Ögmundur og Guðfríður Lilja flengdu flokkseigendaklíkuna vel og vandlega

Hann var víst býsna fróðlegur fundurinn atarna í Kópavogi í kvöld. Enda var til hans stofnað af þeim er stóðu fyrir honum, að taka Ögmund Jónasson og Guðfríði Lilju ærlega í gegn fyrir skort á tilhlýðilegri virðingu og undirgefni við flokkseigendaklíkuna alræmdu, hina svavarsvæddu elítu sem varla getur dregið andann lengur af skinhelgi og borgaralegu snobbi. Til að allt færi nú vel fram var senditíkinni, Ólafi hinum ,,góða" bæjarfulltrúa VG í Kópavogi falið það vandasama verk að smala Steingríms/Svavars-jákvæðu fólki á fundinn og ennfremur að leggja fram tillögu til stuðnings Icesave-ævintýri þeirra Steingríms og Svavars. Er skemmst frá að segja að allt fór á annan veg en ætlað var því það voru Ögmundur og Guðfríður Lilja sem flengdu litlu ljótu flokkseigendaklíkuna langs og þvers eftir öllum kúnstarinnar reglum á fundinum eins og hún hafði til unnið, og það svo hressilega að Svandísi Svavars, Árna Þór og Steingrími J. verður varla svefnsamt í nótt, hvað þá Álfheiði Inga og Sendiherranum sjálfum. Sneypuför hins ógæfusama fólks, sem uppá síðkastið hefur gert Icesave-samninginn mikla að lífshugsjón sinni, var því algjör á Kópavogsfundi VG 2009. Það er þetta lið sem verður að kyngja þeim beiska bikar að ,,hugsa sinn gang" en ekki Ögmundur og Guðfríður Lilja. 

Fjölmenni á félagsfundi VG

Athugasemdir

[Páll Blöndal, 12.8.2009 kl. 00:44]

Já, eru þeir í flengingunum?

[Sigurður Þórðarson, 12.8.2009 kl. 01:13]

Hvor hópurinn var fjölmennari?  Ögmundur vex í áliti hjá mér eftir því  sem ég fylgist lengur og betur með verkum hans. 

[Guðmundur Jónas Kristjánsson, 12.8.2009 kl. 01:21]

Vinstrimennskan í hnotskurn sbr blogg mitt í dag!!!!!!!!!!

[Sigurður Þórðarson, 12.8.2009 kl. 01:49]

Kæri Guðmundur, við ættum að taka til alvarlegrar íhugunar orð Ögmundar að þetta mál væri of stórt til þess að menn ættu að skiptast eftir flokkslínum.  Ögmundur sagði margt fleira skynsamlegt í Kastljósinu sem honum til sóma. Ég er heldur ekki alltaf sammála Ögmundi en ég hef orðið þess áskynja að Ögmundur er drengur góður í bestu merkingu þeirra orða.

[Anna Sigríður Guðmundsdóttir, 12.8.2009 kl. 05:06]

Sigurður. Ég tek heilshugar undir með þér. Ögmundur er heiðarlegur góður drengur. Sannur Íslandsvinur er hann í raun.

Hann er í stjórnmálum af hugsjón. það er leitun að slíku fólki í stjórnmálum Íslands í dag. Hann á heiður skilið fyrir að standa og falla með sinni heiðarlegu hugsjón og skoðun.

Ég tek það fram að ég þekki Ögmund ekki persónulega. Fyrir kanski ca 25-30 árum síðan byrjaði ég að fyllgjast með þessum ágæta dreng.

Hann hefur þurft að glíma við mótlæti í lífinu eins og við öll. Hann hefur komist vel frá því mótlæti með reynslu og gott kærleiksvit inn í íslenska pólitík. þökkum fyrir að hafa svo góðan dreng í pólitík Íslands á slíkri ögurstund. Enginn hefði staðið betur með íslenskri alþýðu en hann hefur gert.

Sendi honum allar mínar bestu stuðningskveðjur. Og það hefur ekkert með það að gera hvar í flokki hann er, heldur hverskonar persóna hann er!

[Jóhannes Ragnarsson, 12.8.2009 kl. 08:46]

Sennilega var sá hópur sem styður einstefnu Steigríms formans í Icesavemálinu stærri í upphafi fundar. En eins og fyrr segir, snérust málin gjörsamlega í höndum þeirra sem ætluðu að stilla Ögmundi og Guðfríði Lilju upp við vegg og það svo rækilega, að í fundarlok stóðu þau Ögmundur og Lilja uppi sem algjörlega málefnalegir sigurvegarar.

[Sigurður Þórðarson, 12.8.2009 kl. 10:22]

Þakka þér kærlega fyrir þessar góðu fréttir Jóhannes.

Ég set traust mitt á fólk eins og Ögmund, Liljurnar tvær og Ásmund bónda.  Reyndar er margt þjóðhollt og gott fólk í VG bæði í grasrót og á þingi og ég tel öruggt að Atli og Hóla-Jón séu í þeim hópi þó þeir hafi ekki haft sig mikið í frammi. 

Þau vandamál sem þjóðin stendur nú frami fyrir eru það alvarlega að við megum ekki við að sundrast.  Ég hef líka sífellt meiri efasemdir um hefðbundin hugtök eins og vinstri eða hægri eigi við.  Hvað er svona vinstri við það að ganga erinda útrásarvíkinga eða ASG? Það er rétt sem Ögmundur segir risavaxin sameiginleg vandamál okkar kalla á að ALLIR leggi sitt besta fram og hugsi málin upp á nýtt. 

[Ásthildur Cesil Þórðardóttir, 12.8.2009 kl. 21:21]

Eg segi eins og Sigurður álit mitt hefur vaxið á Ögmundi, hef samt alltaf kunnað vel að meta einurð hans og heiðarleika.  En þegar hann stendur svona föstum fótum á prinsippinu þá líkar mér vil.  Megi þessi armur VG styrkjast og dafna.