Ég dauðöfunda Steingrím J.

Auðvitað á Steingrímur J. Sigfússon einkar auðvelt með, að snúa þingmannsnefnur stjórnarandstöðunnar niður eins og sjóveika hvolpa, enda er stjórnarandstaðan á Alþingi einn allsherjar illa þefjandi ruslahaugur, ekki vantar það. Hvað haldið þið lesendur góðir, að nábrýni og strengjabrúður á borð við Gunnar Braga Sveinsson, Birgi Ármanns, Bjarna Ben og Eygló Harðar hafi að gera í alvöru stjónmálamann eins og Steingrím J? Að maður minnist nú ekki á Möggu Tryggva, Tryggva Herberts, Sigmúnd Davíð og Einar Kr. Guðfinnsson.

Ekki er að efa, að Steingrími þyki gaman, að velta þessum lítilmennum uppúr hrunadrullufor þeirra sjálfra. Og satt að segja dauðöfunda ég hann fyrir að vera í aðstöðu til að leyfa sér þann munað, að flengja þennan lýð opinberlega annað slagið úr ræðustól Alþingis.

Hinsvegar er ég ekkert of viss um, að almennt gáfnafar stjórnarandstöðuþingmanna sé þess eðlis, að þeir skilji hvað um er að vera og hvað er í húfi; fólk sem ekki skilur smán sína og niðurlægingu og gaspara sífellt eins og ekkert hafi gerst, er ekki líklegt til að gera sér grein fyrir muninum á raunheimum annarsvegar og draumheimum með óráði og staðleysu hinsvegar. 

Yndislega ótrúlega ómerkilegt

Athugasemdir

[Þórdís Bára Hannesdóttir, 2.12.2009 kl. 14:03]

Góður.

[Einhver Ágúst, 2.12.2009 kl. 14:05]

Kannski þroskaþjálfafélag Íslands ætti að senda frá sér ályktun um meint einelti og niðrandi ummæli Steingríms um andstæðinga sína í pólitík?

Gæti kannski hjálpað þeim, en reyndar skaðað þá er eiga við raunverulega þroskahömlun að stríða.

[Erling Garðar Jónasson, 2.12.2009 kl. 14:22]

Heill þínu hugmyndaauðgi.

[Ólafur Als, 2.12.2009 kl. 14:49]

Margur heldur mig sig ... og nú er ræðubósinn fyrrum farinn að skamma þá sem ekkert skilja og ekkert vita um alvöru málsins ... og dindlarnir standa vaktina - og gleðjast yfir heimsborgurunum sem skilja hvað sagt er í útlöndum.

[Þorsteinn H. Gunnarsson, 2.12.2009 kl. 16:27]

Hér er knálega að orði komist. Ég legg til að menn sem semja svona texta fái verðlaun. Eða í það minnst verði boðið í kaffi á Gljúfrasteini.

Meira segja Ólafur Als er farinn að titra og talar um að dindlarnir standi vaktina, þegar menn semja áheyrilegan texta, slík er geðshræringin þegar menn finna fyrir eigin vanmætti.

[Ólafur Als, 2.12.2009 kl. 17:19]

Ef um titring er að ræða, stafar hann ekki af málfarinu, heldur innihaldi orðanna. Það er snöfurlegt þetar á að hampa ræðubósum fyrir hrokann sinn og það er kvíðavænlegt hve dindlarnir eru reiðubúnir til fylgilags við krepptann vinstri hnefann. Hagur þjóðar varðar þá lítið, sómi þeirra naumt skammtaður.

Já, fallega pissar hún Brúnka.

[Jóhannes Ragnarsson, 2.12.2009 kl. 17:26]

Hagur þjóðarinnar liggur í því, að her verði tekinn upp þokkalegur vinstrisósíalismi. Þetta veit m.a.s. Ólafur okkar hérna Als.

[Þorsteinn H. Gunnarsson, 2.12.2009 kl. 17:45]

Í upphafi skal endirinn skoða segir gamalt máltæki.

Ég minni á upphaf þessa máls þegar bankarnir voru einkavæddir og hverjir það voru sem það gerðu?

Minnisblaðið um Icesave, Ólafur, hver samdi það og um hvað fjallaði það?

Þú titrar Ólafur minn, þú titrar, en það er margt skynsamlegt sem kemur frá þér.

[Ólafur Als, 2.12.2009 kl. 18:01]

Þjóðin titrar, enda tekur hún ekki undir roðadrauminn, né annan heltekinn sannleika, sem hefur lagt fleiri sálir í þrældóm og gapastokk en aðrar áþjánir mannkyns samanlagt. Bleikar eða rauðgrænar, sitthvað útþynntar útgáfur af heilögum sannleika, er seinteknari kyrking vitundar og vilja.

Gagnrýni á Icesave nú hefur ekkert að gera með mistök fyrri yfirvalda. Þó svo að t.d. samfylkingin hafi verið heilalaus í ríkisstjórn Geirs Hilmars þá megum við gera ráð fyrir að hún hafi vaknað af þyrnirósarsvefni sínum, ekki satt Þorsteinn? Feigðarósinn, sem stjórnvöld gömul og ný, hafa stefnt að, og sumir vinstri menn nú vilja kenna við sinn kreppta vinstrihnefa, má líkja við vitfirringu. Og tilburðir í þá vera að líkja minnisblaði við raunverulega samninga er aumur útúrsnúningur og einungis til þess gert að firra núverandi ráðamenn ábyrgð. Þeirri ábyrgð sóttust valdhafar eftir.

Já, er nema von að þjóðin titri.

[Þorsteinn H. Gunnarsson, 2.12.2009 kl. 18:29]

Ég  vil nú ekki fullyrða um það að Samfylkingin sé heilalaus en meðlimir hennar margir eru nú frekar naumir og það er leiðinda hefð, sem hefur skapast þar á tímabili að ekkert mætti gagnrýna.

En heilinn virðist heldur ekki hafa verið til staðar hjá Sjálfstæðisflokknum og það er mér áhyggjuefni því ég þekki þá ekki af öðru en að velta málum vel fyrir sér. En þar er komið að sama málinu, það mátti aldrei hafa hátt á heimilinu.

En svo þegar Davíð kom óvænt á landsfundinn, aldeilis ekki niðurbrotinn maður og sagði gamansögur, þá klöppuðu Sjálfstæðismenn, titrandi og engin veit af hverju þeir klöppuðu.

Ég segi það alveg hreint út Ólafur minn og þú mátt hafa það eftir mér við hvern sem er að ég hefði helst viljað að minnisblaðið hefði verið rifið strax við stjórnarskiptin.

Hinn nýi galdur stjórnmálanna í dag er að vera á móti sjálfum sér en að sitja í stjórn samt og þetta þurfa Sjálfstæðismenn að tileinka sér.