Hefðum átt að ráða slíkann mann í stað Evu Joly

Mikið hefði nú verið farsælla fyrir íslensk stjórnvöld, að ráða mann eins og Romm Houben til að gramsa í málefnum fjársýslumanna og útrásarvíkinga í staðin fyrir kerlingarnæpuna Evu Joly. En sem kunnugt er, er Eva þessi stórhættuleg kona og til alls vís; henni er t.d. trúandi til að reyna að steypa þjóðskipulagi voru með því að koma öllum helstu máttarstólpum landsins í fangelsi uppá vatn og brauð og innleiða í kjölfarið lenínisma, stalínisma og alsherjargúlag á Íslandi. Og ekki þarf að efa, að Steingrímur J. og Jóhanna Sig. eru mjög fýsandi að koma slíku skipulagi á. Skefjalausar árásir þessara skuggalegu þokkahjúa á skattgreiðendur, kvótaeigendur og lýðræðissinnaða frjálshyggjukapítalista uppá síðkastið benda eindregið til, að þeim sé mjög í mun að koma á fyrrnefndum lenínisma og stalínisma og í þeim efnum njóta þau liðstyrks byltingarkvendisins Evu Joly.

Nei, þá hefði verið betra að fá rólegt fólk, eins og Romm karlinn Houben, til annast rannsókn á hruninu. Það hefði fyrir það fyrsta ekki valdið ókyrrð meðal landsmanna og í öðru lagi hefðu allir fengið kristilega fyrirgefningu á skuldum sínum - nema svokallaður almenningur, sem lifði skefjalaust um efni fram í hugsunarlausri óráðsíu í hart nær 20 ár.

Var talinn vera í dái í 23 ár

Sérstakur götustrákur fer yfir strikið

Það er ekki nema von, að Karli Axelssyni sé algjörlega ofboðið. Enda virðist þessi sérstaki saksóknari vera orðinn margfalt sjálfstæðari en til var ætlast í upphafi. Það var áreiðanlega ekki ætlast til þegar Ólafur Hauksson var ráðinn sérstakur saksóknari, að hann gerði bragð úr ellefta boðorðinu og færi að leika sér að því að leggja góða menn og virðingarverða í einelti.

Það er náttúrlega algjört brot á öllu sem hægt að brjóta, þegar embættismaður, sem skipaður var til að sofa svefni réttlátra fram á skrifpúlt í skítugru kompu einhversstaðar útí bæ, fer að haga sér eins og götustrákur með því að hrekkja og hrella saklaust fólk að ósekju. Slíkir menn eru hreint og klárt illgresi í samfélaginu, sem ber að uppræta og í eldsofninn kasta eins og segir á helgri bók.

Við þessum óskunda Ólafs Haukssonar er aðeins eitt að gera: Leggja embætti sérstaks saksóknara niður og kæra Ólaf þennan götustrák fyrir einelti og fá hann dæmdan til langrar betrunarvistar, öðrum skelmum til varnaðar.

Lögmanni Baldurs algjörlega ofboðið

Breytist Torgerður í Skallagerði í ljósagöngunni?

Það held ég verði sláttur á Torgerði Katrínu þegar hún skakklappast á stað, með skíðlogandi kyndil í klónum, frá Þjóðmenningarhúsinu klukkan sjö á miðvikudagskvöldið. Ég sé þessa háfættu valkyrju fyrir mér slagandi í fylkingarbrjósti með brúnaljósin svo einbeitt og tindrandi að hæfa myndi blóðmannýgu nauti.

En þrátt fyrir að Torgerður verði eflaust í svellandi vígaham á miðvikudagkvöldið, hef ég vaxandi áhyggjur af þessu uppátæki hennar. Ég hefi nefnilega illan grun um að Torgerði verði fljótlega fótaskortur á leiðinni niður að Sæbraut og missi logandi kyndilinn í höfuð sér og samstundis standi hár hennar vel kembt í björtu báli.

Ef þannig fer, að hárstrýið á Torgerði verði eldi að bráð, á liggur ekkert fyrir þessari föngulegu madonnu annað en að verða jafn sköllótt og Steingrímur J. Sigfússon göngugarpur. Eftir slíka útreið er viðbúið að Torgerður verði aldrei kölluð annað en ,,Skallagerður" á sama hátt og mæddir íhaldsmenn kalla Steingrím aldrei annað en ,,Skallagrím" einkum þegar illa liggur á þeim og það liggur oftast illa á þeim þessa dagana.

Jóhanna leiðir ljósagöngu á miðvikudag

Hverskonar viðbjóð er verið að gefa í skyn?

Hvað ætli þeir í Matvæla- og Heilbriggðiseftirlitinu eigi við með því, að ,,þeim fyrirtækjum fari fækkandi, sem eru með ófullnægjandi niðurstöður vegna kólígerla"?

Hverskonar viðbjóð er eiginlega verið að gefa í skyn?

Nú skilst mér, að kólígerlar séu ófögnuður, sem á ættir sínar og óðul í mennskum saur. Eru Matvæla- og Heilbriggðiseftirlitið virkilega að segja með penu orðbragði, sbr ofangreinda tilvitnun, að ísprangarar gangi örna sinna í ísblöndur sínar? Og ef sú er raunin, að ísfrömuðir hagi sér á þann hátt gagnvart framleiðsluvöru sinni, þá er ekki nema von þótt spurt sé hvað mönnunum gangi til með slíku framferði. Fara þeir svo djöfullega að ráði sínu til bragðbæta og drýgja hráefni sitt og auka framlegð fyrirtækjana í leiðinni? Eða stafa þessi vinnubrögð af sérlega illu innræti, sem brýst út í sjúlkegri þrá viðkomandi ísmanna til að spilla heilsu viðskiptavina sinna?

Ég hefi aldrei á minni lífsfæddri ævi heyrt af öðrum eins vítishroða og hefi ég þó margt séð og heyrt. Að vísu þekkti ég matsvein á vertíðarbát, sem snýtti sér og pissaði í sósur og súpur, en það var margföld þakkargjörðarhátíð miðað við kólígerlaðan skítaís. 

Umgengni við ísvélar batnar

Átakanlegt skilningsleysi á reynsluheimi karla

Ég fæ, andskotakornið, ekki betur séð en fémínístafraukurnar séu eitthvað ósáttar við hóruhúsasnattið hjá hinum glaðsinna fjármálastjóra KSÍ, hvernig sem á því stendur. Og það er líka kengur í þeim útí stjórn KSÍ, því þær heimta að sú stjórn segi af sér útaf fjármálastjóranum.

Það er eitt og annað útá þessa afgerandi afstöðu Fémínísta til stjórnar KSÍ að setja: Fyrir það fyrsta gera fémínurnar sér enga grein fyrir hvað það er að vera karlmaður og virðast afar fákunnandi um allt sem lýtur að viðkvæmum reynsluheimi karlmanna. Í öðru lagi virða þær að vettugi þá einföldu staðreynd, að það er erfitt að vera einmanna karlkyns persóna í erlendri stórborg, einkum þegar kemur að því að ganga framhjá hóruhúsi eða strípibúllu með eggjandi ljósaskiltum framaná. Í þriðja lagi virðast fémínur afneita því sem í daglegu tali kallast holdlegar fýsnir, því þær taka greddu saklausra karlmenna ekki til greina, sem heilbrigða, náttúrulega hvöt.

Að öllu samanlögðu, er einsýnt, að okkar ástkæru fémínístafraukur líta á fjármálastjóra KSÍ, sem og stjórn KSÍ, eins og hvert annað samansafn saurlífispúnga og pervertista, þrátt fyrir að sök þeirra felist einungis í saklausri gleði fjármálastjórans í góðra vina hópi inná löglegum veitingastað Sviss.

Fordæma niðurstöðu stjórnar KSÍ

Þökkum Drottni fyrir Sjálfstæðisflokkinn

Mikil guðsgjöf er blessaður Sjálfstæðisflokkurinn, fyrir hann ber oss að þakka Drottni af sannri auðmýkt hjartans. Innblásninn af mammonískum guðsanda tókst Sjálfstæðisflokknum að trekkja upp falskt góðæri með groddalegum frjálshyggjukapítalisma, sem hrundi að lokum til grunna. Því skulum vér muna, kvölds og morgna og miðjann dag, að þakka Sjálfstæðisflokknum yfirstandandi kaupmáttarhrap, vaxtaokur, skuldafangelsi og IceSave. Og vér skulum ekki leiðast í þá freisni, að hallmæla Sjálfstæðisflokknum, eða nota ljót orð um Foringja hans og þingmenn, fyrrverandi og núverandi. Þá skulum vér biðja Skaparann um að frelsa oss frá því illa innræti, sem lýsir sér í því að kenna Sjálfstæðisflokknum og hans göfugu hugsjón um allt sem aflaga hefur farið síðustu tvo áratugina.

Og vér verðum ætíð að hafa hugfast, að Sjálfstæðisflokksins á eilíflega að vera mátturinn og dýrðin á Íslandi, og vér eigum að biðja guð peningahyggjunnar og græðginnar um að festa oss það svo rækilega í minni, að vér gleymum því alrei. Amen.

Enn lækkar kaupmáttur

Reiddi fram drjúga fúlgu í kosningasjóð

Ósköp er nú gleðilegt að blessuð konan, sem vann árum saman við eignastýringu hjá Gamla Kaupþingi, skuli hafa stýrt smáslatta af aurum beinustu leið ofaní sína eigin buxnavasa. Það kallar maður nú eignastýringu í lagi! Satt að segja gleðst ég heilshugar yfir hverjum og einum sem tókst að ávaxta sitt pund í góðrinu mikla Sjálfstæðisflokksins, þegar dansinn kringum gullslegna hrunakálfinn stóð hvað hæst.

Hinsvegar skil ég í þessum arionísku kaupþingshéðnum, að reka kerlingargarminn frá auðsuppsprettunni, sem henni hafði tekist að opna með dugnaði og eljusemi. Þessháttar helvítis ruddaskap er ekki hægt að fyrirgefa og ég er nokkuð viss um Drottinn fyrirgefur kaupþingshéðunum þetta ólánsverk ekki heldur. Enda liggur ljóst fyrir, að konunni gekk ekki annað til en að græða peninga eins og allir hinir voru að gera. Og sé miðað við tíðarandann, sem ríkti þegar konan stundaði eignastýringu hjá Sigga Einars og Hreiðari Má, er glæpur hennar enginn; þar af leiðir að ódámarnir, sem vísuðu henni úr starfi, eiga að biðja konuna afsökunar, fá henni starf sitt aftur, en skríða sjálfir niður í kjallara og skammast sín þar eins og blauðir hundar.

En fróðlegast væri þó að vita hvernig konan hefur ráðsatafað aurunum sem hún eignastýrði af festu ofaní vasa sína. Ekki kæmi mér á óvart þó hún hefði séð aumur á Sjálfstæðisflokknum og lagt fáeinar milljónir í sí-tóman kosningasjóð Flokksins. Og víst er um það, að péníngar eignastýrðu konunnar hafa síður en svo verið verri en margir aðrir af þeim péníngum sem ratað hafa í Flokkssjóðinn.  

Fjárdráttur hjá Kaupþingi

Fágæt lífsreynsla frú Porró í Vík

Ekki get ég ímyndað mér, að Özi Skarp, ræfilstuskan svorna, hafi gott af því að vera mikið innan um útlenska hottintegla af ESB-standi. Við þekkjum hann hér að heiman, vitum öll hvernig blessaður unginn hefur snúist eins og vindhani í öllum málum, og raunar er með öllu óskiljanlegt, að hann skuli ekki fyrir löngu vera hrokkinn uppaf standinum. Og öll erum við sammála um, að Özi eigi að sofa á daginn og blogga á nærbuxunum einum klæða við eldhúsborðið heima hjá sér á nóttinni.

En mikið andskoti held ég að ráðamenn í útlöndum hlægi skelfilega að Öza í hvert skipti sem hann víkur af fundi með þeim og segi sem svo, að ekki sé nóg með að Íslendingar hafi komið sér útúr húsi hjá öllum siðuðum þjóðum, heldur sendi þeir, í þokkabót, trúð til að tala máli þeirra við upplýsta ráðamenn erlendra þjóða. Eða eins og Korrína Porró, hafnarstjóri í Vígó (Vík), sagði eftir að hún var laus við Öza: ,,Þetta er í fyrsta sinn, sem ég hefi hitt strump af holdi og blóði, en fram að þessu hafði ég aldrei séð eða heyrt strumpa nema í teiknimyndum."

Össur í höfuðborg spænsks sjávarútvegs

Byltingarhetjuna félaga Hugo til Íslands

Mikið vildi ég að við Íslendingar fengjum að verða þeirrar gæfu aðnjótandi, að fá félaga Hugo Chaves til að stjórna landinu okkar í eins og eitt ár. Hann myndi t.d. ekki hika eitt andartak við að hafa endaskipti á Sjálfstæðisflokknum og Framsóknarflokknum í eitt skipti fyrir öll, sem og glæpaklíkunum sem fengið hafa að þrífast í skjóli þessara tveggja alræmdu samtaka. 

Eftir þá hreingerningu gætum við farið að tala um Alvöru Nýja Ísland.

Lifi byltingin bæði á Íslandi og í Suður-Amríku. 

Idi Amin var ekki svo slæmur

Ráð vil eg yður gefa herra sóknarprestur

Þeir sem þjófstálu glæsivagni yfirsálnahirðisins í Keflavík, eru áreiðanlega afar vandir að virðingu sinni og miklir smekkmenn, sem láta ekki bjóða sér hvað sem er. Þessum mönnum kæmi aldrei til hugar, að taka 15 ára gamla japanska ryðdollu traustataki til að spara sér sporin ef þeir þyrftu nauðsynlega að bregða sér af bæ. Og ef það er rétt, að þjófarnir hafi gert sér ferð í sjálfa kirkjuna og inní skrúðhús til að sækja lyklana að eðalvagninum í frakkavasa musterishöfðingjans meðan hann söng helgar tíðir fyrir framan altarið, er auðsjáanlegt að þar hafa farið gáfaðir menn og sanntrúaðir. Að vísu stendur einhversstaðar á helgri bók, að menn eigi ekki að stela, en slíka smánuni setja menn, sem hafa frá blautu barnsbeini alist upp í þjófafélagi, ekki fyrir sig ef þeir þurfa að komast á þægilegan hátt frá Keflavík til Reykjavíkur.

Hitt er svo aftur annað mál, að það hefur vissulega verið erfitt fyrir sóknarprestinn, að þurfa að ganga alla leið heim til sín eftir að hafa lokið sínum guðrækilegu störfum í kirkjunni. Þessháttar gönguferðir geta verið hættulegar viðkvæmri heilsu fínstillra nútímaklerka. Mér kæmi ekki á óvart þó blessað hymmnaríkisljósið þar suðurfrá sé í dag altekið harðsperrum í fótunum og gangi um gólf álíka stirðlega og Stekkjastaur jólasveinn.

Ef kirkjumeistarinn í Keflavík vill komast hjá annarri slíkri uppákomu, ætti hann að selja eðalvagninn og fá sér hest, sem hann getur teymt með sér inní helgidóminn. Hross er auðvelt að binda við altarisbríkina á meðan eigandi þess sinnir skyldugu helgihaldi, allt uppí yfirgripsmiklar hátíðarguðþjónustur. 

Fundu bíl sóknarprestsins