Valvan inná Vog fyrir 15. jan. 2008

Ég er ansi hræddur um að Völvu-garmurinn hafi verið drukkin þegar hún var að brasa við að spá fyrir næsta ár. Ég á þá ekki við að hún hafi verið svona sætkennd og samkvæmishæf heldur blindfull - moldþreifandi mígandi dauðadrukkin. Að láta sér detta í hug fólk sem kysstist á munninn á Þingvöllum í vor slíti ástúðlegu sambandi sínu sisvona á næsta ári nær nattúrlega ekki nokkurri átt. Þessháttar óraðshjal vellur ekki uppúr nema langdrukknu ógæfufólki. Og að Reykjavíkurmeirihlutinn verði sprengingu að bráð á næsta ári undirstrikar ömurlegt ástand Völvunnar því umræddur meirihluti sprakk á þessu ári en ekki því næsta. Þórarinn Tyrfingsson er ekki öfundsverður að þurfa að afeitra Völvuskjátuna inni á Vogi eftir áramót, en ég spái að komið verði með hræið í morauðum strigapoka og því sturtað inná mitt gólf á Vogi fyrir 15. janúar 2008. 

Völvan spáir stjórnarslitum

Skoðanir og kannanir á femínistum

Af gefnu tilefni vil ég minna á skoðannakönnun um femínistana okkar á http://www.joiragnars.blog.is/blog/joiragnars/ Það er víst óhætt að segja að viss tegund fémínístakvenna hafi vakið athygli á sér með framgöngu sem ýmsum finnst vafasöm að meira eða minna leyti. Reyndar hafa árásir hægrisinna allra handa verið mjög áberandi með óvöldu orðbragði á umrædda fémínístategund, sem er einkennilegt þar sem hugsjón tegundarinnar byggist mjög á einhverskonar afbrigði af yfirstéttarfémínísma og ætti því að falla ójafnaðarskarni á hægri vængnum vel í geð.

Fegursti femínistinn valinn

Osama komst yfir tvo gáma

Átti ég ekki á von. Þarna hefur Osama bin Laden verið að verki ef ég þekki hann rétt. Það eru aðeins stórhuga afreksmenn sem stela tveimur gámum af sprengiefni af sama léttleika og þegar fermingarstrákur hnuplar tyggjópakka í Bónus. Og hvað ætli Osma hafi ætlað að sprengja í loft upp hér í okkar friðelskandi leppríki? Það er ómögulegt að segja. Máske höfuðstöðvar Sálarransóknarfélagsins eða Framsóknarflokksins?

Gámar með sprengiefni fundust

Al-Qaeda til Íslands á næstunni

Afskaplega eru þær nú athyglisverðar fréttirnar af velheppnuðum ránum í Danaveldi milli hátíðanna. Þar vantar ekkert uppá nema að við sé bætt að grunur leiki á að Alkæjetasamtökin standi á bak við tiltektirnar. Raunar minnir mig að einhversstaðar hafi ég séð þess getið að vitni hafi heyrt ræningjana tala saman á arabísku og þarf þá vart fleiri vitnana við. Ekki kæmi mér á óvart, miðað við fréttaflutning undanfarinna missera, þó íslenskir fréttamenn taki uppá að bendla áðurnefnd Alkæjetasamtök við eitt og annað sem aflaga kann að fara hér uppi á Íslandi, svo sem eldsvoða, eitulyfjasölu, misyndisverk, svo eithvað sé nefnt, jafnvel jarðskjálfta og eldgos. Og þar sem íslenskir fréttamenn eiga til að vera andríkir og stórhuga má búast við að þeim takist að blanda sjálfum Osama bin Laden inn í misgengi mála hérlendis.

Vopnað rán í Danmörku

Það hressir anda klerka vorra og skerpir kenningu þeirra

Slagsmál prestanna í fæðingarkirkju frelsarans í Betlehem sýnir oss að enn eru til karskir klerkar og kappsamir. Ég er ekki frá því að það væri hollt fyrir vora þjóðkirkjulegu sálusorgara að útkjá sum þeirra erfiðu deilumál á grískkaþólska vísu. Það myndi hressa anda klerka vorra og skerpa kenningu þeirra. Ósköp hefði til dæmis verið affarasælla í alla staði ef þjónar kirkjunnar hefðu komist að niðurstöðu í giftingarmáli samkynhneygðra með handalögmálum í stað handauppréttinga því þá hefðu þeir komist hjá að eyða dýrmætum tíma sínum í útþynnandi málamiðlanir og baktjaldamakk.

Slegist í fæðingarkirkju frelsarans

Þórðargleði illgjarnra svía.

Það kallar maður nú þórðargleði í lagi, að leggja lykkju á leið sína til að gleðjast yfir óförum annarra, eins og þessir illgjörnu svíapungar sem paufuðust af ómennsku sinni niður að höfn til að flissa að Wilsoni Garstoni stönduðum við brimvarnargarðinn með blindfullan stýrimann í brúnni og skipstjórann dauðan aftur í bestikki.

Jólagönguferð til að skoða strandað skip

Ófétin Heiða Klumb, van Klíf og Arpels

Æjá, hún hefur alltaf verið illa ófróm kerlingarnornin hún Heiða Klumb - alveg frá barnsaldri. Ég þekkti þetta kvikindi þegar það var krakki en þá var hún svo þjófótt að til stórrar hörmungar mátti telja. Síðar frétti ég hún hefði verið sett á villibarnaheimili og þar byrjaði hún víst að drekka fyrir alvöru. Ég veit mæta vel að Heiða Klumb, sem sá og sér fyrir sér með nekt sinni, hefur margt verra á samviskunni en að stela einhverjum hégóma frá firmanu, Van Klíf & Arpels. Reyndar eru þeir félagar, van Klíf og Arpels djöfull, sjálfir bölvuð aplafyl og rottur og andskotann ekkert skárri en Heiða garmurinn. Hér áður og fyrr, þegar réttlæti var í heiðri haft, hefði allt þetta hyski verið dæmt til að fara þrjá saltfisktúratúra í beit á gömlu síðutogurunum okkar. En það hefðu þessi hænsni vissulega ekki þolað og drepist úr uppgerð, strax í fyrsta túr og málið þar með blessunarlega úr sögunni. 

Heidi lögsótt

Gataði dekk frelsaranum til dýrðar

Það hefur löngum verið siður mannfólksins að fagna fæðingarhátíð frelsarans með ýmsu móti; sumir klæða sig uppá og sækja guðsþjónustur, aðrir kalla Bakkus konung sér til fulltingis og láta ófriðlega. Enn aðrir stinga gat á hjóbarða lögreglubifreiða, frelsaranum til dýrðar, en þó aðallega til að ná sér niðri á smámunasömum lögregluþjónum sem af hengilmænuhætti sínum og fálkaskap láta sér sæma að skipta sér af góðglöðum ökumönnum. Ekki leist Almættinu samt betur á frelsisboðskap hins hefnigjarna útnesjamanns en svo, að hann vísaði lögreglumönnunum á hvar dólgurinn faldi sig í heldur svona vafasömu og úfnu jólaskapi. En þar sem ég er mjög kristilegur til hugans í dag, vona ég að dekkjabaninn keflvíski hafi sofið vel svefni hinna réttlátu í fangelsisherberginu. 

Sprengdi dekk á lögreglubílum

Hagið ykkur skikkanlega ...

Óska öllum bloggvinum mínum, semog öðrum bloggurum og blogglesurum gleðilegra jóla. Og hagið ykkur nú skikkanlega yfir hátíðarnar, skepnunar mínar. Ég vil ekki hafa að nokkur ykkar taki uppá einhverjum þeim látum sem gæti leitt af sér handtöku og vist í fangelsi eins og eina nótt, að ég tali nú ekki um lengur.  

Byltingarsinnaðir jólasveinar

Hver fjárinn ætli hafi hlaupið í jólasveinaþrjótana í borginni Kristskirkju á Nýja Sjálandi? Þeir hafa máske etið eitthvað görótt onísig og fyllst af heilögum byltingaranda. Mikið væri gaman ef þeir sæju sér fært að mæta á næsta landsfund Sjálfstæðisflokksins og hræða auðvaldsgrýlurnar og græðgisleppalúðana sem þar munu sitja til borðs svo glæsilega að Sjálfstæðisflokkurinn yrði lagður niður í eitt skipti fyrir öll.

Jólaólæti