Sjálfstæðismaður í Simbabve

Hann kvað vera mikill Sjálfstæðismaður hann Róbert Múgabe í Simbabve og mun flest, ef ekki allt, prýða þann glæsilega höfðingja sem gerir sjálfstæðismann að Góðum Sjálfstæðismanni. Hann er sagður ráðríkur vel, hrokafullur og yfirgangssamur, rétt eins og Sjálfstæðismaður á Íslandi sem þykist eiga eitthvað undir sér.

Samkomulag í Simbabve

Hvenær snúum við á okkar sjóræningja?

Það yrði nú meira lánið ef Íslenskir sjómenn, sem og þjóðin öll, bæru gæfu til að snúa á okkar sjóræningja með jafn góðum árangri og þeir Spænsku gerðu við sína. En hver veit nema það gerist einhvern daginn. Það er víst nóg komið af sjóránstrakteringum á Íslandsmiðum fyrir margt löngu.

Sjómenn sneru á sjóræningja

Illvígt meinvarp

Fyrst merkir Sjálfstæðismenn eins og Óli Björn Kárason eru farnir að grufla í innyflum Flokksins síns, langar mig til að benda á ágæta umfjöllun um helsta baráttumál Sjálfstæðisflokksins síðustu 20 árin, en þetta merka baráttumál er óðfluga að verða að illvígu innanmeini sem á eftir að verða heilsu Flokksins skeinuhætt á næstu árum. Hér er hægt að nálgast umrædda umfjöllun.

Uppgjör Óla Björns við Sjálfstæðisflokkinn

Þjófasátt fyrir auðvaldið

Jæja, ætli sé ekki best að verkafólk landsins taki sig saman, undir leiðsögn hinna róttæku skrifstofusjakala ASÍ, og geri allt sem það getur til að bjarga burgeisastéttinni uppúr kviksyndinu? Það er að mínu mati alveg bráðnauðsynlegt, að fólkið sem rétt skrimtir á launavinnu sinni hlaupi undir bagga með blessuðum drengjunum sem fengu bankana, símann, fiskinn í sjónum og bráðum heilbrigðiskerfið á silfurfati og bjargi þeim frá drukknun í forarvilpu eigin gjörða.  

Ennþá langt í þjóðarsátt

Hvaða endi fá ódyggðir og svik Samfylkingarinnar?

Jæja Samfylkingarfólk, nú stendur flokkurinn ykkar uppi eins og berrassaður svikari eftir að hafa svarið auðvaldinu, frjálshyggjugræðginni, hollustu sína með því að samþykkja svokallað sjúkratryggingafrumvarp og opna þar með heilbrigiskerfið uppá gátt fyrir peningavaldinu. Var það ef til vill meiningin, allt frá upphafi, að ,,sameina vinstrimenn" til að liðsinna frjálshyggjumógúlunum að hjóla í velferðarkerfið? Var gegnrýni ykkar á Framsóknarflokkinn, meðan hann var í ríkisstjórn, eintóm látalæti og fals? Hverskonar eiginlega drullusokkafabrikka er þessi Samfylking ykkar, er enginn ærlegur maður eða kona á Alþingi fyrir þennan brjótumkennanlega, og í leiðinni hættulega, selskap? Til hvers er yfirleitt verið að stofna og halda úti slíkum stjórnmálaflokki? Er nema von, að þingmenn njóti sífellt minni virðingar meðal þjóðarinnar? Eða er það svo, að með hverjum kosningum hækki hlutfall lítilmenna og froðusnakka á Alþingi? Ekki er annað að sjá en að svo sé - því miður. Og hvernig er það með vinstrigarpinn Jóhönnu Sigurðardóttur, sem þið Samfylkingarfólk vitnið alltaf til þegar á flokkinn ykkar er borið, að þar innanborðs séu harla lélegir vinstrimenn. Má vera að Jóhanna Sig. sé akkúrat enginn vinstrisinni? Að minnsta kosti hefur hún ætið verið fljót á sér að hlaupa í ríkisstjórn með Sjálfstæðisflokknum þegar það hefur verið í boði. Ég ítreka það enn og aftur, að svokallaður ,,vinstrivængur" Íslenskra stjórnmála er svo gott sem ónýtur og þar verður að fara fram gagnger uppstokkun áður en langt um líður - en sú uppstokkun verður að fara fram undir réttum formerkjum.

Júdas sálugi, sem þótti hinn mesti gallagripur og ólánsmaður, seldi meistara sinni í hendur auðvaldi sinnar samtíðar fyrir 30 silfurpeninga en í dag seldi Samfylkingin auðvaldinu heilbrigðiskerfið, samvisku sína og stuðning kjósenda sinna fyrir að því er virðist ekki neitt. Þegar Júdas hafði framið sitt alkunna axarskapt gekk hann út og hengdi sig - en hvað ætlar Samfylkingin að gera? Eða kjósendur Samfylkinarinnar? 

Samþykktar sjúkratryggingar

Verðskuldar 5 gullnar stjörnur

Það veitir manni kærkomna aukna trú á mannkynið að verða vitni að því hvernig snillingurinn Árni Johnsen afgreiðir hina linfrómu Agnesi Bragadóttur á mjúkan og kristilegan hátt vegna ruddalegs munnsöfnuðar Agnesar í hans garð. Þó að Árna hafi orðið það á að misstíga sig fyrir nokkrum árum, gefur það hvorki Agnesi né öðrum siðferðislegt leyfi eða rétt til vega að honum af annarri eins forsmán og moggadaman gerði. Með fagmannlegri afgreiðslu sinni á Agnesi hefur Árni vaxið að áliti með þjóðinni og verðskuldar sannarlega fimm gullnar stjörnur í einkunn fyrir frammistöðuna. 

Árni fellur frá málssókn á hendur Agnesi

Forsmekkur hryðjuverkaöldu á Íslandi

Það þarf engann að undra, sem á annað borð þekkir eitthvað til Ósma bín Laden og Al-kæéta, að sprenging hafi orðið í Ánanaustum. Þó enginn hafi meiðst og lítið skemmst í sprengingunni, er þetta bara forsmekkurinn að því sem koma skal. Það er því eins gott að almenningur hafi varan á og vígbúist eins og kostur er og veiti hinum óvinveittu hryðjuverkamönnum harða mótspyrnu. Nauðsynlegt er að borgararnir verði ófeimnir við að nota vopn sín gegn óvinunum og felli þá umsvifalaust þegar færi gefst. 

Sprenging í vinnuskúr

Frjálshyggjuviðrini og vinstrivængur í rúst

Þeim flökrar ekki við ólánsverkunum á Alþingi, fremur en fyrri daginn. Nú á að fórna heilbrigðiskerfinu á altari frjálshyggjugræðginnar eins og ekkert sé eðlilegra. Það er dæmalaust, að stjórnmálaflokkur, sem hefur frá upphafi gefið sig út fyrir að vera sameiningarflokkur vinstri manna, skuli leggjast svo lágt að taka þátt í árás frjálshyggjulýðsins á alþýðu landsins með þessum hætti. Reyndar kemur mér ekki á óvart að Samfylkingin skuli taka þátt í svona óþverrabralli með auðvaldinu því ég taldi mig vita, um það bil sem sá flokkur var stofnaður, hverkonar óféti hann yrði. Það er alveg augljóst að raunverulegir vinstrimenn eiga enga samleið með pólitísku viðrinunum sem stjórna Samfylkingunni og eiga hana. Það er því ekki annað hægt en að skora á alla þá sem vilja afgerandi breytingar í þjóðfélaginu í átt til jöfnuðar, að yfirgefa Samfylkinguna nú þegar því þar eiga þeir ekki heima. Það er líka deginum ljósara, að róttækir vinstrimenn, sósíalistar og verkalýðssinnar eiga ekkert flokkslegt athvarf á Íslandi í dag því að VG uppfyllir ekki þarfir þeirra nema að litlu leyti, hvað þá aðrir flokkar. Í dag er staðan einfaldlega þannig, að það verður að stokka alla vinstripólitík í landinu upp og ástæðan ætti að vera hverjum manni augljós.   

Sjúkratryggingar til umræðu

Brosti breiðast

Þó að Palestínska flóttafólkið hafi brosað breitt þegar það kom til Íslands, brosti þó enginn breiðar en Magnús Þór Hafsteinsson, hann teygði svo innilega á brosvöðvunum að kjálkar hans fóru úr lið og verður hann því framvegis sí-brosandi og hrókur alls fagnaðar.

Flóttafólkið brosti við heimkomuna

Það verður að breyta lögum um þvagleggsnotkun

Ja, sá er aldeilis densilegur læknirinn á Selfossi að neita boði yfirvaldsins í Árnessýslu að beita þvagleggnum á ósamstarfsfúsan fyllikall sem hafði ekið bifreið sinni út af þjóðveginum í Kömbum. Það er ekki nema von, að Stjörnusýslumaðurinn fyrir austan fjall sé bæði sár og reiður þessum óforskammaða lækni fyrir dólgsháttinn og óhlýðnina, sem leiddi til þess að Stjörnusýslumaðurinn varð að grípa til þess óyndisúrræðis að beita 102. gr. umferðarlaga á brennivínsbifreiðarstjórann. Það sér náttúrlega hver maður, að fari læknar almennt að standa uppi í hárinu á landsstjórninni með því að hafna réttmætri kröfu fulltrúa hennar um þvagleggsmeðferð á drukknum ökumönnum, munu drykkjusvolar og gardínufyllibyttur af báðum kynjum ekki víla fyrir sér í framtíðinni að keyra útum allar trissur í alskonar annarlegu ástandi í þeirri fullvissu að yfirvöldin geti með engu móti raskað ró þeirra með þvagleggjum eða öðrum dýrindis vísindum sem læknastéttin á í fórum sínum. Það er ljóst, ef ekki á illa að fara, að Alþingi verður að semja og samþykkja lög, sem heimila stjörnusýslumönnum landsins að setja sjálfir, með eigin hendi, þvaglegg þeim mönnum sem grunaðir eru um umferðarlagabrot.  

Læknir neitaði að taka þvagsýni með valdi