Rugl - kvótarugl?

,,Hluti af ruglinu" segir Þorsteinn Már kvótafursti, um ríflega peningaupphæð sem Glitnir gaukaði að einhverjum norskum þurfaling.

Hinsvegar minnist Þorsteinn Már ekkert á fiskveiðistjórnunarruglið á Íslandi, sem er ekki minnsti hlutinn af fjarmálasukki og rugli síðustu ára. Það er full ástæða til að hvetja samherjaforstjórann til að hjóla í kvótaruglið og upplýsa fólk hvernig sú starfsemi gengur fyrir sig. 

„Hluti af ruglinu“

Þorparinn Benedikt og Georg vinur hans

Ó, hvað það er skemmtileg tilviljun að þorparinn Benedikt páfi XVI skuli heimsækja morðvarginn og trúvillinginn Georg Bush fyrstan manna af stétt þjóðhöfðingja. Þetta sýnir, svo ekki verður um villst, að hans heilagleiki er ekkert blávatn og telur ekki eftir sér að gleðja kunningja sinn, sjálfan Erki-Djöfulinn, sem síðast var til heimilis í Helvíti, að því er talið er.

Ekki er að efa, að hinn Heilagi Faðir og Georg Bush munu skrafa ýmislegt gott í bróðerni um aflífun múslima og tilkomumikið sprengjuregn yfir fólk af því sauðahúsi. Þá er ekki ólíklegt, Benedikt XVI, ambassador heilagrar þrenningar á jörðu, syngi Georgi vini sínum hátíðarmessu fyrir dásamlega innrás innrás hans, og hinna viljugu þjóða, í Írak. Á þeirri tilkomumiklu stundu mun engum detta guðlast í hug.

Já piltar mínir, það er ekkert slor að vera innundir hjá hans guðdómlega heilagleika, Benedikt XVI.

Páfi kominn til Bandaríkjanna

Bin Ladenstrákurinn og roskna konan

Sko bara litla Laden, hann hefir verið svo forsjáll að ná sér í roskna konu, sem er líklega tryggilega komin úr barneign. Það má með sanni segja, að ekki eru allir karlmenn svo skynsamir, að afla sér kvonfangs í hópi kvenna sem komnar eru við aldur. En menn af Osamabinladenættum láta ekki að sér hæða þegar kemur að merkisatburðum sem skipta máli. Gamli bin Laden er t.d. einhver sú alhroðalegasta grýla sem kapítalistum á Vesturlöndum hefur tekist vekja upp. Og svo er binladengrýlan römm að kröftum, að á hana bíta engin vopn, ekki einusinni kjarnorku- og napalmsprengjur, hvað þá byssukúlur eða tundurskeyti.

En af því að ladenarnir eru eins kröftugir og raun ber vitni, gæti vel hugsast að litli Laden ætti eftir að barna sína öldruðu eiginkonu, jafnvel þó hún sé algjörlega komin úr barneign. Annað eins hefir nú gerst ...  

Sonur bin Ladens fær ekki að koma til Bretlands

Áföll, ferðagleði og músagangur

Ætli stórkostleg ferðagleði íslensku ráðherrana stafi af því að þeir séu í ,,áfalli" og ,,viti ekki sitt rjúkandi ráð" eins og fjármálaráðherrarnir sem komu saman til fundar í Wasington um síðustu helgi? Einnig væri gaman að vita hvort okkar ástsæli fjámálaráðherra, Árni M. Mathiesen, hafi verið meðal fjármálaráðherranna sem vissu ekki sitt rjúkandi ráð.

Annars hefur verið hljótt um Árna okkar uppá síðkastið og sem betur fer ekki annað að sjá en hann sé fjarri því að vera í áfalli, hvað þá að rjúki upp af ráðum hans svo heitið geti. Aftur á móti hefur fólk mun meiri áhyggjur af Gjeir Haaarde og Ingibjörgu Sólrúnu natoskörungi. Þau virðast vera lögst út, eins og stundum hendir virðulega heimilisketti, og skeyta í engu þó allt sé að fyllast af músum, og sjálfsagt fleiri nagdýrum, á landsstjórnarheimilinu. 

Fjármálaráðherrar „í áfalli“

Dauðinn kallar ...

„Það er alltaf sorglegt þegar blað deyr en það er enn sorglegra þegar lifandi og vel rekið blað deyr vegna efnahagserfiðleika í þúsunda mílna fjarlægð og það eru aðstæður sem við bjuggumst aldrei við að mæta,"  segir  Pergament á heimasíðu blaðsins."

Ojæja.

Eitthvað finnst mér það orðum aukið hjá þessum Pergament, að það sé alltaf sorglegt þegar blað deyr. Í sumum tilfellum er það blátt áfram gleðiefni þegar dagblað eða tímarit geyspar golunni. Það er meira að segja ekki fráleitt, að til séu blöð á Íslandi sem mættu og ættu að deyja sínum drottni og það fremur fyrr en síðar.

Hitt er svo annað mál, hvernig í ósköpunum svokallað fríblað vestur í Bandaríkjunum getur orðið bráðkvatt útaf efnahagsástandi á Íslandi. Samkvæmt fréttum var viðkomandi blað, BostonNOW, gert út af fyrirtæki á vegum Baugs, en útgerðin fór fram í Bandaríkjunum og þar er ekki notuð íslensk króna með 15,5% stýrivöxtum og 8,7% verðbólgu, hvað ég best veit.

Hinsvegar liggur eitthvað í loftinu, sem bendir til þess, að farnir séu að myndast kalblettir á útrásarundrunum íslensku. Og það ætti ekki að koma neinum á óvart þó að ein og ein kjúka, eða jafnvel útlimur, fari að detta af útblásnum líkömum útrásarjötnanna á næstunni.    

Blóðlaus drengur á hlaupum

Fréttin af Das hinum myrta og stráknum sem hann lét hlaupa allt hvað af tók er afskaplega athyglisverð, en þar stendur meðal annars: ,,Das hefur áður verið sakaður um að misþyrma drengnum. Meðan á 70 km hlaupinu stóð stöðvuðu læknar drenginn eftir 65 km þegar hann var orðinn aðframkominn. Síðar kom í ljós að drengurinn var vannærður, blóðlaus og með háan blóðþrýsting." (mbl.is)

Nú er útaf fyrir sig ekkert mjög undarlegt að hinn fjögurra ára hlaupagikkur væri orðinn ögn þreyttur þegar hann var búinn að hlaupa eina 65 kílómetra. Ég væri meira að segja orðinn hálfdasaður eftir þessháttar harðasprett. Hitt kemur afturámóti meir á óvart, ef hægt hefur verið að mæla blóðþrýsting stráksins, ef rétt er að hann hafi verið með öllu blóðlaus þegar mælingin fór fram.

Umdeildur þjálfari maraþondrengs myrtur

Saknæmt að fá reykeitrun

Eftir orðanna hljóðan í meðfylgjandi frétt, mætti ætla konan og karlinn sem voru í sumarbústaðnum í Þingvallasveit hafi verið handtekin fyrir að vera grunuð um að hafa fengið reykeitrun: (Karl og kona, sem voru í sumarbústað í Þingvallasveit þar sem eldur kom upp aðfaranótt sunnudags, voru handtekin eftir að þau voru útskrifuð af sjúkrahúsi en talið var að þau hefðu fengið reykeitrun.)

Nú má svo sem vel vera, að það sé saknæmt að fá reykeitrun; og þeir sem eru svo óheppnir að fá fjarska mikla reykeitrun séu hiklaust dæmdir til nokkurra ára fangelsisvistar ef glæpurinn sannast á þá. Að minnsta kosti er mér nokk sama hvort viðurlög eru við reykeitrun eða ekki.

Grunur um íkveikju og líkamsárás

Vandræðagemlingur missir náttúru

Það var víst kominn tími til, og rúmlega það, að Guy Ritchie missti náttúruna, a.m.k. náttúruna til kvenna. Guyi þessi, hefur sem menn almennt vita, verið hinn mesti vandræðagmlingur þegar kvenfólk er annarsvegar og vaðið um eins og geðvilltur hrútur um fengitíma með spjótið eitt að vopni. En nú er þessi alræmdi steggur afvopnaður allri náttúru til miðvígstöðvanna, gjörvöllu mannkyni til heilla.

Kynlöngunin hvarf í megrunarkúrnum

Greindarvísitalan og aðrar vísitölur

Ósköp er að heyra af öllum þessum úrvalsvísitölum, hlutabréfavísitölum, byggingarvísitölum og stofnvísitölum, sem allar eru á niðurleið. Alltaf. Ekki vantar gríðarlegan fjöld viðskiptavísindamanna, hagvísindamanna, stjórnmalaskörunga, löggilta spámenn og annað óviðjafnanlegt vitfólk til að sýsla með allar þessar vísitölur, en án merkjanlegs árangurs. Og ekki hefur ástandið batnað, nema síður sé, eftir að mesti stjórnvitringur þjóðarinnar, fyrr og síðar, að Jóni Sigurðssyni frá Hrafnseyri meðtöldum, fékk þann starfa að berjast við verðbólgur og vísitölur og annan óþrifnað. Er skemmst frá að segja, að bardagi stjórnvitringsins mikla hefur í engu skilað stærri vinningum, en vopnaviðskipti Donkíkóta við vindmyllurnar, sællar minningar hér um árið.

En á meðan stjórnvitringurinn ógurlegi hefur legið í blóðugum slagsmálum við vindmyllur verðbólgu og vísitalna, hafa litlu spámennirnir, sem einnig eru ekkistjónmálaskörungar, flúið af landi brott, með skottið á milli lappana, og átt náðuga daga með löngum slímusetum hjá nafntoguðum, háttsettum morðvörgum víðsvegar um jarðkringluna.

En vel á minnst: Það virðist enginn hafa neinar áhyggjur af sjálfri Greindarvísitölunni meðan hinar vísitölurnar standa í ljósum logum, öllum til skemmtunar nema fjárfestingarsnillingunum, sem einusinni voru álitnir óskeikulir á öllum mögulegum sem ómögulegum sviðum.  

Hlutabréfavísitölur á niðurleið

Alsgáðir í annarlegu ástandi

Ósköp er nú hressandi að vakna, með kaffibollann og winstoninn að vopni, við að lesa um hneykslisverk drukkinna manna. Það eina sem vantar er að viðkomandi brennivínsberserkir séu nafngreindir, svo ekki fari á milli mála hvaða sómamenn voru þar á ferð.

Þó finnst mér einhvernveginn hálf óviðkunnanlegt þegar látið er fylgja, að viðkomandi hafi verið í ,,annarlegu" átandi. Það eru nefnilega svo margir í þessu ,,annarlega" ástandi þó þeir hafi hvorki bragðað vott né þurrt af miðtaugakerfiseflandi fæðu. Ég þekki nefnilega fólk sem hagar sér dags daglega eins og það hafi látið ofaní sig einhver andskotans ókjör af brennivínsogdópjukki, en á þó að heita gersamlega alsgáð, og sumt hvert talið til sérlega göfugra bind-ind-ind-indismanna. Ég gæti t.d. vel trúað, að sá er ók á veitingastaðinn Asíu, eins og ekkert væri sjálfsagðara, hafi verið einn að þessum sérlega alsgáðu bindindismönnum á upplýsandi skemmtiakstri niður Lagaveginn. 

Hnífamaður handtekinn