Nú skal fita stelpuandskotann.

Mikið óskaplega er ástandið alvarlegt hjá henni Nikkólu Richie, sem er svo fræg fyrir að vera vinkona Parísu Hiltón. Að neita að heimsækja mömmu sína Brendu á sjúkrahús er grátlegt, ekki síst fyrir þá sök að Brenda mamma var þar í ,,legnámaðgerð." Samkvæmt fréttum er Nikkóla upp á kant við mömmu sína út af einhverjum kantskera og þar af leiðandi hefur þeim ekki komið vel saman að undanförnu. Svo er Nikkóla farin að léttast hrikalega, sem vel getur stafað af ósamlyndi þeirra mæðgna. En nú er Nikkóla, sem betur fer, blessunarlega komin í ,,meðgerð" við ófeitinni, sem þýðir að það á að reyna fita stelpuandskotann svo að hún rói í spikinu á eftir og verði jafnvel svo feit að Jón Hreggviðsson hefði samþykkt hana sér til handa þegar hann bjó í svatholinu að Bessastöðum. En samkvæmt Íslandsklukkunni stakk Jón uppá því við nafa sinn Þeófílusson að þeir reyndu að galdra velfeitan kvenmannsbelg niður til sín í fásinnið og kvenmannsleysið í svartholinu.

Nicole Richie upp á kant við móður sína

Vodki er bráðnauðsynlegur kraftaverkadrykkur.

Ósköp var það vel til fundið hjá úngfrú Evu að hella dálitlum vodka niður í vömbina á sér áður en hún sté á svið til að leika kynlíf með einhverjum strákhvolpi.

Eins og allir vita þá er vodki alveg bráðnauðsynlegur og athafnahvetjandi kraftaverkadrykkur þegar æxlunarhvötin gerir vart við sig hjá metnaðarfullu fólki. Þá er það vísindaleg staðreynd, þó henni hafi ekki verið flaggað mikið, að flestir okkar bestu borgarar hafa komið undir þegar foreldrarnir voru svo stútfullir af vodka að þeir vissu ekki handa sinna skil. Auk þess hafa öll helstu afrek og hervirki á kynlífssviðinu, sem vitað er um, verið unnin með aðstoð vodkaflöskunnar; nægir í því sanhengi að minna á að Jón Stáltittlingur gerði sér hægt um vik hér um árið og barnað  einu og sömu nóttina fjórar kvinnur. En hann hafði, áður en hann lét til skarar skríða, drukkið eina og hálfa flösku af vodkadrykk, ættuðum úr ríki Jóseps sáluga Stalíns.  

Þarf vodka fyrir kynlífssenur

Maðurinn sem kunni ekki gott að meta.

Það mætti ætla að blessaður maðurinn hafi verið búinn að fá leið á gistivináttu Georgs Bush og Tona Blair og ákveðið að færa sig úr einu himnaríki yfir í annað himnaríki. Það segir sig sjálft að þarna hefur maðurinn gert mikil mistök því himnaríki Bush og Blair í sólinni á Kúbu er marfallt yndislegra en sælustaður Guðs Almáttugs á himnum uppi. Auk þess eru sómamennirnir Bush og Blair sérlegir góðvinir Íslensku ríkisstjórnarinnar, sem stutt hefur þá með ráðum og dáð í átökum þeirra við olíueigandi villutrúarmenn.

Fangi í Guantánamo fangabúðunum framdi sjálfsmorð

Krossar festir á ræningja.

Þessi maður verður áreiðanlega sæmdur Stórriddarakrossi hinnar Íslensku Fálkaorðu þann 17. júní næstkomandi. En það hefur löngum verið lenska á Íslandi að hengja krossa á ræningja meðan aðrar þjóðir hengja ræninga á krossa. Er þá skemmst að minnast, að þá er frelsarinn var krossfestur vóru ræningjar tveir krossfestir honum til samlætis. En vér Íslendingar höfum semsé annann háttinn á þegar notkun krossa eru annarsvegar.

Í gæsluvarðhald vegna ráns

Orustugnýr við Bröttugötu.

,,Upp úr þankagöngu minni spratt sú hugmynd, að enda þótt ég gæti ekki vegið innrásarmennina vopnum, þá skyldi ég leggja á þá hendur hvenær sem færi gæfist. Síðan hóf ég skæruhernað með þeim hætti, að ég slóst á tal við hermennnina og lokkaði þá inn í herbergi mitt í því skyni að láta þá troða við mig illsakir, sem leiddu til handalögmáls. Gekk þetta mjög vel. En þar sem aðgerðir mínar brutu nokkuð í bága við kröfur þær, sem húsráðendur á Bakkastíg gerðu til heimilisfriðar, þá varð ég skjótlega að rýma herbergi mitt þar og fluttist þá í Bröttugötu.

Eitt sinn fór ég með þrjá franska Kanadamenn inn í herbergi mitt í Bröttugötunni, en þeir voru hinn mesti óargalýður, sem til Íslands kom á stríðsárunum. Er þess enda skammt að bíða að þeir brjóti af sér því tóku að stela því litla, sem ég átti í herberginu, en ég heimti það af þeim aftur og kom þá til átaka, sem urðu býsna hörð og hafði ég þá undir alla þrjá og hélt þeim. Fólkið í húsinu hringdi strax á lögregluna og komu enskir lögreglumenn með Íslendingunum, en þegar þeir birtust í gættinni þá segi ég: Ég er meiri en Víga-Hrappur, því ég hef þrjá undir.

Í annað sinn komu til mín tveir Kanadahermenn og verður enn slagur og munaði minnstu að ég hengdi þá, en féll frá því og seildist eftir öxi minni. En rétt í því ég ætlaði að höggva þá, kom lögreglan og auðnaðist mér aðeins að fela vopnið.

Enn komt il mín fjögurra snúru foringi úr brezka sjóhernum og lagði til atlögu við mig. Honum sló ég við miðstöðvarofninn, en áður hafði ég rifið af honum öll fötin. Þegar lögreglan bar hann út í bílinn lagði ég einkennisbúning hans ofan á hann með engri virðingu. Skór hans urðu eftir hjá mér og seldi ég þá sem herfang fyrir tíu krónur þar eð þeir voru of litlir mér.

Skömmu síðar kemur svo vinur minn Sveinn Sæmundsson yfirlögregluþjónn og afvopnar mig. Tók hann bæði sax og öxi. Hélst það í hendur, að ég var hrakinn burt úr húsinu við Bröttugötu um líkt leyti, því íbúarnir skelfdust orustugnýinn."

Úr veraldarsögu Péturs Hoffmanns Salómonssonar, Þér að segja. 

Að pissa framan í kjósendur er góð skemmtun.

Þessi frétt minnir mig á annað atvik sem átti sér stað á dögunum. En það var þegar Samfylkingin, með frormann sinn í broddi fylkingar, gerði sér lítið fyir og pissaði glaðbeitt og skellihlægjandi beint framan í kjósendur sína að kosningum loknum og skreið að svo búnu beint í niðursetningsfletið hjá Sjálfstæðisflokknum. Það getur vel verið að Ingibjörgu Sólrúnu og Össuri svila þyki bæði flott og fínt að gegna vinnumennsku hjá Guðlaugi Þór og Birni Bjarnasyni, en kjósendur Samfylkingarinnar upplifa flottheitin eins og verið sé að spræna framan í þá.

En vonandi fer fyrir samfylkingarelítunni eins og náunganum sem meig utan í lögreglubílinn: sem sé að iðrast sáran og sjá eftir öllu saman þegar hún hefur áttað sig á fíflskunni.

Pissaði á lögreglubíl

Össur vekur upp draug af Framsóknarallaballakyni.

Gamansamur maður Össur Skarphéðinsson. Hann hefði svo sem alveg getað ráðið einn eldhúskollinn heima hjá sér til að aðstoða sig í ráðuneytinu, hann gerði absolút meira gagn en Einar Karl. Það ætti, andskotakornið, að vera hægt að fá sér sæti á kollinum, en það er töluvert meira gagn en hægt er að hafa af Einsa.

Mér finnst að einhver góðgjörn manneskja ætti að hafa samband við Mánga Skarp hjá Sálarrannsóknarfélaginu og láta hann vita af því að Össi bróðir hans sé búinn að vekja upp löngu liðinn draug af Framsóknarallaballakyni og ætli að brúka kauða sér til aðstoðar, sem auðvitað getur aldrei orðið nema í skötulíki.

Einar Karl ráðinn aðstoðarmaður Össurar

Gljárakað stertimenni á framabraut.

Mikið ósköp kemur þetta atvik kunnuglega fyrir sjónir. Það er eins og ég hafi heyrt eitthvað álíka fyrir um það bil ári síðan. Ég geri fastlega ráð fyrir að hinn syfjaði ökumaður sé að minnsta kosti eitt af þessum gljárökuðu stertimennum á framabraut. En stertimenni af þessu tagi eru gjarnan slíkir frelsisunnendur og hugsjónamenn að þeir eira engu sem komið getur í veg fyrir ótruflaðann harðasprett þeirra upp metorðastigann. 

Ók á skilti og sofnaði

Framtíðarsnillingar áttunda áratugarins!!!

Á meðfylgjandi mynd má þrjá framtíðarsnillinga á miðjum áttunda áratugnum. Frá vinstri: Níels Ársælsson, Jóhannes Ragnarsson og Guðmundur Matthíasson.

Í baksýn er Hraðfrysthús Tálknafjarðar, en þar gerðust ýmis undur og stórmerki á þeim áratug sem myndin er tekin

Brandur Jónsson og afrek hans.

Hér gefur að líta heiðursköttinn og veiðiklóna Brand Jónsson.

Eins og við var að búast hefur Brandur Jónsson haft í mörgu að snúast þessa dagana við að taka á móti farfuglum sem komið hafa í flokkum til okkar á Snæfellsnesið. Nú þegar hefur hann lagt að velli á níunda tug fugla af mörgum stærðum og tegundum, ber þar hæst grágæs nokkra sem hann tók af lífi án nokkurrar miskunar niðri í Dal á bökkum Hvalsár.

Meira verður sagt frá snörpum viðskiptum Brands við nýaðkomið fiðurfé á næstunni.