Drukkinn páfi skemmtir amríkumönnum

,,Kanar ærast allir saman,

öskra og veina gaman, gaman!" (Disneyrímur höf. Þórarinn Eldjárn)

Ekki er að efa að bandaríkjamenn hafa skemmt sér konunglega af innantómri fávisku sinni við að heyra og sjá Benedikt XVI iðka ræðubrögð sín á Jankí Stadíuminu í Nýju Jórvík.

Og vissulega var páfaþrjóturinn í undarlega góðu skapi í dag; lék á alls oddi enda vel drukkinn af messuvíni sem hann komst í í morgun hjá amrískri byskubsskjátu, sem hefir sérhæft sig í að breyta fjármunum byskubsstóls síns í vín. Það er svo sem ekkert nýtt þó kaþólskir kirkjuhöfðingjar fari svona að því þeir hafa fyrir löngu gefist uppá að breyta vatni í vín eins og Frelsarinn gerði.

Það var víst ógleymanleg sjón fyrir alla viðstadda á Jankí Stadíuminu þegar Benedikt karlinn kom akandi á smábifreið sinni, sætkenndur af messuvíninu, inn á leikvanginn. Þó var enn dýrlegra, þegar hann skreið uppí ræðustólinn og tók til við að segja könum sögur af sjálfum sér þegar hann var hugsjónainnblásinn smádáti í síðari heimstyrjöldinni og barðist eins og ljón fyrir föðurland sitt og foringja. Raunar barnaði karluglan söguna fyrir sjálfum sér með óráðshjali um að hann hefði verið neyddur til að ganga í Hitlersæskuna og að hann hefði síðar strokið úr hernum. En þetta segja nú líka allir þjóðverjar sem eitthvað störfuðu undir merkjum Adólfs sáluga og það er af því að Adólf og þeir sjálfir töpuðu stríðinu.

Í fyramálið er svo viðbúið að hans heilagleiki, Benedikt páfi XVI, verði rottimbraður eftir alla jörvagleðina í dag. En hann þarf áreiðanlega ekki að örvænta, né við að hafa áhyggjur, því byskubinn, vinur hans, lumar áreiðanlega á nokkrum ámum af messuvíni handa honum að hressa sig á og halda þar með uppi ásættanlegum samkvæmisdampi. 

 

Páfi hylltur á Yankee Stadium

Fiskeldisdrottning í Hallargarði

Það fór aldrei svo, að ekki fyndist Hallargarður (með stóru H-i) á Íslandi. Líklega hefir einhverntíman staðið höll, sem nú er fyrir bí, í þessum garði, sennilega á landnámsöld. Síðustu áratugina hefir á þessum reit heimsins hokrað allmikill timburskáli, reistur af lágþýskum smáaðli, ættuðum úr Slésvík og/eða Holtsetalandi. Nýverið keypti nýríkur unlingur af þessari ætt skálann af því hann veit ekki hvað hann á að gera við öll þau peningaórif sem að honum hafa sótt síðustu árin.

En nú er semsagt risin upp flokkur fólks, sem hefur á stefnuskrá sinni að efna til vinfengis við umræddan Hallargarð. Á myndum af meintum ástaratlotum þessa ljúflega fólks, má meðal annarra, greina Fiskeldisdrottninguna af Straumsvík, sjálfa Álfheiði Ingadóttur, platsósíalista og flokkseiganda. Það er virkilega vel við hæfi, að jafn göfug persóna, af sönnu aðalbornu standi skuli hafa tekið að sér virkan kunningsskap við Garð Hallarinnar.

Hollvinasamtök Hallargarðsins stofnuð

Aðilar saurguðu Árnessýslu með viðbjóðslegu framferði

Það er naumast hvað Aðilar hafa látið að sér kveða á Selfossi, sjálfu höfuðvígi stjörnusýslumannsins Stones, í nótt. Og ég sem var farinn að halda að ekki nokkur maður eða Aðili, fullur eða ófullur, þyrði fyrir sitt litla líf að ganga í berhögg við landsins lög í umdæmi herra Stones. En þar hefi ég heldur betur farið villur vega.

Það nær náttúrlega ekki nokkurri andskotans átt, að fólk, í þessu tilfelli Aðilar, skuli voga sér slíka ósvífni að taka uppá að synda um miðja nótt, og það í sundhöll. Svo var þetta óskemmtilega fólk búið að forða sér þegar húskarlar herra Stones komu á vettvang, svo að nú verður herra Stones sjálfur, að eyða sunnudeginum í að leita þessara viðbjóðslegu Aðila, sem saurguðu Sundhöll Selfoss, og þar með alla Árnessýslu, í nótt. 

Og til að bæta gráu ofan á svart voru tveir Aðilar teknir moldfullir við akstur bifreiða sinna, svo að segja uppi í nefinu á yfirvaldi árnesinga. Ég er ansi hræddur um að stjörnusýslumaðurinn Stones verði að gera betri bæn, ef honum er umhugað að koma á einhverjum lágmarksskikk á hinu flata Suðurlandi.  

Skelltu sér í nætursund

Þrifagemlingar hafa í hótunum

Það hefur aðdrei vantað neitt uppá hjá skoffínunum í atvinnurekendaforystunni að hafa í hótunum við land og þjóð. Nú hóta þessir þrifagemlingar að fara með atvinnustarfsemi sína úr landi, af því að þeim hugnast ekki ástandið sem þeir hafa skapað sjálfir ásamt Sjálfstæðisflokknum, Davíoddsyni og Hanezi Holmstone.

Það færi kanski best á, að hinir græðgisvæddu hótanabesefar hypjuðu sig allir sem einn til síns heima, skattaparadísana þar sem þeir geyma góssið sitt og eiga andlegt og veraldlegt lögheimili. Það er vel hægt að komast af án þessara leiðindapésa og það kæmi enginn til með að sakna þeirra, svo mikið er víst, enda eru þeir ekki hundaskítsvirði, þegar allt er talið. 

Hætta á að fyrirtæki flytji út

Heilsað með beittri kló

Honum Brandi mínum hlakkar alltaf jafnmikið til komu farfuglana á vorin, og ófáum slíkum hefir hann heilsað með beittri kló og hvassri tönn ... ójá.

Fuglarnir flykkjast til landsins

Hálfu verra vítisbarn ...

Það ætti varla að koma neinum á óvart þó Benedikt páfi XVI minnist ekki einu orði á Írak í pílagrímsferð sinni til Bandaríkjanna. Enda halda páfarnir og kardínálarnir í Wasington úti stríði, með tilheyrandi stríðsglæpum, sem Benedikt XVI hefur sjálfur velþóknun á.

Því er bara einusinni þannig varið, að kaþólska kirkjubáknið, með þrjótinn og þorparann Benedikt XVI fremstan í flokki, er þó nokkuð mikilvæg undirdeild við hirð Mammons konungs, hins heilaga drottins kapítalismans. Þar á bæ hlægja menn að tautinu í Jesú Kristi, um að ekki sé hægt að þjóna tveimur herrum, Guði og Mammon (Matt. 6,24). Og ekki vefst fyrir Benedikt páfa og Georgi Bush vini hans, fremur en fyrirrennurum þeirra, að troða bæði ríka manninum og úlfaldanum gegnum nálaraugað.

Ónei, Benedikt XVI er ekki kominn til Bandaríkjanna til að velta um ,,borðum víxlaranna og stólum dúfnasalanna." Þvert á móti kann hann vel við sig í ræningjabælum kapítalismans. Enn síður hvarflar að þessum auðvirðilega þorpara, að lesa fræðimönnum og faríseum samtíðar sinnar pistilinn að hætti litla sósíalistans frá Nasaret. Yfirmanni kaþólsku kirkjunnar nægir kjökra dálítið framaní bandaríska ráðamenn um klámiðnað og kynferðilegan öfuguggahátt kaþólska presta. Á honum sannast orð frelsarans: ,,Þér líkist hvítum kölkuðum gröfum, sem sýnast fagrar að utan, en innan eru fullar af dauðra manna beinum og allskyns óþverra. Þannig eruð þér, sýnist hið ytra réttlátir í augum manna, en eruð hið innra fullir hræsni og ranglætis." (Matt. 23,27-28)

,,Vei yður fræðimenn og farísear, hræsnarar! Þér farið um láð og lög til að snúa einum til yðar trúar, og þegar það tekst, gjörið þér hann hálfu verra vítisbarn en þér sjálfir eruð." (Matt. 23,15)  

Páfi ávarpar Sameinuðu Þjóðirnar

Fannst í REI-mykjuhaugnum miðjum

Nei hvur röndóttur, er ekki nema heillakerlingin Svandís Svavarsdóttir komin leitirnar aftur.

Þessi óvænta upprisa erfðaprinsessunnar, er platsósíalistunum og áttavillta ,,vinstraliðinu" í VG áreiðanlega mikið gleðiefni, þar sem almennt var talið, að Svandís hefði andast óforvandis inn í REI-málið einhverntímann á aðventunni fyrir síðustu jól. En nú hafa platsósíalistarnir og þeir með illvígu kompásskekkjuna í VG semsagt endurheimt sína erfðaprinsessu; hún fannst, góðu heilli, á sömu vígstöðvum og hún hvarf, þ.e. í REI-mykjuhaugnum miðjum.

Og upprisuorð erfðaprinsessunnar voru hreint ekki af verri endanum og einkar viðeigandi, enda í einhverskonar evangelískum frelsunarguðfræðistíl: ,,Það er ekki hægt að bjóða borgarbúum uppá þetta lengur!" 

(Ath. upprisuorðin skal lesa með óduldum vandlætingar- og frekjutóni í röddinni)

  

Ekki boðlegt borgarbúum

Mennsk meindýr, eða hvað?

Það er ósköp kristilegt og fagurt af jómfrú Þórunni umhverfisdjákna að skipa nefnd til sem á að finna út hvernig maður eigi að vera góður við dýrin.

Allt er það gott og blessað sem fram kemur í fréttinni af dýragæskunefndinn þar til að kemur að eftirfarandi setningu: ,,Einnig á nefndin að meta hvort tilefni sé til að setja ákvæði um eyðingu meindýra í lögin." Hver fjandinn sjálfur er eiginlega hér á ferðinni. Eyðing meindýr??? Er verið að gefa eitthvað í skyn, sem ekki er hægt að segja berum orðum? Hvað meindýr átt við? Ef til vill mennsk meindýr? Og þá hver? Þessum spurningum verður umhverfisdjákninn að svara áður en lengra er haldið.

Reglur um aðbúnað gæludýra í lög?

Hárkolluhopp undir drynjandi öskrum

Það eru aldeilis meiri extra-gárungarnir þessir íslensku evróvíjóngaularar. En það skulu eignirnar vita, að afspyrnu leiðinlegt og lélegt lag batnar ekki hætishót þó gert sé við það fábjánalegt myndband fyrir fábjána.

Þó er óneitanlega dálítið grínaktugt, að aðstandendur Thisismylifehörmungarinnar skuli láta hafa eftir sér, að umrætt myndband, sé það fyndnasta og skemmtilegasta sem Ísland hefur sent frá sér. Ég varð þeirrar hamingju aðnjótandi fyrir nokkrum mínútum að sjá bút úr þessu meistaraverki í sjónvarpinu, en þar mátti sjá einhvern hlunk með hárkollu hoppa eins og hann væri vistmaður á vitlausraspítala undir drynjandi öskrum Regínu Óskar og Friðriks Ómars.

Ja þvílíkt skemmtiefni atarna! 

„Fyndnasta og skemmtilegasta Eurovision myndbandið "

Hjarðsveinasjúkdómur

Það er skýrt menningarlegt hnignunarmerki, að enginn einstaklingur - segi og skrifa, akkúrat einginn einstaklingur - greindist með hjarðsveinasjúkdóm hér á landi á síðasta ári.

Ég hefi ekki hugmynd um, hvað á til bragðs að taka þegar ástandið er orðið svona skuggalegt, en augljóst er að eitthvað verður að gera. Varla er ráðlegt að eyða tíma í að óska eftir að ríkisstjórnin geri eitthvað í málinu, því hún er ekki til nokkurra nýtilegra hluta brúkleg; ekki nema einhver ráðherrabullan dytti niður á fransóssmit fyrir slysni í útlöndum.

Annars liggur í hlutarins eðli, að landbúnaðarráðuneytið gangi í málið og sjái svo um að, a.m.k. tveir til þrír tugir manna fái kraftmikla hjarðsveinasótt á hverju ári. Við verðum bara að sjá til og vona það besta og að þessum mikilvæga hluta íslenskrar menningar verði bjargað.

Engir greindust með sárasótt á síðasta ári