Velgjörðarmaður þjóðarinnar

Vinur okkar allra, velgjörðarmaður þjóðarinna, Björn Bjarnason dóms- og kirkjumálaráðherra, hefur lög að mæla eins og endranær þegar hann segir ,,að fylla þurfi skörðin" hjá lögreglustjóraembættinu á Suðurnesjum fyrst að Jóhann lögreglustjóri og einhverjir meðreiðarsveinar hans ætla að hlaupast á brott um næstu mánaðarmót. Auðvitað gat Björn ráðherra ekki reiknað með svo lúalegum mótleik af hálfu lögreglustjórans og raun ber vitni. Og þó lögreglustjóraembættið á Suðurnesjum hafi verið auglýst laust til umsóknar þá er ekki þar með sagt að Jóhanni R. sé stætt á að taka þeirri ákvörðun ráðherra svo illa og persónulega, hvað þá að draga aðra starfsmenn með sér frá embættinu. En maður kemur í manns stað, það veit ástmögur alþýðunnar á Íslandi, Björn Bjarnason, manna best. Enda mun honum ekki verða skotaskuld úr að hrista enn betri lögreglustjóra en Jóhann fram úr erminni. Og Björn okkar er skýrmæltur að vand því eftir honum er haft á mbl.is í frétt af brotthlaupi Jóhans: ,,Í því efni þurfi í senn að taka á stjórnsýslulegum og fjárhagslegum þáttum með skýr framtíðarmarkmið í huga og í samræmi við eðlilega verkaskiptingu innan stjórnarráðsins." En meðal annarra orða: Hvernig ætli þetta,  ,,í því efni þurfi í senn að taka á stjórnsýslulegum og fjárhagslegum þáttum með skýr framtíðarmarkmið í huga og í samræmi við eðlilega verkaskiptingu innan stjórnarráðsins" útleggist á venjulegu og skiljanlegu mannamáli? 

Björn segir að fylla þurfi skörðin

Bölvuð vitleysa í manninum

Bölvuð vitleysa er í honum Árna Mathíesen að sækjast ekki eftir embætti forstjóra Landsvirkjunar. Þetta er virðingarvert jobb og eftir því vel borgað. Og þegar við bætist, að Árni, karlanginn er orðinn jafn veðraður á pólitískt séð og raun ber vitni, þá er býsna metnarlaust af honum að slá hendinni á móti því að taka við Landsvirkjunarkontórnum.

Svo má heldur ekki gleyma, að fjármálaráðherrann á fleiri en einn leik í stöðunni því hann er hámenntaður dýralæknir og gæti hæglega snúið sér að sínu fagi ef flokkssystkyni hans vilja ekkert með hann hafa lengur, ekki einusinni hjá Landsvirkjun, eins og einhverjir óvandaðir delerantar hafa verið að fleipra með að undanförnu. Það yrði áreiðanlega ánægjuleg tilbreyting fyrir Árna að fara að skera upp hunda og ketti í stað þess að skera niður fjárveitingar til ýmissa þjóðþrifaverkefna.

En í embætti forstjóra Landsvirkjunnar gæfist þessum hugljúfa Hafnfirðingi hinsvegar stórfenglegt tækifæri til að skera upp herör gegn hinum alræmda virkjunartremens og álbræðslugeðvillu, sem grasserað hefur í illa þjáðum búk Landsvirkjunnar svo árum og áratugum skiptir. 

Árni sækist ekki eftir forstjórastarfi Landsvirkjunar

Fáræði og lýðræði

Fyrst íbúarnir í Vogum fá ekki að kjósa um hvort þeir eigi að hafa álversraflínurnar hangandi yfir hausnum á sér er einboðið að þeir klippi bölvaðar snúrurnar niður þegar búið verður að hengja þær upp. Það kemur nefnilega fram í fréttinni um þetta mál, að meirihluti hreppsnefndar Voga er staðráðin í að íbúum sveitarfélagsins komi þetta raflínumál ekkert við. Og að sjálfsögðu er svokölluð ,,viljayfirlýsing" milli örfárra meirihlutamanna í hreppsnefndinni og línulagningarsóðanna algjört trúnaðarmál, sem þýðir á mannamáli, að íbúunum varði ekki par um hvort hroðalegir raflínustrengir sveiflist yfir hausamótunum á þeim eða ekki.

Þetta litla og snotra Vogadæmi, sem er aðeins eitt af mýmörgum, sýnir, svo ekki verður um villst, að á Íslandi er fáræði stundað af kappi og án forsjár, en að sama skapi gefinn skítur í lýðræði og þar með íbúana sjálfa. Enda hatast fáræðisrummungarnir við raunverulegt lýðræði og finna því allt til foráttu. Það er síðan umhugsunarefni hvort almenningur gerir sér fulla grein fyrir að á Íslandi ríki fáræði en ekki lýðræði.     

Íbúar fá ekki að kjósa

Kláðagemlingar og illgresi mannfélagsins

Eitthvað virðist uppeldi barna hafa farið úrskeiðis á frjálshyggjutímabili síðustu 15-20 ára fyrst þriðjungi gríslínga á aldrinum 18 til 35 ára þykir eðlilegt, og þá líklega fullkomlega sómasamlegt, að erlendir starfsmenn búi við lakari kaup og kjör en innfæddir. Það er nokkurn veginn á hreinu, að í gróðasótt, neysluæði og taugabilunarstressi umrædds tímabils hefur foreldrum hinna illa þenkjandi ungmenna algjörlega láðst að kaupa vendi til heimilisnota, hvað þá að nota þessháttar þing eins og vera ber. Það er löngu sannað af færustu vísindamönnum, að vandarlaust heimili er ekki uppeldisstofnun heldur framleiðslustöð á andstyggilega örtuðum kláðagemlingum, og ennfremur, að foreldrar sem svíkjast um að flengja börn sín eru illgresi mannfélagsins.

Telja eðlilegt að útlendingar séu með lakari laun

Sjálfbærar veiðar á sauðfé og nautgripum

Það er sárt til þess að vita, að skotmönnum landsins skuli ekki hafa tekist að lóga þessum 15 hreinkvikindum sem vantaði uppá veiðikvótann. Ekki veit ég hvað menn ætla að taka til bragðs í þeirri stöðu sem upp er komin, en allt að einu er er voðalegt að 15 hreindýr, sem sannarlega ættu að vera dauð nú þegar, muni lifa af veturinn eins og ekkert sé.

En það er fleira matur en feitt kjöt. Það ætti bændum landsins að vera manna best kunnugt um. Ég hef lengi verið hugsi yfir hvernig á því stendur að atvinnubændur hafi ekki enn látið drauminn um veiðar á sauðfé og nautgripum verða að veruleika. Það þarf ekki mikinn sérfræðing til að sjá, að skotveiðimenn myndu taka því fagnandi að fá að skjóta lambær og naut úti á víðavangi, gæfist þeim kostur á. Bændur myndu þá selja veiðimönnum leyfi til að murka líftóruna úr umræddum fénaði á ákveðum tímum og eftir ákveðnum reglum. Septembær væri t.d. upplagður tími fyrir þessháttar veiðiskap og maður skyldi ætla að félagar í Skotvís, eða hvað það heitir, tækju fegins hendi að sjóta sér til ánægju kýr og kálfa í þeirra náttúrulegu högum, að maður tali nú ekki um fella ær og dilka fram til fjalla. Ekki þarf að fjölyrða um, að slíkar veiðar yrðu í hæsta máta vistvænar og sjálfbærar.

Ekki veiddist upp í allan kvótann

Svartflekkótti hundurinn sem endurholdgaðist og varð að ráðherra

Er það ekki dásamleg sönnun fyrir endurholdgunarkenningunni að byggingavöruverslun verði að fimleikahúsi? Þessháttar er, sem maður segir, farsæl framvinda guðlegrar forsjónar á hinum fagurgræna akri eilífðarinnar. Þó eru ekki allar endurholdganir vel heppnaðar, síður en svo. Ég þekki mann sem átti afburðagóðan svartflekkóttan hund, sem hann notaði jöfnum höndum til smalamennsku og til veiða. Þegar þessi hundur var fullra fimmtán ára, andaðist hann af ellisökum og greftraður með viðhöfn af húsbónda sínum og fjölskyldu hans. Svo gerist það fyrir nokkrum árum, að húsbóndi þess svarflekkótta, þá kominn á efri ár, hrekkur upp við þann vonda draum, að hans gamli veiðfélagi og smalahundur er aftur kominn fram á sjónarsviðið, áratugum eftir dauða sinn, og nú sem ungur íslenskur stjórnmálamaður á uppleið. Ekki er að orðlengja, að eftir nokkurra ára innantómt gjamm, pex og sýndarmennsku, er þessi hvimleiða stjórnmálaskepna, sem áður og fyrr var húsbóndahollur tíkarsonur, orðinn að ráðherra. Og það sem verra er: Hann er núverandi ráðherra en ekki fyrrverandi. Ég hitti gamla bóndann, eiganda forvera ráðrerrans núverandi, fyrir nokkrum dögum og sagðist hann í, óspurðum fréttum, ætla með haustinu inná heiði til rjúpna og hafa með sér til aðstoðar veiðirakka sinn svartflekkóttan, sem væri að vísu orðinn ráðherra í ríkisstjórn. - Og það skal ég segja þér, sagði sá gamli alvarlegur í bragði, - að það fyrsta sem skýt þegar ég verð kominn frameftir verður ekki rjúpa, heldur helvítis hundurinn! Því þetta er ekki lengur þarfadýr heldur óþurftaskepna. 

Breytist byggingavöruverslun í fimleikahús?

Ólaf Helga á Suðurnesin í stað Jóhanns

Fyrst Björn Bjarnason er staðráðinn í að afhrópa Jóhann R. Benediktsson geri ég ráð fyrir að Suðurnesjamenn sætti sig ekki við minna yfirvald en Stjörnusýslumann Árnesinga í staðinn. Ekki þarf að efa að nefndur Stjörnusýslumaður myndi sóma sér ákaflega vel í embætti lögreglustjóra suður með sjó og sýna Suðurnesjamönnum í tvo heimana og hvar Davíð keypti ölið um leið og þeir reyndu að brydda uppá lögbrotum eða annarri þeirri iðju sem fallin væri til að raska alsherjarreglu.

Ef við gefum okkur að herra dómsmálaráðherrann afhenti Suðurnesjamönnum Stjörnusýslumann Árnesinga til fullra afnota, mæli ég með að Guðni Ágústsson verði gerður að yfirvaldi í Árnessýslu í stað Ólafs (hins) Helga. Þó að Guðni sé ef til  vill ekki löglærður, gerir það ekkert til, þar eð margir sýslumenn fortíðarinnar voru lítt skólaðir í lögum og sumir jafnvel ómenntaðir að öllu leyti.

Skipt um lögreglustjóra

Okkar Davíð hogginn í marmara uppá 50-60 metra.

Skítt veri með þó Davíððsstyttan í Flórens fari um koll enda er hún bæði gömul og órafjarri okkur hér norður við ysta haf. Það sem mest er aðkallandi í listsköpun þessa dagana á Íslandi er að okkar Davíð, Davíð Oddsson, verði hogginn í marmara með ógleymanlegum hætti. Ekki væri nein goðgá þó líkneski af þeim góða manni væri uppá 50-60 metra að hæð og staðsettt á áberandi stað í hringiðu lífsins. Og ekki minkaði nauðsyn þess að reisa Hinum Mikla Leiðtoga verðugan minnisvarða eftir að hann rak Samfylkingunni, og öðrum ESB attaníossum, þvílíkan roknalöðrung fyrir nasirnar á Stöð 2 í gærkvöldi, að allt það stóð liggur í valnum ennþá og kemst varla aftur á lappir fyrst um sinn. 

Davíðsstyttan í hættu

Betri maðurinn utanáliggjandi

Það er þó huggun harmi gegn að karlskrjóðurinn fór ekki úr nærbuxunum í starfsmannaveislunni. Og þó hann hefi farið úr brókinni hefði það ekki verið ástæða til að segja af sér. Ég man til dæmis eftir virðulegum embættismanni sem láðist eitt sinn að ganga frá stolti sínu eftir að hafa pissað og gekk um götur og torg með sinn betri mann utanáliggjandi í margar klukkustundir. Ekki varð hann að segja af sér, síður en svo, því ári síðar gerði ríkisstjórnin hann að enn virðulegri embættismanni með því að fela honum starf sem einungis útvöldum er ætlað. 

Gert að segja af sér eftir dansatriði

Hinn elskaði sonur bregst ekki föður sínum

Hann er mikið Guðs blessað lamb hann Georg Bush og heilagur er hann eins og aðrir spámen af hans kalíberi. Og mikla velþóknun hefur Guð repúblíkana, og margra Íslanskra sjálfstæðismanna, á sínum heitt elskaða syni sem hann gaf lýð Bandaríkjanna til 8 ára farsællar setu á forsetastóli. Ekki hefur heldur hinn elskaði sonur brugðist föður sínum, Guði repúblíkana, því hann hefur farið með eldi um heiminn gegn illræðismönnum sem ekki kunna að virða og tilbiðja margnefndan Guð repúblíkana. Amen.

Bush samþykkti árásirnar