Þér að segja.

,,Nú þurstu Danir út um kráardyr ekki færri en þrjátíu saman og sóttu allir að mér. En svo fór á skammri stundu að sex lágu fallnir. Hörfuðu hinir þá yfir götuna og fluttu með sér særða menn í öngviti. Stóð ég þá einn fyrir kráardyrum, en hinir andspænis mér og horfðumst við á yfir breiða götuna.

Þá er það að Danir senda fram gegn mér einn heljarmikinn mann. Ekki hefur hann verið minna en 195 sentímetrar á hæð og digur að sama skapi. Vel búinn maður með manséttur.

Daninn gengur nú á móti mér yfir götuna með boxaratilburðum, en fer sér hægt í fyrstu svo mér gefst tóm til að hugsa um hvaða brögðum ég skuli nú beita til þess að leggja risann að velli.

Það hafði ég ekki hugleitt til hlýtar þegar hann tók undir sig stökk og á mig. En hitt er víst, að mér brást ekki á síðustu stundu að taka hann réttum tökum. Ég tók annarri hendi í buxnaklauf mannsins og hinni í brjóst hans, hóf hann á loft og kastaði honum. Hann sveif yfir götuna og kom niður skammt frá gngstéttarbrúninni þar sem hinir stóðu. Og það sem ég ekki kastaði honum á lofti, það skondraði hann eftir götunni svo hann staðnæmdist ekki fyrr en í rennunni við tærnar á þeim.

Á þetta horfðu þeir, liðlega tuttugu manns með sex óvígfæra liggjandi á götunni að baki sér, og höfðust ekki að gegn mér.

Danir komu ekki aftur. (Úr bókinni: Þér að segja - Veraldarsaga Péturs Hoffmanns Salómonssonar)

Líkkistumaðurinn og Björn Pétursson í Öxl

Ég er ansi smeykur um að ferðalangur þessi geri ekki grein fyrir ,að hann er staddur í landi þar sem niðjar Björns sáluga Péturssonar frá Öxl í Breiðuvíkurhreppi eru á hverju strái. En eins og flestir vita, var Björn frá Öxl þekktur fyrir flest annað en gera gælur við ferðamenn, enda lauk ferðalögum túrista gjarnan að Öxl og spurðist harla fátt tilþeirra eftir það. Við getum því leitt að því líkum hvaða traktéringar útlenskur hjólreiðagarpur með líkkistu í eftirdragi hefði fengið að Öxl, þá er Björn Pétursson var bóndi þar.

Nú er bara að sjá, hvort öll ferðaþjónustugen frá Birni sáluga forföður okkar, séu að fullu til þurrðar gengin hjá afkomendum hans.

Á hjóli með líkkistu í eftirdragi

Hve glöð er vor kókaínæska.

Ég hefði haldið að stelpuskiturnar vissu að leggöng eru fyrir löngu úreltur felustaður fyrir kókaín og annað þessháttar. Þó verður að virða þeim til vorkunnar hve ungar þær eru og lítt reyndar í lífsins fjölbreyttu klækjum. Á móti kemur þó, að með í för var karlmenni nokkurt, tíu árum eldri en telpurnar og hefði sá átt að geta haft vit fyrir þeim í þessum efnum. En sennilega er þetta hinn mesti labbakútur og apaköttur, að öðrum kosti hefði hann aldrei tekið í mál að stúlkurnar hefðu geymt hressinguna á jafn dónalegum stað og raun ber vitni. Og væri þetta sannur karlmaður hefði hann auðvitað ljáð eigin rassboru sem geymslustað fyrir stöffið.

Tvær 17 ára stúlkur földu um 40 gr. af fíkniefnum innvortis

Bara einn varalitaður bóndi.

Það er af sem áður var þegar gildir bændur riðu til þings með Njál Þorgeirsson og Gunnar Hámundarson fremsta í flokki, já og síðar Eggert Haukdal og Egil á Seljavölum. Nú er bara eftir einn varalitaður bóndi í sölum Alþingis.

En hvað ætli margir húskarlar kvótabændanna eigi sæti á þingi og sporti sig þar um eins og montnir hanar?

Þá er ekki úr vegi að minna á að samtök launafólks eiga ekki nema einn fulltrúa á Alþingi: Ögmund Jónasson, sem reyndar er margra manna maki.

Einn bóndi eftir á þingi

Hún iðar öll af kæti og hoppar á öðrum fæti.

Fastlega má gera ráð fyrir að Jóhanna Sig. iði öll af kæti og hoppi á öðrum fæti í tilefni af því að vera komin aftur í ríkisstjórn fyrir Sjálfstæðisflokkinn; hún hefur nú alltaf verið svo mikil hugsjónamanneskja hún Jóhanna. Ekki þarf að efa, að hin silfurslegna krataDrottning mun berjast eins og röndótt hófaljón í haga fyrir velferð allra skjólstæðinga félagsmálaráðuneytisins í nafni Sjáfstæðisflokksins og mun fyrir vikið hljóta hrós yfirtéttarinnar fyrir að ,,vera svo aumingjagóð," eins og það er kallað á gustukarmáli þeirrar stéttar.

Magnús afhenti Jóhönnu lykil að velferð skjólstæðinga félagsmálaráðuneytis

Össur , Herrann og turninn sem hrundi.

Í nafni hvaða herra ætli hægristjórn Össurar Skarphéðinssonar ætli að sigla? Auðvitað er óþarfi að spyrja svona spurningar, því umræddur drottinn í þessu tilfelli er auðvitað Mammon, guð ágrindar, græðgi og peningahyggju. Nú er semsé komið á daginn, að Samfylking Össurar og og svilkonu hans er lítt við alþýðuskap en þeim mun hændari að auðvaldi og erkibiskupum þess. Nú þarf ekki lengur að taka Ísland út af lista hinna staðföstu þjóða lengur; ónei, það er alveg nóg að harma stríðsátökin í Írak. Einusinni ætlaði Samfylkingin sér að verða ,,turn" í Íslenskum stjórnmálum en endaði sem fletgenginn niðursetningur í dyngju Íhaldsins, sem trúlega notar þurfalinginn mest til að skvetta úr koppum auðhyggjunar yfir alþýðuna á Íslandi. Það er engin smáræðis reisn yfir fyrrum tilvonandi Turni.

Við útfarir grípa klerkar oft til þess að tilkynna viðstöddum, að nú hafi hinn framliðni, sem verið er að jarða, ,,lagt á djúpið". Í ljósi þess að turn Samfylkingarinnar er hruninn og hún sjálf dáin inn í Sjálfstæðisflokkinn, er hið prestlega orðbragð Össurar ráðherra mjög viðeigandi.

Ný ríkisstjórn tekin við völdum - lagt á djúpið í herrans nafni

Að éta Íraksinnrásina ofan í sig.

Aðvitað stóð ekki á Ingibjörgu Sólrúnu og hennar hyski að éta aðild Íslands að innrásinni í Írak ofan í sig og láta sér nægja að harma átökin þar. Þvílíkir bölvaðir aumingjar. Þó talaði þetta fólk fyrir kosningar um að vera Íslands á lista ,,hinna viljug þjóða" væri eins og fleinn í holdi þjóðarinnar. Á fréttamannafundi formanna ÍhaldsogSamfylkingar á Þingvöllum í morgun, reyndi frú Ingibjörg að drepa málinu á dreif með kjaftaþvæli um fortíð og framtíð. Það er svo sem ekkert nýtt að ég fái á tilfinninguna, að Samfylkingarforstýran tali til fólks eins og það sé upp til hópa eintóm fífl.   

Frá og með deginum í dag getur fólk afskrifað Samfylkinguna sem vinstriflokk, fyrir fullt og allt.

Ný ríkisstjórn harmar stríðsreksturinn í Írak

Yfirstéttarfemínismi og verkakonur.

Hvort konur eru fleiri eða færri, í stjórnum 100 stærstu fyrirtækja landsins, kemur jafnrétti ekki nokkurn skapaðan hlut við. Yfirséttarfemínismi er yfirstéttarpólitík og nákvæmlega ekkert annað. Það hefur verið sorglegt að horfa upp á hvernig þessi tegund af yfirstéttarbrölti hefur heltekið stjórnmálasamtök sem sögð eru til vinstri, látum vera þó svona hundakúnstir séu iðkaðar innan Sjálfstæðisflokksins. Og hvað eiga t.d. konur í verkalýðsstétt sameiginlegt með efri-milliséttar og yfirstéttarkerlingum? Svarið liggur í augum uppi: Ekkert. Um slíkt þarf varla að hafa fleiri orð.

Ef að fólki er alvara með  kvennapólitík þá verður hún að vera háð á forsendum verkalýðsstéttarinnar. Yfirstéttarfemínismi, sem rekinn hefur verinn innan VG í skjóli meintrar vinstri stefnu þess flokks, er að mínu mati skandall sem VG verður að hreinsa sig af ef sá flokkur vill vera trúverðugur á þessu sviði.

Jafnrétti kynjanna í 100 stærstu fyrirtækjum landsins ábótavant

Hvað ætli Græna Kvenfélagið í Reykjavík segi við þessu?

Hvað ætli Græna Kvenfélagið í Reykjavík segi við ályktun í nafni VG í Ísafjarðarbæ þar sem ekkert er minnst á Kárahnjúkavirkjun eða fémínísma? Ég er ansi hræddur um að sá fénaður líti slíkt illu auga, ef hann fær ekki slag og heilablóðfall af æsingi. 

Vilja að stjórnvöld grípi til aðgerða á Flateyri

Samfylking deyr inn í Sjálfstæðisflokk.

Minningarorð. 

Það hlýtur að vera dásamlegt fyrir Samfylkinguna, og verðugt tilefni til að halda uppá, að vera deyja svona þegjandi og hljóðalaust inn í Sjálfstæðisflokkinn. Ég get ekki setið á mér að votta aðstandendum hins deyjandi skars hluttekningum mína því þeir deyja sjálfir hið sama.

Á þessum merku tímamótum þegar Samfylkingin, sameiningarflokkur vinstrimanna, er öll, er ekki úr vegi að vitna á Passíusálma séra Hallgríms Péturssonar:

Sjá hér, hve illan enda

Ótryggð og svikin fá;

Júdasar líkar lenda

leiksbróður sínum hjá;

andskotinn íllskuflár

enn hefur snöru snúna

snögglega þeim til búna,

sem fara með fals og dár.

Heilagur faðir, gef að vel verði tekið á móti sál hins framliðna í ríki andanna í Valhöll, Háaleitisbraut 1. - 105 Reykjavík. Amen.

Samfylkingin kveður þingmenn og býður nýja velkomna