunni með ummælum sínum fyrr í sumar. Það er ljóst að með framferði sínu hefur Steingrímur J. ýtt mjög undir klofninginn í röðum eigin flokks og er nú svo komið að æ fleiri tala um nauðsyn á uppgjöri við flokkseigendaklíkuna, Steingrím, Álfheiði, Árna Þór, Svandísi, Björn Val og guðföður klíkunnar, Svavar Gestsson sendiherra. Fólk er búið að fá uppí kok af hótunum, yfirgangi, hroka og borgaralegu snobbi þessa liðs.

 Best væri að hægri armurinn, flokkseigendaklíkan, í VG færði sig yfir í Framsóknarflokkinn eða Samfylkinguna eftir atvikum og eftirléti raunverulegum vinstrisinnum, sósíalistum, Vinstrihreyfinguna grænt framboð. VG er ekki hlutafélag þar sem fyrrnefnd flokkseigendaklíka á meirihluta hlutabréfanna, - þó svo að þessu andlega fátæka fólki finnist að svo sé.

Hefðbundið pólitískt ofbeldi

Athugasemdir

[Jakob Þór Haraldsson, 11.8.2009 kl. 14:53]

Mjög athyglisverð færsla hjá þér, en ég tek því miður undir þau orð, að það er búið að vera frekar lengi ljóst í mínum huga að VG verður að kjósa sér nýjan formann, Steinríkur hefur algjörlega misst allan trúverðugleika og skaðað þingflokk VG gríðara með óvönduðum vinnubrögðum - því miður ítrekað.  Mjög sorglegt að horfa upp á þetta endarlausa klúður hjá þeim ágæta manni.

kv. Heilbrigð skynsemi

[Jón Ingi Cæsarsson, 11.8.2009 kl. 15:15]

Það er frólegt að sjá hversu fljótir menn eru að snúa baki við mönnum sem þurfa að stunda erfiða pólitík.

[Jóhann Elíasson, 11.8.2009 kl. 21:14]

Jón Ingi á kannski við að hann og aðrir Samfylkingarmenn séu alveg tilbúnir að taka við skítnum, þegar VG hafa "hreinsað" til hjá sér og losað sig við óværuna?