Valin Maður ársins í háðungarskyni

Það verða að teljast tíðindi að erfðaprinsessa flokkseigendafélags VG, súperpúman Svandís Svavarssendiherradóttir, skuli hafa verið valin maður ársins af hlustendum Rásar tvö. Og skýringin liggur ekki í augum uppi. Þvert á móti. Þó skal fúslega viðurkennt að SS súperpúma er gædd ágætu kjaftaviti sem hún kryddar með hátíðlegu orðbragði í kansellístíl að hætti frændgarðs og vina í flokkseigendaelítunni. En því miður er sjaldnast orð að marka sem fram gangur af munni elítuskrílsins í VG, þrátt fyrir hátimbraðan munnsöfnuð og ósvikinn vindbelging. En þó má svo sem vel vera að hlustendur Rásar tvö hafi valið sendiherradóttirina mánn ársins í háðungarskyni fyrir rassaköstin í REI-málinu og dauðaþögnina þar á eftir.

Svandís maður ársins

Ókræsilegur félagsskapur á Bessastöðum

Það var fremur ókræsilegur félagsskapur sem forseti Íslands boðaði til fundar við sig á Bessastöðum kl. 10:30 í morgun. Samkvæmt hefð er þessi samkoma kölluð ,,ríkisráðsfundur" en ætti, samkvæmt eðli stöðunnar í dag, að heita eitthvað annað, t.d. uppskafningamót eða eitthvað í þá veruna. Ég vil meina að það sé ekki samboðið íslenskri þjóð að hina svokölluðu ,,ríkisráðsfundi" sitji fólk eins og Guðlaugur Þór Þórðarson, Össur Skarphéðinsson, Einar Kr. Guðfinnson, Árni Matthísen, Björgvin Sigurðsson, Þorgerður Katrín Gunnarsdóttir, Kristján Möller og Björn Bjarnason. Það er, þegar alls er gætt, ekkert gamanmál fyrir almenning að sitja uppi með annan eins ruslahaugamat og ríkisstjórn Íslands er. 

Ríkisráðsfundur á Bessastöðum

Bush, snaran og Saddam

Hvar ætli hafi fleiri mannslíf á samviskunni í Írak, Saddam sálugi Hussein eða bandarísk stjórnvöld? Sem aftur vekur upp spurninguna hvort ekki væri hollt fyrir fleiri en Saddam að fá að dingla í snörunni eins og stundarkorn. Það er nefnilega jafnmikill glæpur þegar Bush drepur manneskju og þegar Saddam lét slíkt hið sama ganga yfir aðra manneskju því málstaður morðingja er alltaf óafsakanlegur og glæpsamlegur. 

Ár liðið frá aftöku Saddams

Osama óskabarn Sjálfstæðismanna

Það er sjálfstæðismönnum á Íslandi, semog annarsstaðar, áreiðanlega mikið fagnaðarefni að heyra milda rödd óskabarns síns, Osama bin Laden, af segulbandi, eins og gerðist í dag. Það eru eftirvill ekki allir þess meðvitaðir að Osama þessi gegnir veigamiklu embætti fyrir málstað og tilverurétt sjálfstæðismanna um heim allan. Í nokkur ár hafa kvöld- og morgunbænir trúfastra sjálfstæðismanna byrjað á þessa leið: Gvöð gefi að bin Laden færi oss í dag eins og eitt hryðjuverk svo vér getum hert á vopnuðu frelsi voru, vopnuðu lýðræði voru, vopnuðum friði vorum, vopnuðum árásum vorum, vopnuðum innrásum vorum, vopnuðum útrásum vorum, vop ...  

Bin Laden varar súnníta við

Skammarleg meðferð á víni

Óttalegir ólánsgemlingar eru það sem fyrirskipa að ágætu innlendu víni skuli eytt eins og hverjum öðrum eitruðum óþverra. Nær hefði þá verið að gefa Björgólfi SÁÁ Landsbankagúrú vöruna svo hann gæti aftur gefið hana meðlimum ríkisstjórnarinnar. Ég er alveg brand sjúr og handviss um að Gjeir Haaarde hefði ákaflega gott af að drekka sig virkilega blindfullan og útúr af heimagerðu, rammíslensku og velgerðu landabruggi. Sömuleiðis veit ég að Öszuri kunningja mínum þætti mikið í það varið að staupa sig á sama drukk að næturþeli við tölvubloggið sitt. En að eyða þessu fína víni, eins og um væri að ræða mjólkurkú uppfulla af miltisbrandi, er að mati meirihluta þjóðarinnar algjör hryllingur og stór-hneysa.  

Heimabruggi verður eytt

Ekki fals heldur lýgi og óskhyggja

Það er víst ekki alveg sami hluturinn að falsa og ljúga, þó fals og lygi séu náin skyldmenni. Sennilega hefur kerlingarnæpunni, móður stúlkunnar í Texas, gengið gott til að skrökva því upp að faðir stúlkunnar hafi geyspað golunni í vegkanti í Írak og eflaust hefur hún óskað þess að það hefði gerst í raun og veru. En því miður varð konugarminum ekki að ósk sinni svo hún tók til bragðs að veifa frekar röngu tré en öngu, í nafni dóttur sinnar.

Falsaði fráfall föður í ritgerðarsamkeppni

Gróf árás á íslenskan iðnað

Það er óhætt að segja að illa sé búið að íslenskum iðnaði þegar lögregla getur komið þjótandi eins og þjófur að nóttu og lokað heilu verksmiðjunum í fullum rekstri að eigin geðþótta. Það hefur löngum þótt ágæt búbót og atvinnuskapandi að framleiða spíritusinnihaldandi gleðigjafa til sölu og eigin þarfa og þeir menn sem það iðja kallaðir bjargvættir og sannir mannvinir undir vissum kringumstæðum. Mér finnst að ríkisstjórnin, með iðnaðarráðherra í broddi fylkingar, ætti þegar í stað að taka fram fyrir höndurnar á lögreglunni og tryggja áframhaldandi starfsemi verksmiðjunnar sem lögregluófétin lokuðu í gærkveldi. Og vér skulum muna hið fornkveðna, að ljúfur landi linar þraut.  

Bruggverksmiðja fannst í heimahúsi

Lifi félagi Fídel

Það er ekki seinna vænna fyrir unga íslenska sósíalista að bregða sér af bæ og heimsækja stórmennið og hetjuna félaga Fídel og bergja af hugmyndafræði og reynslu meistarans í Havana. En í bréfi til kúbanska þingsins segir félagi Fídel, sé rétt eftir haft: „Það er grundvallarskylda mín að ríghalda ekki í völdin og að standa ekki í vegi fyrir ungu fólki heldur að miðla af reynslu minni og hugmyndafræði.”

Castro segist hafa breyst

Hneykslanlegur verðlaunagripur

Kjörið á ,,íþróttamanni ársins" í þetta sinn er hreint og beint hneyksli og verður eflaust í framtíðinni talið til ævarandi skammar. Hvað á svona lítil stelputítla að gera við svona stórt og groddalegt tréverk, sem einhverjir spaugarar kalla af sinni fátæku andagift ,,verðlaunagrip? Hún getur ekki einusinni haldið á þessu bölvaða hrófatildri einsömul. Látum nú vera þó stelpugreyið hefði verið valin ,,íþróttamaður ársins" ef verðlaunagripurinn væri nettur kertastjaki, eða einhver annar snotur hlutur í þeim dúr. En þetta andskotans grindverk sem íþróttafréttaritarar bjóða afreksfólki uppá í dag hæfir einungis útbelgdum kraftajötnum, nauðasköllóttum af steraáti, og slíka náunga eiga fréttaritararnir að útnefna fyrir þennan hroðalega verðlaunagrip. Ef þessir smekklausu íþróttaskríbentar hafa einhvern vott af beini í nefinu ættu þeir að biðja Margréti Láru opiberlega ofsökunar á taka við þessum ósköpum úr höndum þeirra. En Margréti Láru sjálfa hvet ég til að henda verðlaunagrindverkinu á næstu áramótabrennu svo það verði úr sögunni fyrir fullt og allt.

Margrét Lára íþróttamaður ársins

Sólkerfaður óaldarflokkur

Djöfullinn hafi það, en mér er um megn að skilja afhverju þessum flokkanefnum er ekki steypt saman í einn óaldarflokk, þetta er hvort sem er eitt og sama sólkerfið þar sem Samfylking, Framsókn, Frjálslyndir og VG snúast án afláts eins og kaldhamraðir og náttúrulausir fylgihnettir kringum Sjálfstæðisflokkinn í keppni um hver fær að rorra á brautinni næst sólu.

Litlar breytingar á fylgi við flokkana